ലോകത്തിലെ അത്യാകര്‍ഷ ബീച്ചുകളിലൊന്നാണ് തായ്‌ലന്‍ഡിലെ മയാ ബേ ബീച്ച്. 2000ല്‍ പ്രദര്‍ശനത്തിനെത്തിയ ദ ബീച്ചിലൂടെ വിനോദസഞ്ചാരികളുടെ കുത്തൊഴുക്കായിരുന്നു മയാ ബേയിലേക്ക്. വര്‍ഷങ്ങള്‍ പിന്നിട്ടപ്പോള്‍ ആറായിരത്തിലധികം സഞ്ചാരികളാണ് ദിനംപ്രതി ഇവിടെയെത്തുന്നത്. അനിശ്ചിത കാലത്തേക്ക് സഞ്ചാരികളെ ഈ പ്രദേശത്തേക്ക് അടുപ്പിക്കില്ലെന്ന് തായ്‌ലന്‍ഡ് നാഷണല്‍ പാര്‍ക്ക്, വന്യജീവി, സസ്യസംരക്ഷണ വകുപ്പ് ഉത്തരവിറക്കിയിരിക്കുന്നത്.

എല്ലാ വര്‍ഷവും ജൂണ്‍ മുതല്‍ നാലു മാസത്തേക്ക് ബീച്ച് അടച്ചിടാറാണ് പതിവ്. എന്നാല്‍, ഒക്‌ടോബറില്‍ തുറന്നുകൊടുക്കേണ്ടത് അനിശ്ചിതകാലത്തേക്കു നീട്ടുകയായിരുന്നു. സഞ്ചാരികളുടെ ആധിക്യം നിമിത്തം പരിസ്ഥിതിക്കേറ്റ കോട്ടം നികത്താന്‍ കൂടുതല്‍ സമയം വേണ്ടിവരുമെന്നതിനാലാണ് ഈ നീക്കം. 

ദേശീയോദ്യാന വകുപ്പിന്റെ റിപ്പോര്‍ട്ടുകള്‍പ്രകാരം ഇവിടെത്തുന്ന ടൂറിസ്റ്റുകള്‍ പരിസ്ഥിതിയെ ദോഷകരമാംവിധം നശിപ്പിക്കുന്നുണ്ട്. ബീച്ചും പരിസരവും പൂര്‍ണമായും നശിപ്പിക്കപ്പെട്ടു. സസ്യങ്ങള്‍ പലതും നാമാവശേഷമായി.

മയാ ബേ ബീച്ച് വീണ്ടും പഴയരൂപത്തിലാക്കുക എന്നത് ശ്രമകരമായ കാര്യമാണെന്നും സര്‍ക്കാര്‍ വൃത്തങ്ങള്‍ പറയുന്നു. റിപ്പോര്‍ട്ടുകള്‍ പ്രകാരം മലിനീകരണം, മാലിന്യം തുടങ്ങിയവ മൂലം ബീച്ചിലെ 80 ശതമാനം പവിഴപ്പുറ്റുകളും നശിച്ചു.

ഒരു വര്‍ഷം ശാരാശരി അര സെന്റിമീറ്ററാണ് പവിഴപ്പുറ്റുകള്‍ വളരുന്നത്. അതുകൊണ്ടുതന്നെ അവയുടെ നാശം വലിയ പ്രതിസന്ധിയാണ് ഉളവാക്കിയിരിക്കുന്നത്. 2018ല്‍ ഇതുവരെ 25 ലക്ഷത്തിലധികം സഞ്ചാരികള്‍ മയാ ബേ ബീച്ചില്‍ എത്തിയിട്ടുണ്ട്.