നോട്ടു നിരോധനം ദോഷകരമായി ബാധിച്ച കര്ഷകര് ബിജെപിയെ ചുരുട്ടിക്കൂട്ടി
പണികൊടുത്തത് കര്ഷകര്. വോട്ടര്മാരില് എഴുപതു ശതമാനം വരുന്ന കര്ഷകരെ അവഗണിച്ചതിന് കണ്ണീരിന്റെ മറുപടി. മോദി ഭരണം കോര്പറേറ്റുകളുടേതായിരുന്നു.അംബാനിയും അദാനിയുമൊക്കെയായിരുന്നു മുഖ്യ പ്രജകള്.
മധ്യപ്രദേശിലെ മന്ദ്സോറില് കര്ഷകപ്രക്ഷോഭത്തിനുനേരെ 2017 ജൂണില് പൊലീസ് നടത്തിയ വെടിവയ്പില് ആറുപേര്ക്കാണ് ജീവന് നഷ്ടപ്പെട്ടത്. ശിവ്രാജ്സിങ് ചൗഹാന് സര്ക്കാരിന്റെ അടിത്തറയിളക്കിയ സംഭവമായി ഇത്.
രാജസ്ഥാനും മധ്യപ്രദേശും കഴിഞ്ഞ അഞ്ചുവര്ഷം ഏറ്റവും ശക്തമായ കര്ഷകസമരം നടന്ന സംസ്ഥാനങ്ങളാണ് . രണ്ടിടത്തും മുഖ്യപ്രതിപക്ഷ കക്ഷിയായ കോണ്ഗ്രസ് പൊതുവെ നിഷ്ക്രിയമായിരുന്നിട്ടും, കര്ഷകരെ കടക്കെണിയില്നിന്ന് മോചിപ്പിക്കണമെന്നാവശ്യപ്പെട്ടും വിളകളുടെ വിലയിടിവില് പ്രതിഷേധിച്ചും കര്ഷകസംഘടനകളാണ് പോരാട്ടം നടത്തിയത്.
സ്വാമിനാഥന് കമീഷന് ശുപാര്ശപ്രകാരം ഉല്പാദനച്ചെലവും അതിന്റെ 50 ശതമാനവും കൂട്ടിച്ചേര്ത്തുള്ള വിലയില് വിളകള് സംഭരിക്കുമെന്ന് 2014ലെ ലോക്സഭാ തെരഞ്ഞെടുപ്പുവേളയില് ബിജെപി വാഗ്ദാനംചെയ്തിരുന്നു. കാര്ഷിക കടങ്ങള് എഴുതിത്തള്ളുമെന്നും മോഡി ഉറപ്പുനല്കി. അധികാരത്തില്വന്നശേഷം ഈ ഉറപ്പുകളെല്ലാം ലംഘിച്ചു. കൃഷിമന്ത്രാലയം നോക്കുകുത്തിയായി. പ്രധാനമന്ത്രിയുടെ വിള ഇന്ഷുറന്സ് പദ്ധതിയുടെ പേരില് സ്വകാര്യകമ്പനികളുടെ കൊള്ളയാണ് നടന്നത്.
നോട്ടുനിരോധനം ഏറ്റവും ദോഷകരമായി ബാധിച്ചത് കര്ഷകരെയാണ്. നല്ല മഴയും മികച്ച ഖാരിഫ് വിളവും ലഭിച്ച കാലത്തായിരുന്നു മോഡിയുടെ കറന്സി പിന്വലിക്കല്. ഇതോടെ കാര്ഷികോല്പ്പന്നങ്ങളുടെ വില ഗണ്യമായി ഇടിഞ്ഞു. മധ്യപ്രദേശില് സവാള കിലോഗ്രാമിന് ഒരു രൂപയിലെത്തി. വെളുത്തുള്ളിവിലയും ഇടിഞ്ഞു. മധ്യപ്രദേശിലെ മാള്വ കേന്ദ്രീകരിച്ചുള്ള സോയാബീന് കൃഷി നേരിടുന്ന തകര്ച്ചയും ബിജെപിയെ പ്രതികൂലമായി ബാധിച്ചു. കടക്കെണിയില് പെട്ട കര്ഷകരെ മോദി തിരിഞ്ഞുനോക്കിയില്ല.
2017ലെ കണക്കുപ്രകാരം രാജ്യത്ത് ഒരുകോടി ഹെക്ടറില് സോയാബീന് കൃഷിചെയ്യുന്നതില് പകുതിഭാഗവും മാള്വ മേഖലയിലാണ്. സോയാബീന് ക്വിന്റലിനു അഞ്ച് വര്ഷം മുമ്പ് 3667 രൂപ വരെ ലഭിച്ചിരുന്നു. എന്നാല്, 2015–16ല് 1,900 രൂപ വരെയായി. സര്ക്കാര് താങ്ങുവില പ്രഖ്യാപിച്ചിട്ടും ഇക്കൊല്ലവും വിപണിയില് വില ഉയര്ന്നില്ല. താങ്ങുവിലയും വിപണിവിലയും തമ്മിലുള്ള വ്യത്യാസം കര്ഷകര്ക്ക് സബ്സിഡിയായി നല്കുന്ന പദ്ധതിയുടെ പ്രയോജനവും വന്കിടക്കാര്ക്ക് മാത്രമാണ് ലഭിക്കുന്നത്. കാര്ഷികഗവേഷണ ഫണ്ടുകള് സര്ക്കാര് വെട്ടിക്കുറച്ചതും തിരിച്ചടിയായി. ഗോവധ നിരോധനവും ബീഫിന്റെ പേരിലുള്ള കൊലപാതകങ്ങളും ഏറെ പരിഭ്രാന്തരാക്കിയത് കര്ഷകരെ തന്നെ.
ഛത്തീസ്ഗഢില് നെല്ലിന്റെ വിലയിടിവും കാര്ഷികപ്രതിസന്ധിയും മുഖ്യവിഷയമായിരുന്നു. നെല്ല് സംഭരണത്തിലെ അഴിമതി കര്ഷകരെ ശരിക്കും ബുദ്ധിമുട്ടിലാക്കി. രമണ്സിങ് സര്ക്കാരിന്റെ കാലത്ത് പൊതുവിതരണമേഖലയില് 36,000 കോടി രൂപയുടെ അഴിമതി നടന്നു. ഒരു ക്വിന്റല് അരിക്ക് 1,550 രൂപ മാത്രമാണ് കര്ഷകര്ക്ക് ലഭിക്കുന്നത്. ഉല്പ്പാദനബോണസ് യഥാസമയം നല്കുന്നുമില്ല. ഇതിനൊക്കെ കര്ഷകര് നല്കിയ മറുപടിയാണ് ജനവിധി. അഴിമതികളുടെ കര പുരണ്ട രമണ്സിംഗ് സര്ക്കാരിനെതിരെ ശക്തമായ കര്ഷക വികാരമാണ് ഉണര്ന്നത്.
https://www.facebook.com/Malayalivartha
