അരുണ് ജയ്റ്റ്ലി എങ്ങനെ കേന്ദ്ര ധനകാര്യമന്ത്രിയായി ?.....ലോകത്തിലെ നാല് ചുരുളഴിയാത്ത രഹസ്യങ്ങൾ; വിവാദങ്ങൾക്ക് വീണ്ടും തിരി കൊളുത്തി ദിവ്യ സ്പന്ദന
പ്രധാന മന്ത്രി നരേന്ദ്രമോദിയെ കള്ളനെന്ന് വിളിച്ച് അധിക്ഷേപിച്ച് വിവാദങ്ങൾക്ക് വഴിയൊരുക്കിയ ദിവ്യ സ്പന്ദന കേന്ദ്ര ധനകാര്യമന്ത്രി അരുണ് ജയ്റ്റ്ലിയെ ട്രോളി രംഗത്തെത്തിയിരിക്കുകയാണ്. എ.ഐ.സി.സി.യുടെ സാമൂഹിക മാധ്യമവിഭാഗത്തിന്റെ ചുമതല വഹിക്കുന്ന ദിവ്യ ട്രോൾ ചിത്രം തന്റെ ട്വിറ്റർ അക്കൗണ്ടിലൂടെയാണ് പുറത്തുവിട്ടത്. കോൺഗ്രസിനെ സമൂഹമാധ്യമത്തിൽ സജീവമാക്കി നിര്ത്തുന്നതിൽ പ്രധാന പങ്കു വഹിക്കുന്നവരിൽ ഒരാളാണു ദിവ്യ സ്പന്ദന.
ലോകത്തില് ചുരുളഴിയാത്ത മൂന്ന് രഹസ്യങ്ങളുണ്ട്. അതിനൊപ്പം നാലാമത്തെ രഹസ്യത്തെക്കുറിച്ചാണ് ദിവ്യ കാണിച്ചുതരുന്നത്. അരുണ് ജയ്റ്റ്ലിയുടെ ഫോട്ടോ വെച്ചാണ് ചോദ്യം ഉന്നയിക്കുന്നത്. അരുണ് ജയ്റ്റ്ലി എങ്ങനെ ധനകാര്യമന്ത്രിയായി എന്നാണ് ദിവ്യയുടെ സംശയം.
അറ്റ്ലാന്റിക് നഗരമെവിടെ, ദിനോസറുകള് വംശനാശം സംഭവിച്ചത് എങ്ങനെ, അന്യഗ്രഹജീവികള് ശരിയ്ക്കുമുണ്ടോ തുടങ്ങിയ ചോദ്യങ്ങള്ക്കൊപ്പമാണ് ജയ്റ്റ്ലി എങ്ങനെ ധനകാര്യമന്ത്രിയായത് എന്ന് ചോദിച്ച് ദിവ്യ ട്വിറ്ററില് പോസ്റ്റിട്ടിരിക്കുന്നത്.
നരേന്ദ്രമോദിയെ കള്ളൻ എന്ന് പരാമർശിച്ച ദിവ്യ സ്പന്ദനയുടെ ട്വീറ്റിന്റെ പേരിൽ അവർക്കെതിരേ യു.പി. പോലീസ് രാജ്യദ്രോഹകുറ്റത്തിന് കേസെടുത്തിട്ടുണ്ടായിരുന്നു. അതോടൊപ്പം മോദിയുടെ വിദ്യാഭ്യാസയോഗ്യതയുമായി ബന്ധപ്പെട്ട അവരുടെ ചില പരാമർശങ്ങൾ അതിരുകടന്നു എന്ന അഭിപ്രായാവും ചില പാർട്ടിനേതാക്കൾ ഉന്നയിച്ചിരുന്നു.
ഈ വിവാദങ്ങൾ കെട്ടടങ്ങാതെയാണ് പുതിയ വിവാദത്തിന് ദിവ്യ തിരികൊളുത്തിയിരിക്കുന്നത്. നേരത്തെ രൂപയുടെ മൂല്യത്തകര്ച്ചയെ നയാഗ്ര വെള്ളച്ചാട്ടത്തോട് ഉപമിച്ചും ദിവ്യ രംഗത്ത് വന്നിരുന്നു.
https://www.facebook.com/Malayalivartha