ഇടതുപക്ഷമനുഷ്യാവകാശ പ്രവര്‍ത്തകരെ അറസ്റ്റ് ചെയ്തത് വ്യക്തമായ തെളിവുകളുടെ അടിസ്ഥാനത്തിലെന്ന മഹാരാഷ്ട്ര പൊലീസിന്റെ അവകാശവാദം കള്ളമാണെന്ന് അറസ്റ്റിലായ കവി വരവര റാവുവിന്റെ അനന്തരവന്‍. കെട്ടിച്ചമച്ച കഥകളാണ് പൊലീസ് വാര്‍ത്തസമ്മേളനത്തില്‍ പറഞ്ഞതെന്നും അവയെല്ലാം കഴിഞ്ഞ ജൂണില്‍ പൊലീസ്തന്നെ പറഞ്ഞ കാര്യങ്ങളാണെന്നും അനന്തരവന്‍ വേണുഗോപാല്‍ ഹൈദരാബാദില്‍ പറഞ്ഞു.

കൂടാതെ, പൊലീസ് നടത്തിയ വാര്‍ത്തസമ്മേളനം നിയമവിരുദ്ധമാണെന്നും അദ്ദേഹം ആരോപിച്ചു. ''സെപ്റ്റംബര്‍ ആറിന് അറസ്റ്റ് സംബന്ധിച്ച തെളിവുകള്‍ ഹാജരാക്കണമെന്ന് കോടതി ആവശ്യപ്പെട്ടിരിക്കെ, പടച്ചെടുത്ത കാര്യങ്ങളുമായി തിരക്കിട്ട് വാര്‍ത്തസമ്മേളനം നടത്തി അറസ്റ്റിലായവരെ അപകീര്‍ത്തിപ്പെടുത്തുകയാണ് പൊലീസ്. ഇത് കോടതിയലക്ഷ്യമാണ്. ഈ പൊലീസ് ഓഫിസര്‍ക്ക് വാര്‍ത്തസമ്മേളനം നടത്താന്‍ അധികാരമില്ല. കോടതിക്കാണ്, മാധ്യമങ്ങള്‍ക്കല്ല തെളിവു നല്‍കേണ്ടത്. തെളിവിന്റെ ന്യായാന്യായമല്ല ഞാന്‍ പറയുന്നത്, ഇത് തെളിവുപോലുമല്ല. മഹാരാഷ്ട്ര പൊലീസ് നടത്തിയത് രാഷ്ട്രീയ പ്രേരിത അറസ്റ്റാണെന്ന് കോണ്‍ഗ്രസും എന്‍.സി.പിയും ശിവസേന തന്നെയും പ്രസ്താവന ഇറക്കിയിരിക്കുകയാണ്.'' വേണുഗോപാല്‍ തുടര്‍ന്നു. 

മാവോവാദി ബന്ധം ആരോപിച്ച് ആഗസ്റ്റ് 20നാണ് വരവര റാവു അടക്കം അഞ്ച് ഇടതുപക്ഷമനുഷ്യാവകാശ പ്രവര്‍ത്തകരെ രാജ്യത്തിന്റെ വിവിധ ഭാഗങ്ങളില്‍നിന്ന് പൊലീസ് അറസ്റ്റ് ചെയ്തത്.