ജാമ്യം ലഭിച്ച ബിഷപ്പ് ഫ്രാങ്കോ മുളയ്ക്കല്‍ ജലന്ധര്‍ രൂപതാ ആസ്ഥാനത്തെത്തി.. മുൻപ് ജലന്ധര്‍ രൂപതാ ബിഷപ്പായിരുന്നു ഫ്രാങ്കോ മുളയ്ക്കല്‍. തിരിച്ചത്തിയ ഫ്രാങ്കോയ്ക്ക് താരപരിവേഷമാണ് വിശ്വാസികള്‍ നല്‍കിയത്.

വത്തിക്കാന്‍ നിയോഗിച്ച അഡ്മിനിസ്ട്രേറ്റര്‍ ബിഷപ്പ് അഗ്നലോ റൂഫസ് ഗ്രേഷ്യസിന്റെ നേതൃത്വത്തിലാണ് സ്വീകരണം ഒരുക്കിയിരുന്നത് . നിലവിലെ ബിഷപ്പ്, കന്യാസ്ത്രീകള്‍, വിശ്വാസികള്‍ തുടങ്ങിയ സംഘം റോസാപൂഷ്പങ്ങള്‍ ഫ്രാങ്കോയുടെ മേല്‍ വര്‍ഷിച്ചാണ് സ്വീകരിച്ചത്. കഴിഞ്ഞ ദിവസം വൈകുന്നേരമാണ് ഫ്രാങ്കോ ജലന്ധറില്‍ തിരിച്ചെത്തിയത്. ബിഷപ്പിന്റെ വീടിന് ചുറ്റുമായും ജലന്ധറിന്റെ പല പ്രദേശങ്ങളിലും ബിഷപ്പിനെ വരവേല്‍ക്കുന്നുവെന്ന തരത്തിലുള്ള പോസ്റ്ററുകളും ഫ്‌ളക്‌സുകളും സ്ഥാപിച്ചിട്ടുമുണ്ട്. ബിഷപ്പിനെ പിന്തുണച്ചുകൊണ്ടുള്ള മുദ്രാവാക്യങ്ങള്‍ മുഴങ്ങിക്കേട്ടു.

വിശ്വാസികള്‍ എനിക്കൊപ്പമുണ്ട്..ഇവരുടെ പ്രാര്‍ത്ഥനകളുടെ ഫലമായാണ് എനിക്ക് ജാമ്യം കിട്ടിയതെന്ന് ഞാന്‍ വിശ്വസിക്കുന്നു. അന്വേഷണം നടന്നുവരികയാണ്. രാജ്യത്തിന്റെ നിയമവ്യവസ്ഥിതിയില്‍ എനിക്ക് പരിപൂര്‍ണമായ വിശ്വാസമുണ്ടെന്നും മാധ്യമങ്ങളോട് ഫ്രാങ്കോ മുളയ്ക്കല്‍ പറഞ്ഞു.

ജലന്ധര്‍ ബിഷപ്പ് ഹൗസില്‍ താമസിച്ചുകൊണ്ട് കേസുമായി ബന്ധപ്പെട്ട നിയമ നടപടികളില്‍ സഹകരിക്കാനാണ് ഫ്രാങ്കോയുടെ തീരുമാനം. സേക്രഡ് ഹാര്‍ട്ട് ദേവാലയത്തില്‍ അര്‍പ്പിച്ച ദിവ്യബലിയുടെ മദ്ധ്യേ തനിക്കൊപ്പം ഉറച്ചു നിന്ന പഞ്ചാബിലെ വിശ്വാസികള്‍ക്കും ബിഷപ്പ് ഫ്രാങ്കോ മുളയ്ക്കല്‍ നന്ദി പറഞ്ഞു