ഭൂതത്താന്‍കെട്ടില്‍ കലുങ്ക് തകര്‍ന്നതിനെ തുടര്‍ന്ന് മുപ്പത് അടിയോളം വീതിയില്‍ റോഡ് ഇടിഞ്ഞ് താണു. സംഭവത്തില്‍ ബൈക്ക് യാത്രികരായ സഹോദരങ്ങള്‍ അപകടത്തില്‍പ്പെട്ടു. റോഡ് തകര്‍ന്നതോടെ വടാട്ടുപാറ, ഇടമലയാര്‍ പ്രദേശങ്ങളും താളുംകണ്ടം, പോങ്ങന്‍ചോട് ആദിവാസി കോളനികളും ഒറ്റപ്പെട്ടു. ഇന്ന് പുലര്‍ച്ചെ 5.10 ഓടെയാണ് അപകടം ഉണ്ടായത്.
കോതമംഗലം ഇടമലയാര്‍ റോഡില്‍ ഭൂതത്താന്‍കെട്ടില്‍ ഹിന്ദുസ്ഥാന്‍ ന്യൂസ്പ്രിന്റ്‌സിന്റെ പഴയ സോണല്‍ ഓഫീസിന് സമീപമാണ് ഈറ്റ കനാല്‍ കലുങ്കും ഇരുവശം റോഡും ഇടിഞ്ഞ് നിലംപൊത്തിയത്.കലുങ്കിന്റെ കോണ്‍ക്രീറ്റ് സ്ലാബുകള്‍ നിലത്തടിഞ്ഞു. അപകടസമയത്ത് വാഹനങ്ങള്‍ വലിയ വാഹനങ്ങള്‍ കടന്നുപോകാതിരുന്നതിനാലും ഡാമിലെ ജലനിരപ്പ് കുറവായിരുന്നതിനാലും വന്‍ദുരന്തം ഒഴിവായി. ഭൂതത്താന്‍കെട്ട് സ്വദേശി ആപ്പിളളില്‍ ജയന്‍ (33) സഹോദരന്‍ വിജയന്‍ (37) എന്നിവര്‍ ബൈക്കില്‍ ഇതുവഴി കടന്ന് പോകുമ്പോഴാണ് അപകടം.വിജയന് കരക്ക് കയറുവാന്‍ സാധിച്ചെങ്കിലും മണ്ണിലും കല്‍കെട്ടിനും ഇടയില്‍ ജയന്‍ കുടുങ്ങി.
പിന്നീട് സമീപവാസികളും വാഹന യാത്രക്കാരും ചേര്‍ന്നാണ് ജയനെ രക്ഷപ്പെടുത്തിയത്. ബൈക്ക് മണ്ണിനടിയില്‍ അകപ്പെട്ടു. ഇരുവരെയും പരിക്കുകളോടെ കോതമംഗലത്തെ ആശുപത്രിയില്‍ പ്രവേശിപ്പിച്ചു. വടാട്ടുപാറ, ഇടമലയാര്‍ പ്രദേശവാസികളും താളുംകണ്ടം, പോങ്ങന്‍ചോട് ആദിവാസി കോളനി നിവാസികളുമടക്കം ആയിരക്കണക്കിനാളുകളാണ് പുറംലോകവുമായി ബന്ധപ്പെടുവാന്‍ മാര്‍ഗ്ഗമില്ലാതെ കുടുങ്ങിയിരിക്കുന്നത്. ഈ മേഖലയിലെ ആളുകള്‍ ആശുപത്രി ആവശ്യങ്ങള്‍ക്കും ജോലി സ്ഥലത്തേക്കും വിദ്യാലയങ്ങളിലേക്കും പോകുവാനായി ആശ്രയിക്കുന്ന റോഡാണ് തകര്‍ന്നത്. ഭൂതത്താന്‍കെട്ട് ഡാംബാരേജ്, ഇടമലയാര്‍ വൈദ്യുത പ്രോജക്ടുകളിലേക്കുമെല്ലാം എത്തിച്ചേരാനുളള ഏക മാര്‍ഗ്ഗമാണ് തകര്‍ന്നടിഞ്ഞ റോഡ്. ഭൂതത്താന്‍കെട്ടില്‍ നിര്‍മ്മാണം നടക്കുന്ന മിനി വൈദ്യുതി പദ്ധതിക്കുള്ള യന്ത്രസാമഗ്രികളെല്ലാം ഇതു വഴിവഴിയാണ് പോകേണ്ടത്.

കഴിഞ്ഞ കുറെ ദിവസങ്ങളായി പെയ്യുന്ന കനത്ത മഴമൂലം ജലനിരപ്പ് ഉയര്‍ന്നത് നിയന്ത്രിക്കുന്നതിനുവേണ്ടി രണ്ട് പ്രാവശ്യമായി ഭൂതത്താന്‍കെട്ട് ഡാമിന്റെ 15 ഷട്ടറുകളില്‍ ഒമ്പത് എണ്ണം തുറന്ന് വിട്ടിരിക്കുകയാണ്. അപകടത്തില്‍ ഇടിഞ്ഞറോഡിന് ഇരു വശവും ഭൂതത്താന്‍കെട്ട് ജലാശയത്തിന്റെ ഭാഗമാണ്. പോലിസും പെരിയാര്‍വാലി അധിക്യതരും രാവിലെതന്നെ സംഭവ സ്ഥലത്തെത്തിയിട്ടുണ്ട്. റോഡ് ഇടിഞ്ഞ് താണഭാഗത്ത് നിലവില്‍ വെള്ളം ഇല്ലാത്തതിനാല്‍ താല്‍ക്കാലികമായി കുറുകെ മണ്ണിട്ട് നികത്തി അക്കരെ ഇക്കരെ കടക്കുവാന്‍ കാല്‍നട യാത്രയ്ക്ക് സൗകര്യം ഒരുക്കുവാനുള്ള നീക്കവും ആരംഭിച്ചിട്ടുണ്ട്.