കാറ്റ് കശക്കിയറിഞ്ഞ ഗജപതി ജില്ലയിലെ ആതങ്കപുര്‍ ഗ്രാമത്തില്‍ നിന്നും വീണ്ടും വേദനിപ്പിക്കുന്ന കാഴ്ചകള്‍. തിത്‌ലി ചുഴലിക്കാറ്റിനെത്തുടര്‍ന്നുണ്ടായ മണ്ണിടിച്ചിലില്‍ മരിച്ച ഏഴുവയസുകാരിയുടെ മൃതദേഹം പോസ്റ്റ്‌മോര്‍ട്ടത്തിനായി എത്തിക്കാന്‍ പിതാവിന് അത് ചുമലിലേറ്റി നടക്കേണ്ടിവന്നു. മൃതദേഹം ചാക്കിലാക്കി ചുമന്നാണ് എട്ടു കിലോമീറ്റര്‍ അകലെയുള്ള ആശുപത്രിയിലെത്തിച്ചത്. വാഹനം കിട്ടാത്തതിനാല്‍ മുകുന്ദ് ഡോറയാണു മകള്‍ ബബിതയുടെ മൃതദേഹം ചാക്കിലാക്കി ചുമന്ന് കെയിന്‍പുര്‍ ഗവ.ആശുപത്രിയിലെത്തിച്ചത്.

കനത്ത മഴയും കാറ്റും മൂലം മഹേന്ദ്രഗിരിയിലുണ്ടായ മണ്ണിടിച്ചിലിനും പ്രളയത്തിനും ശേഷം ഇക്കഴിഞ്ഞ പതിനൊന്നാം തീയതി വ്യഴാഴ്ച മുതല്‍ ബബിതയെ കാണാതാകുകയായിരുന്നു. പിന്നീട് അഴുക്കുചാലില്‍നിന്നു മൃതദേഹം 17-ാം തീയതി ബുധനാഴ്ച കണ്ടെത്തി. പെണ്‍കുട്ടി മരിച്ചതായി സര്‍ക്കാര്‍ അന്നു പ്രഖ്യാപിച്ചിരുന്നു. പോലീസ് എത്തി ഫോട്ടോയെടുത്തശേഷം മൃതദേഹം ആശുപത്രിയിലെത്തിക്കാന്‍ നിര്‍ദേശിക്കുകയായിരുന്നു.

ദരിദ്രനായ പിതാവിനു വാഹനം വാടകയ്‌ക്കെടുക്കാന്‍ നിവൃത്തിയില്ലായിരുന്നു. പോരാത്തതിനു പ്രളയത്തിലും മണ്ണിടിച്ചിലും റോഡുകള്‍ വ്യാപകമായി തകര്‍ന്നിരുന്നു. അതിനാല്‍, മൃതദേഹം ചുമക്കാന്‍ അദ്ദേഹം തീരുമാനിച്ചു. ഇതു വാര്‍ത്തയായതോടെ പോലീസ് തന്നെ ഇടയ്ക്ക് ഓട്ടോറിക്ഷ ക്രമീകരിച്ചാണു കുട്ടിയുടെ മൃതദേഹം ആശുപത്രിയിലെത്തിച്ചത്. സംഭവത്തെക്കുറിച്ച് അന്വേഷിക്കുമെന്നു കലക്ടര്‍ അനുപം ഷാ അറിയിച്ചു. മരിച്ചവരുടെ കുടുംബത്തിനു സര്‍ക്കാര്‍ പ്രഖ്യാപിച്ച 10 ലക്ഷം രൂപ കലക്ടര്‍ കൈമാറി. നാശനഷ്ടമുണ്ടായ സ്ഥലങ്ങള്‍ കേന്ദ്രമന്ത്രി ധര്‍മേന്ദ്ര പ്രധാന്‍ സഞ്ചരിച്ചു. കുട്ടിയുടെ മൃതദേഹം പിതാവ് ചുമക്കുന്ന കാഴ്ച വേദനയുളവാക്കിയെന്ന് അദ്ദേഹം പറഞ്ഞു.

ഈ ദൃശ്യം ചാനലുകള്‍ റിപ്പോര്‍ട്ടു ചെയ്തതോടെ 2016-ല്‍ നടന്ന സമാനമായ സംഭവം ജനം ഓര്‍ത്തു. അന്ന് ഭവാനിപട്‌ന ഗവണ്‍മെന്റ് ആശുപത്രി അധികൃതര്‍ ആംബുലന്‍സ് വിട്ടുകൊടുക്കാത്തതിനാല്‍ 60 കിലോമീറ്റര്‍ അകലെയുള്ള നാട്ടിലേക്ക് ഭര്‍ത്താവ് ദാനാ മജ്ഗി 12 വയസുളള മകളുമൊത്ത് ഭാര്യയുടെ മുതദേഹം ചുമന്നു നീങ്ങിയിരുന്നു. പത്തുകിലോമീറ്റര്‍ സഞ്ചരിച്ചപ്പോള്‍ പ്രാദേശികചാനല്‍ റിപ്പോര്‍ട്ടറുടെ കണ്ണില്‍പ്പെട്ടു. അദ്ദേഹം ജില്ലാഭരണകൂടവുമായി ബന്ധപ്പെട്ടതോടെ ആംബുലന്‍സ് ലഭ്യമാക്കുകയായിരുന്നു. മനഃസാക്ഷിയെ നടുക്കിയ ആ സംഭവത്തിന്റെ തനിയാവര്‍ത്തനമാണ് ഒഡിഷയിലുണ്ടായത്.