മധ്യപ്രദേശ്, രാജസ്ഥാന്‍, ഛത്തീസ്ഗഡ് എന്നീ മൂന്നു സംസ്ഥാനങ്ങളില്‍ ബിജെപി അധികാരത്തിലെത്തുമെന്ന് ഉറപ്പിച്ചു പറഞ്ഞ് മാധ്യമങ്ങളെ കണ്ട അമിത്ഷാ ഈ മൂന്നിടത്തെയും വിജയത്തോടെ നരേന്ദ്രമോദിയുടെ ഔന്നത്യം ഉയരുമെന്നും, 2019 ല്‍ മോദി അതിശക്തനാകുമെന്നും പറഞ്ഞിരുന്നു.

ഇത് അമിത ആത്മവിശ്വാസത്തിനും ജനാധിപത്യത്തെ തന്ത്രങ്ങള്‍ കൊണ്ട് നേരിടാമെന്ന ധാര്‍ഷ്ട്യത്തിനുമേറ്റ തിരിച്ചടിയാണ്. തെരഞ്ഞെടുപ്പിലെ ഈ തോല്‍വിയിലൂടെ മോദി 2019ല്‍ കൂടുതല്‍ അശക്തനാവുകയാണ്. ഒപ്പം അമിത്ഷായുടെ മൂല്യവും തകര്‍ന്നു.

രാജസ്ഥാനിലെയും ഛത്തീസ്ഗഢിലെയും കോണ്‍ഗ്രസിന്റെ വിജയം അമ്പരിപ്പിക്കുന്നതാണ്.

മധ്യപ്രദേശില്‍ ശിവരാജ്‌സിങ് ചൗഹാന്റെ പതിനഞ്ചു വര്‍ഷത്തെ ഭരണത്തുടര്‍ച്ചയ്ക്കാണ് ഭീഷണി. ഒപ്പം തെലങ്കാനയില്‍ ബിജെപിക്ക് നിലം തൊടാനും കഴിഞ്ഞില്ല.

ഈ അഞ്ചു സംസ്ഥാനങ്ങളിലും തെരഞ്ഞെടുപ്പുകള്‍ നേരിട്ടു നയിച്ചത് നരേന്ദ്രമോദിയായിരുന്നു. ഒപ്പം അമിത്ഷായുടെ ചാണക്യ തന്ത്രങ്ങളും. ഇവിടെ പരാജയപ്പെടുന്നത് മോദി മുന്നോട്ടുവച്ച നയങ്ങളും, പരിപാടികളുമാണ്. പച്ചയ്ക്ക് പറഞ്ഞാല്‍ ജനങ്ങള്‍ മടുത്തു. നോട്ടു നിരോധനത്തില്‍ തുടങ്ങിയതാണ് ഈ ഭരണ വിരുദ്ധ വികാരം. മൃദുഹിന്ദുത്വ സമീപനവും, രാമക്ഷേത്ര നിര്‍മ്മാണ നീക്കവുമൊക്കെ ഒരു വശത്തു നടക്കുമ്പോള്‍ മറുവശത്ത് മതേതര ഇന്ത്യ ഒരുമിക്കുന്നുണ്ടായിരുന്നു. അവരുടെ ചിന്തകള്‍ക്ക് അഗ്നിയായിരുന്നു. അതിന്റെ ആളിക്കത്തലില്‍ മോദി യുഗം എരിഞ്ഞടങ്ങുന്നു.

തെരഞ്ഞെടുപ്പിന് തൊട്ടുമുമ്പ് മധ്യപ്രദേശിന്റെ തലസ്ഥാനത്തേക്ക് ഒഴുകിയെത്തിയ കര്‍ഷക മാര്‍ച്ചില്‍ നിന്ന് ബിജെപി തിരിച്ചറിവു നേടിയില്ല. ഗ്രാമങ്ങളിലെ ഇന്ത്യയെ കാണാന്‍ മോദിക്കു കഴിഞ്ഞില്ല. ഭൂഖണ്ഡങ്ങള്‍ താണ്ടി വിദേശവാസം നടത്തുന്ന മോദിക്ക് ഇന്ത്യയെ ഹൃദയത്തോടടുപ്പിക്കാന്‍ കഴിഞ്ഞില്ല. ഇവിടെ തകര്‍ന്നു വീഴുന്നത് പണത്തിലും അഹങ്കാരത്തിലും കെട്ടിപ്പൊക്കിയ ചീട്ടു കൊട്ടാരമാണ്.

ഇനി ഈ തോല്‍വികളുടെ ഉത്തരവാദിത്വം മോദി സ്വയമേറ്റെടുക്കണം. അഞ്ചിടത്തും അടി തെറ്റിയ ബിജെപിയുടെ പരാജയം പൂര്‍ണ്ണമായും മോദി വിരുദ്ധതയാണ്.

ഇനി തകര്‍ച്ചയുടെ നാളുകളാണ് മോദിക്കും ബിജെപിക്കും.