മരണപ്പെട്ടാലും ബലാത്സംഗ ഇരകളുടെ പേര് വെളിപ്പെടുത്തരുതെന്ന് സുപ്രീം കോടതി വിധി. 'മരിച്ചവര്‍ക്കും അഭിമാനമുണ്ട്' എന്ന പരാമര്‍ശത്തോടെയാണ് പത്രത്തിലും ടെലിവിഷനിലും സോഷ്യല്‍ മീഡിയയിലും ഇരകളുടെ പേര് വെളിപ്പെടുത്തരുതെന്ന് കോടതി പറഞ്ഞത്. ബലാത്സംഗ കേസുകളില്‍ ഇരകളുടെ വ്യക്തിത്വം പുറത്തു വിടുന്നതുമായി ബന്ധപ്പെട്ട ഹര്‍ജി പരിഗണിക്കുകയായിരുന്നു കോടതി.

കുട്ടികള്‍ക്കെതിരായ ലൈംഗികാതിക്രമങ്ങള്‍ സെന്‍സേഷണലായി റിപ്പോര്‍ട്ട് ചെയ്യരുത്. ഇത് ടെലിവിഷന്റെ റേറ്റിങ് കൂട്ടാനെ ഉപകരിക്കൂ. അല്ലാതെ മാധ്യമത്തിന്റെ വിശ്വാസ്യത ഉയര്‍ത്തില്ലെന്നും കോടതി പറഞ്ഞു.

ജസ്റ്റിസുമാരായ മദന്‍ ബി ലോകൂര്‍, ദീപക് ഗുപ്ത എന്നിവരാണ് വിധി പറഞ്ഞത്. വിധി പ്രകാരം ജില്ലാ സെഷന്‍സ് ജഡ്്ജിന് മാത്രമേ ബലാത്സംഗ ഇരയുടെ പേര് പുറത്തു വിടണോ എന്ന കാര്യത്തില്‍ തീരുമാനമെടുക്കാനാവൂ. മരിച്ചയാളുടെ രക്ഷിതാവിന്റെയോ ഏറ്റവും അടുത്ത കുടുംബാംഗത്തിന്റെയോ അനുമതിയോടെ പോലും ഇരയുടെ പേര് പറയരുത്. എന്നാല്‍ 18 വയസ്സ് പൂര്‍ത്തിയായ ബലാത്സംഗ ഇര തന്റെ പേര് പറയാന്‍ മറ്റൊരാളെ നിയോഗിക്കുന്ന പക്ഷം അത് ചെയ്യാന്‍ അനുമതിയുണ്ട്.

മാധ്യമങ്ങള്‍ക്ക് കുറ്റകൃത്യങ്ങള്‍ റിപ്പോര്‍ട്ട് ചെയ്യാനുള്ള എല്ലാ അവകാശവും ഉണ്ട്. എന്നാല്‍ കുട്ടികള്‍ക്കെതിരായ ലൈംഗികാതിക്രമങ്ങളില്‍ ഇരയുടെ വ്യക്തിത്വം വെളിപ്പെടുത്താത്ത വിധം അത് ചെയ്യണം. ആക്രമിക്കപ്പെട്ടതിനെക്കുറിച്ച് ഇരയോട് ചോദിക്കാന്‍ പാടില്ല. എന്താണ് നടന്നതെന്ന് വീണ്ടും വീണ്ടും ചോദിക്കുമ്പോള്‍ അവര്‍ അതിക്രമത്തിലൂടെ വീണ്ടും വീണ്ടും കടന്നു പോവുകയാണ്. ബലാത്സംഗം, പോക്‌സോ കേസ് എന്നിവയുടെ പ്രാഥമികാന്വേഷണ റിപ്പോര്‍ട്ട് പൊതുമധ്യത്തില്‍ പരസ്യപ്പെടുത്തരുതെന്നും കോടതി പറഞ്ഞു.