അമൃത്‌സര്‍ ട്രെയിന്‍ അപകടത്തില്‍ മരണപ്പെട്ടവരുടെ കുടുംബങ്ങള്‍ക്ക് പ്രധാനമന്ത്രി നരേന്ദ്രമോദി രണ്ട് ലക്ഷം രൂപ ധനസഹായം പ്രഖ്യാപിച്ചു. അപകടത്തില്‍ പരിക്കേറ്റവര്‍ക്ക് 50,000 രൂപ വീതവും ധനസഹായം പ്രഖ്യാപിച്ചിട്ടുണ്ട്. മരിച്ചവരുടെ ആശ്രിതര്‍ക്ക് പഞ്ചാബ് സര്‍ക്കാരും അഞ്ചുലക്ഷം രൂപ പ്രഖ്യാപിച്ചു. പരിക്കേറ്റവര്‍ക്ക് സൗജന്യ ചികിത്സ നല്‍കുമെന്നും പഞ്ചാബ് മുഖ്യമന്ത്രി അമരീന്ദര്‍ സിംഗ് അറിയിച്ചു. അമൃത്‌സറിലെ ചൗറ ബസാറിലായിരുന്നു സംഭവമുണ്ടായത്.

ദസറ ആഘോഷങ്ങള്‍ വീക്ഷിക്കുന്നതിനിടെ റെയില്‍ പാളത്തില്‍ നിന്ന ജനങ്ങളുടെ നേര്‍ക്കാണ് ട്രെയിന്‍ പാഞ്ഞുകയറിയത്. അന്‍പത്തിയെട്ട് പേര്‍ മരിച്ചതായാണ് വിവരം. ദസറ ആഘോഷത്തിന്റെ ഭാഗമായി രാവണരൂപം ട്രാക്കില്‍ വച്ച് കത്തിക്കുമ്പോഴാണ് അപകടം. നിരവധി പേര്‍ക്ക് പരിക്കേറ്റു. ആഘോഷത്തിന്റെ ഭാഗമായി പടക്കങ്ങള്‍ പൊട്ടിച്ചതിനാല്‍ ട്രെയിന്‍ അടുത്തു വരുന്നതിന്റെ ശബ്ദം കേള്‍ക്കാനായില്ല. ഇതാണ് ദുരന്തത്തിന് കാരണമായതെന്നാണ് പ്രാഥമിക റിപ്പോര്‍ട്ട്. മരണ സംഖ്യ ഇനിയും ഉയര്‍ന്നേക്കാം. ആയിരത്തിനടുത്ത് ആളുകള്‍ അപകടം നടന്ന സ്ഥലത്തു തടിച്ചു കൂടിയിരുന്നു.

അതേസമയം, സംഭവത്തില്‍ വിവാദവും ഉയര്‍ന്നിട്ടുണ്ട്.കോണ്‍ഗ്രസ് സംഘടിപ്പിച്ച ദസറ ആഘോഷത്തിനിടെയാണ് അപകടമെന്ന് പ്രതിപക്ഷം ആരോപിച്ചു. പരിപാടിക്ക് അനുമതി നല്‍കിയിരുന്നില്ലെന്ന് റെയില്‍വേ ബോര്‍ഡും വ്യക്തമാക്കിയിട്ടുണ്ട്. മന്ത്രി നവ്‌ജ്യോത് സിംഗ് സിദ്ദുവായിരുന്നു പരിപാടിയുടെ സംഘാടകനെന്ന് ബി.ജെ.പി ആരോപിച്ചു.
സിദ്ദുവിന്റെ ഭാര്യ നവ്‌ജ്യോത് കൗര്‍ അപകടം നടന്നതിനു തൊട്ടുപിന്നാലെ സ്ഥലത്തു നിന്നു പോയെന്നും വിമര്‍ശനമുണ്ട്. പ്രാദേശിക കോണ്‍ഗ്രസ് നേതാവായ നവ്‌ജ്യോത് കൗര്‍ സിദ്ദു ആഘോഷ പരിപാടികളില്‍ മുഖ്യാതിഥിയായി പങ്കെടുക്കാനെത്തിയതായിരുന്നു. എന്നാല്‍ സംഭവം നടന്നയുടനെ താന്‍ പോയതല്ലെന്നും പരിക്കേറ്റവര്‍ക്കൊപ്പം ആശുപത്രിയിലായിരുന്നെന്നും നവ്‌ജ്യോത് കൗര്‍ വ്യക്തമാക്കി'