ഇക്കഴിഞ്ഞ ചൊവ്വാഴ്ച വൈകിട്ട് മധ്യപ്രദേശിലെ ഹബീബ് ഗഞ്ച് റെയില്‍വേ സ്‌റ്റേഷന് വിളിപ്പാടകലെ ഒരു 19-കാരി അതിക്രമത്തിന് ഇരയായി.സിവില്‍ സര്‍വ്വീസ് പരീക്ഷക്ക് തയാറെടുക്കുകയായിരുന്നു പെണ്‍കുട്ടി.

മാനഭംഗത്തിനു ശേഷം തന്റെ മാതാപിതാക്കള്‍ ആരെന്ന് പറയാന്‍ നിര്‍ബന്ധിച്ചു കൊണ്ട് പ്രതികള്‍ തന്നെ മര്‍ദിച്ചു കൊണ്ടേ ഇരുന്നെന്നും എന്നാല്‍, അവര്‍ പൊലീസിലാണെന്ന വസ്തുത മറച്ചുവെച്ച് മാതാവിന് തയ്യല്‍ ജോലിയും പിതാവിന് കൂലിപ്പണിയുമാണെന്നാണ് അവള്‍ അവരോട് പറഞ്ഞത്.

സമ്പന്നകുടുംബത്തില്‍ പെട്ടതാണെങ്കില്‍ കേസുമായി മുന്നോട്ടു പോകുമെന്ന് ഭയന്നാണ് അവര്‍ കുടുംബപശ്ചാത്തലം അന്വേഷിച്ചത്. സമ്പന്നയാണെങ്കില്‍ കൊല്ലാനോ തട്ടിക്കൊണ്ടുപോയി മോചനദ്രവ്യം ആവശ്യപ്പെടാനോ ആയിരുന്നു പദ്ധതി. താന്‍ ദരിദ്രയാണെന്ന് കരുതി അവര്‍ ഉപേക്ഷിക്കുകയായിരുന്നെന്ന് പെണ്‍കുട്ടി പറഞ്ഞു. പെണ്‍കുട്ടിയുടെ പിതാവ് റെയില്‍വേ സംരക്ഷണസേനയിലും മാതാവ് മധ്യപ്രദേശ് പൊലീസിലുമാണ്.

അതേസമയം, തന്റെ മകള്‍ ധീരയാണെന്നും അവളെ ദ്രോഹിച്ചതിലൂടെ പ്രതികളുടെ ജീവിതമാണ് തകരുന്നതെന്നും മാതാവ് പറഞ്ഞു. മുമ്പ് ഐ.എ.എസുകാരിയാവാനാണ് മകള്‍ ആഗ്രഹിച്ചത്. ഇപ്പോള്‍ ഐ.പി.എസ് നേടി ഇത്തരം കുറ്റവാളികളെ പാഠം പഠിപ്പിക്കണമെന്നാണ് അവള്‍ ആഗ്രഹിക്കുന്നതെന്നും അവര്‍ കൂട്ടിച്ചേര്‍ത്തു.

മൂന്ന് പ്രതികളില്‍ രണ്ടുപേരെ സമീപത്തെ അനധികൃത ചേരിയില്‍ നിന്ന് പൊലീസ് അറസ്റ്റ് ചെയ്തിരുന്നു. മുമ്പ് ഇതേ സ്ഥലത്ത് മറ്റൊരു പെണ്‍കുട്ടി ബലാത്സംഗത്തിനിരയായത്രെ. എന്നാല്‍, സമൂഹഭ്രഷ്ട് ഭയന്ന് ബന്ധുക്കള്‍ പൊലീസില്‍ പരാതി നല്‍കാന്‍ കൂട്ടാക്കിയില്ലെന്ന് പ്രദേശവാസികള്‍ പറയുന്നു.

പ്രതികള്‍ക്ക് വേണ്ടി കോടതിയില്‍ ഹാജരാവില്ലെന്ന് ഭോപ്പാല്‍ ബാര്‍ അസോസിയേഷന്‍ പ്രസിഡന്റ് രാജേഷ് വ്യാസ് അറിയിച്ചു. കേസ് നടത്തിപ്പിന് അതിവേഗകോടതി സ്ഥാപിക്കുമെന്ന് മുഖ്യമന്ത്രി ശിവരാജ് സിങ് ചൗഹാന്‍ പറഞ്ഞു. രാജ്യത്ത് സ്ത്രീകള്‍ക്കുനേരെ കൂടുതല്‍ അതിക്രമം നടക്കുന്ന സംസ്ഥാനമാണ് മധ്യപ്രദേശ്. ഇവിടെ ഓരോ രണ്ടുമണിക്കൂറിലും ഒരു ബലാത്സംഗം നടക്കുന്നതായാണ് കണക്ക്.