കര്‍ഷകരോട് മുഖം തിരിച്ച് ഫഡ്‌നാവിസ് ഗവണ്‍മെന്റ്. കര്‍ഷക രക്ഷയ്ക്ക് ഒന്നും ചെയ്യാനാകാതെ സര്‍ക്കാര്‍ നോക്കുകുത്തിയാകുന്നു. കര്‍ഷകരുടെ കാര്യത്തില്‍ മോഡിയും പരിപൂര്‍ണ്ണ പരാജയമെന്നാണ് കണക്കുകാണിക്കുന്നത്. 
മഹാരാഷ്ട്രയിലെ മറാത്ത്‌വാഡ മേഖലയിലെ എട്ടു ജില്ലകളിലായി 63 കര്‍ഷകര്‍ കടക്കെണിയില്‍ മനംനൊന്ത് ആത്മഹത്യ ചെയ്തതായി റിപ്പോര്‍ട്ട്. 2018 ജനുവരി ഒന്നുമുതല്‍ ഓഗസ്റ്റ് 26 വരെയുള്ള കാലയളവില്‍ 590 കര്‍ഷകര്‍ ആത്മഹത്യ ചെയ്തിട്ടുണ്ട്. കടബാധ്യതയും, വിളനാശവും, വിളകള്‍ക്ക് പിടിപ്പെട്ട വന്ധ്യതയുമാണ് ഇത്രയധികം കര്‍ഷകരെ ആത്മഹത്യയ്ക്ക് പ്രേരിപ്പിച്ചത്. ഈ വര്‍ഷം റിപ്പോര്‍ട്ട് ചെയ്ത 590 കര്‍ഷക ആത്മഹത്യ കേസില്‍ 345 പേര്‍ നഷ്ടപരിഹാരം കിട്ടാന്‍ യോഗ്യരാണെന്ന് കണ്ടെത്തിയിട്ടുണ്ട്. 333 കര്‍ഷക കുടുംബങ്ങള്‍ക്ക് നഷ്ടപരിഹാരം നല്‍കുകയും ചെയ്തു. ആത്മഹത്യ ചെയ്ത 151 കര്‍ഷകര്‍ നഷ്ട പരിഹാരത്തിന് അര്‍ഹരല്ലെന്ന് കണ്ടെത്തുകയും സഹായം നിരസിക്കുകയും ചെയ്തു.
മറാത്ത്‌വാഡ മേഖലയിലെ ബീഡ് ജില്ലയില്‍ മാത്രം 19 കര്‍ഷകരാണ് കടക്കെണിയും വിളനാശവും മൂലം ആത്മഹത്യ ചെയ്തത്. ഒസ്മനാബാദ് ജില്ലയില്‍ ആത്മഹത്യ ചെയ്തത് 14 കര്‍ഷകരാണ്. നാന്ദെഡ് ജില്ലയില്‍ എട്ടും, ഔറംഗബാദ്, പര്‍ഭാനി ജില്ലകളിലായി ഏഴും, ലാത്തൂര്‍ ജില്ലയില്‍ നാലും, ജല്‍ന ഹിംഗോളി ജില്ലകളിലായി ഓരോ കര്‍ഷകരുമാണ് ആത്മഹത്യ ചെയ്തത്. എല്ലാ ഗവണ്‍മെന്റുകള്‍ക്കും കര്‍ഷകനോട് പുച്ഛമാണെന്ന സത്യമാണ് ഇപ്പോള്‍ പുറത്തുവരുന്നത്. ഇലക്ഷന്‍ അടുക്കുമ്പോള്‍ വാഗ്ദാനം നല്‍കാനുള്ള ഒരു വിഭാഗമായി മാത്രമായി കര്‍ഷകരെ ഒതുക്കുന്നത് വന്‍ദുരന്തമാകും ഇന്ത്യക്ക വരുത്തിവെക്കുക.