2021ലെ സെന്‍സസില്‍ മറ്റ് പിന്നാക്ക വിഭാഗക്കാരുടെ വിവരങ്ങള്‍ പ്രത്യേകം ശേഖരിക്കുമെന്ന് കേന്ദ്രസര്‍ക്കാര്‍. ഒ.ബി.സി വിഭാഗം കൂടുതല്‍ സംവരണം ആവശ്യപ്പെട്ട് പ്രക്ഷോഭം നടത്തുന്നതിനിടെയാണ് സര്‍ക്കാരിന്റെ നിര്‍ണായക നീക്കം. സെന്‍സസിന്റെ 1931 മുതലുള്ള ചരിത്രം പരിശോധിച്ചാല്‍ ഇത്തരം ഒരു നീക്കം ഇത് ആദ്യമായാണ്. സെന്‍സസ് കമ്മീഷണറുടെയും റജിസ്ട്രാര്‍‌ ജനറലിന്റെയും ഓഫിസുകളുടെ പ്രവര്‍ത്തനം കേന്ദ്രമന്ത്രി രാജ്നാഥ് സിംഗ് വെള്ളിയാഴ്ച വിലയിരുത്തിയതിന് ശേഷമാണ് തീരുമാനം. സെന്‍സസ് നടത്തി മൂന്നുവര്‍ഷത്തിനുള്ളില്‍ സമ്ബൂ‍ര്‍ണമായ വിവരങ്ങള്‍ തയാറാക്കുന്നതിനാണ് നിര്‍ദേശം.

ഒ.ബി.സി വിഭാഗക്കാരുടെ സാമ്ബത്തിക സ്ഥിതി, ജനസാന്ദ്രത എന്നിവയുടെ വിവരങ്ങള്‍ എടുക്കും. എന്നാല്‍ ഏറ്റവും വലിയ വോട്ട് ബാങ്കുകളില്‍ ഒന്നായ ഒ.ബി.സിക്കാരുടെ ജാതിഘടന മനസിലാക്കുന്നതിനുള്ള നീക്കം എത്രമാത്രം കൃത്യമാകുമെന്ന സംശയം ഉയര്‍ന്നിട്ടുണ്ട്. ജനന, മരണ റജിസ്ട്രേഷന്‍, ശിശുമരണ നിരക്ക് എന്നിവ രേഖപ്പെടുന്നതിന് കൂടുതല്‍ ഉൗന്നല്‍ നല്‍കണമെന്നും കേന്ദ്ര ആഭ്യന്തരമന്ത്രി നിര്‍ദേശിച്ചിട്ടുണ്ട്. വിവരശേഖരണത്തിനായി 25 ലക്ഷം പേര്‍ തയാറായതായും മന്ത്രാലയം അറിയിച്ചു.