ഛത്തീസ്ഗഡിലെ ബിജെപി തരംഗം പൂര്‍ണ്ണമായും തകര്‍ത്ത് കോണ്‍ഗ്രസ് അധികാരത്തിലേയ്ക്ക്. ഭരണത്തിലിരുന്ന ബിജെപിയെ അക്ഷരാര്‍ത്ഥത്തില്‍ ഇല്ലാതാക്കിയാണ് കോണ്‍ഗ്രസിന്റെ മുന്നേറ്റം. 90 സീറ്റുകളില്‍ 57ഉം സ്വന്തമാക്കി വ്യക്തമായ ഭൂരിപക്ഷം നേടിയപ്പോള്‍ വെറും 24 സീറ്റുകളിലേയ്ക്ക് ബിജെപി വീണു. 2013ല്‍ 49 സീറ്റ് നേടിയാണ് ബിജെപി അധികാരത്തിലെത്തിയത്. അവിടെ നിന്നാണ് അഞ്ചു വര്‍ഷത്തെ ഭരണത്തിനിപ്പുറം പരാജയത്തിലേയ്ക്ക് കൂപ്പു കുത്തിയത്.

നാലാം വട്ടവും അധികാരത്തിലേറാമെന്ന ബിജെപിയുടെ മോഹങ്ങള്‍ക്കു ശക്തമായ തിരിച്ചടിയാണു ഛത്തീസ്ഗഡിലെ ജനങ്ങള്‍ നല്‍കിയത്. മുഖ്യമന്ത്രിയായ ബിജെപിയുടെ രമണ്‍ സിങ് ഇത്തവണ പിന്നിലായതും ദയനീയ തോല്‍വിയുടെ ആക്കം കൂട്ടി. മൂന്നു തവണ മുഖ്യമന്ത്രിയായ വ്യക്തിയാണ് രമണ്‍സിങ്. രാജ്‌നന്ദഗാവില്‍ മുന്‍ പ്രധാനമന്ത്രി എ.ബി. വാജ്‌പേയിയുടെ അനന്തരവള്‍ കരുണ ശുക്ലയാണ് രമണ്‍ സിങ്ങിനെക്കാള്‍ ലീഡ് ചെയ്യുന്നത്. നേരത്തേ ബിജെപിയില്‍ ഒതുക്കപ്പെട്ടപ്പോഴാണ് കരുണ ശുക്ല പാര്‍ട്ടി വിട്ട് കോണ്‍ഗ്രസില്‍ ചേര്‍ന്നത്.

ആകെ 90 സീറ്റുള്ള ഛത്തീസ്ഗഡില്‍ 2003 മുതല്‍ വ്യക്തമായ ഭൂരിപക്ഷമാണ് ബിജെപിക്ക് ഉണ്ടായിരുന്നത്. 2003ല്‍ 50 സീറ്റ് ബിജെപി നേടിയപ്പോള്‍ കോണ്‍ഗ്രസിനുണ്ടായിരുന്നത് 37 സീറ്റ് മാത്രമാണ്. 2008 ല്‍ ബിജെപി 50 സീറ്റ് തന്നെ നേടി. കോണ്‍ഗ്രസ് ഒരു സീറ്റ് കൂടി നേടി 38 സീറ്റുകള്‍ ഉറപ്പിച്ചു. 2013 ലെ തിരഞ്ഞെടുപ്പില്‍ ബിജെപി ഒരു സീറ്റ് കുറഞ്ഞ് 49 സീറ്റ് നേടിയപ്പോള്‍ കോണ്‍ഗ്രസിന്റേത് 39 സീറ്റുകളായിരുന്നു. ആ സാഹചര്യത്തിലാണ് ഇന്ന് 50 സീറ്റിനു മുകളില്‍ ലീഡുമായി കോണ്‍ഗ്രസ് മുന്നേറുന്നത്. 24 സീറ്റേ ബിജെപിക്ക് ലഭിച്ചുള്ളൂ.