ദസറ ചടങ്ങിനിടെ ട്രെയിന്‍ ആള്‍ക്കൂട്ടത്തിലേക്ക് പാഞ്ഞു കയറി അറുപതിലധികം പേരുടെ മരണത്തിന് കാരണമായ ദുരന്തത്തില്‍ തങ്ങള്‍ക്ക് ഉത്തരവാദിത്തമില്ലെന്ന് ഇന്ത്യന്‍ റെയില്‍വെ. പരിപാടി സംഘടിപ്പിച്ച സ്ഥലം റെയില്‍വെയുടെ പരിധിയില്‍പ്പെട്ടതല്ല. സംഘാടകര്‍ ചടങ്ങ് സംബന്ധിച്ച് ഒരറിയിപ്പും നല്‍കിയിട്ടില്ലെന്നും വടക്കന്‍ റെയില്‍വെ വക്താവ് ദീപക് കുമാര്‍ പ്രസ്താവനയിലൂടെ അറിയിച്ചു.

റെയില്‍വെയില്‍ നിന്ന് യാതൊരു തരത്തിലുള്ള അനുമതികളും ആര്‍ക്കും നല്‍കിയിട്ടില്ല. പരിപാടികരുടെ സംഘാടകരോ ഭരണാധികാരികളോ ഒരു വിവരവും തങ്ങളെ അറിയിക്കുകയും ചെയ്തിട്ടില്ല. അപകടം നടന്ന സമയം റെയില്‍വെ ലെവല്‍ക്രോസിങ് അടച്ചിട്ടുണ്ടായിരുന്നുവെന്നും അദ്ദേഹം വ്യക്തമാക്കി.അപകടം നടന്ന് നിമിഷങ്ങള്‍ക്കം ലോക്കോ പൈല്റ്റ് അമൃത്സര്‍ സ്‌റ്റേഷന്‍ മാസ്റ്ററെ വിവരങ്ങള്‍ അറിയിച്ചിട്ടുണ്ട്. ട്രാക്കില്‍ വന്‍ ജനക്കൂട്ടം ഉണ്ടായിരുന്നതായും ലോക്കോ പൈലറ്റ് അറിയിച്ചിട്ടുണ്ടെന്നും ഒരു മുതിര്‍ന്ന റെയില്‍വെ ഉദ്യോഗസ്ഥന്‍ പറഞ്ഞു.

അപകടത്തെ തുടര്‍ന്ന് ലോക്കോ പൈലറ്റിനെ പോലീസ് ചോദ്യം ചെയ്തിരുന്നു. വെള്ളിയാഴ്ച രാത്രി ഏഴര മണിയോടെയായിരുന്നു അപകടം. അമൃത്സറിലെ ജോടാ ഫാടകില്‍ റെയില്‍വെപ്പാളത്തില്‍ ദസറയുടെ ഭാഗമായുള്ള രാവണ്‍ ദഹന്‍ ചടങ്ങ് കണ്ടുകൊണ്ടിരിക്കുന്നവര്‍ക്കിടയിലേക്ക് ട്രെയിന്‍ പാഞ്ഞു കയറുകയായിരുന്നു.
റെയില്‍വെ ട്രാക്കിനോടുചേര്‍ന്നായിരുന്നു പരിപാടിയുടെ വേദി. രാവണന്റെ കോലം കത്തിക്കുന്നതിനിടെ പടക്കത്തിന്റെ ഒച്ച കാരണം ട്രെയിനിന്റെ ശബ്ദം ആളുകള്‍ കേട്ടിരുന്നില്ല.