പച്ചക്കറികളും മറ്റ് സാധനങ്ങളും നമ്മുടെ വീട്ടു പടിക്കലെത്തുന്നതു പോലെ ഇനി മദ്യവും വീട്ടിലെത്തും. മദ്യം വീട്ടിലെത്തിക്കുന്ന ആദ്യ സംസ്ഥാനമായി മാറാനൊരുങ്ങി മഹാരാഷ്ട്ര. മദ്യപിച്ച് വാഹനമോടിക്കുന്ന സംഭവങ്ങള്‍ ദിനം പ്രതി വര്‍ധിച്ചതോടെയാണ് ഇത്തരമൊരു നീക്കത്തിന് മഹാരാഷ്ട്ര എക്‌സൈസ് വകുപ്പ് ഒരുങ്ങുന്നത്. നിലവിലുള്ള ഇകോമേഴ്‌സ് സംവിധാനത്തിന് സമാനമായിട്ടായിരിക്കും മഹാരാഷ്ട്രയില്‍ മദ്യവില്‍പനയെന്ന് എക്‌സൈസ് വകുപ്പ് സഹമന്ത്രി ചന്ദ്രശേഖര്‍ ബവാന്‍കുല പറഞ്ഞു . പച്ചക്കറികളും മറ്റ് സാധനങ്ങളും എത്തുന്നത് പോലെ തന്നെ മദ്യവും വീട്ടിലെത്തിക്കുന്നതാണ് പദ്ധതിയെന്നും അദ്ദേഹം കൂട്ടിച്ചേര്‍ത്തു.

മദ്യം വാങ്ങുന്നവരുടെ വയസ് പരിശോധിക്കാനായി ഓര്‍ഡര്‍ നല്‍കുമ്പോള്‍ ഉപഭോക്താകള്‍ അവരുടെ ആധാര്‍ നമ്പര്‍ കൂടി നല്‍കണം. ജിയോ ടാഗോട് കൂടിയ മദ്യകുപ്പികളാവും വിതരണം ചെയ്യുക. ഇത് വ്യാജ മദ്യ വില്‍പനയും മദ്യക്കടത്തും തടയുമെന്നും എക്‌സൈ് വകുപ്പ് മന്ത്രി അറിയിച്ചു. നാഷണല്‍ ക്രൈം റെക്കോര്‍ഡ്‌സ് ബ്യൂറോയുടെ കണക്ക് പ്രകാരം രാജ്യത്ത് നടക്കുന്ന അപകടങ്ങളില്‍1.5 ശതമാനവും മദ്യപിച്ച് വാഹനമോടിക്കുന്നത് മൂലം സംഭവിക്കുന്നതാണ്.
മദ്യപിച്ച് വാഹനമോടിച്ചുണ്ടാകുന്ന അപകടങ്ങളില്‍ യാത്രക്കാരുടെ മരണനിരക്ക് 42 ശതമാനമാണെന്നും കണക്കുകള്‍ വ്യക്തമാക്കുന്നു.