ലോകം കീഴടക്കാനിറങ്ങിയ മോദിയെ ഇന്ത്യ തുരത്തി; അഞ്ചു സംസ്ഥാനങ്ങളിലെ തെരഞ്ഞെടുപ്പില് ഒരിടത്തു പോലും വിജയിക്കാനാകാതെ തോറ്റു തൊപ്പിയിട്ടു; മോദിയുടെ ഭരണത്തകര്ച്ചയില് രാഹുല് ഉദിച്ചുയരുന്നു
ലക്ഷങ്ങളുടെ സ്യൂട്ടില് വെട്ടിത്തിളങ്ങിയ മുഖകാന്തി. യോഗ മുതല് അന്പത്തിയാറ് ഇഞ്ച് നെഞ്ചളവ് വരെ വെട്ടിയൊതുക്കി വടിവൊത്ത മോദിയെ നാട്ടുകാര് തുരത്തി. രണ്ടു തവണ ഇന്ത്യയുടെ പ്രധാന മന്ത്രിയായിരുന്ന മന്മോഹന്സിംഗിനെ പാവയെന്ന് വിളിച്ച് ബിജെപി ആക്ഷേപിച്ചു. സീനിയര് നേതാക്കളായ എല്.കെ അദ്വാനിയെയും, സുഷമാ സ്വരാജിനെയുമൊക്കെ വെട്ടിയെറിഞ്ഞ് ഗുജറാത്തില് നിന്ന് ദില്ലിയിലെത്തിയ മോദി കളം നിറഞ്ഞാടി. കണ്ണു നിറഞ്ഞ് കടന്നു പോയ അദ്വാനിയുടെ മുഖം അന്ന് ഇന്ത്യയുടെ ദുഖമായി.
പിന്നീട് ഇന്ത്യ കണ്ടത് മോദിയുടെ വെടിക്കെട്ടായിരുന്നു. മിക്ക ദിവസങ്ങളിലും വിദേശ രാജ്യങ്ങളിലേക്ക് പറന്നു. രാജ്യത്തലവന്മാരുടെ പ്രിയപ്പെട്ടവനായി. ഒരിക്കല് ശത്രുരാജ്യമായിരുന്ന പാകിസ്ഥാന്റെ മണ്ണില് പറന്നിറങ്ങി നവാസ് ഷെരീഫിന്റെയടുക്കലെത്തി ലോകത്തെ ഞെട്ടിച്ചു. ട്രംപിന്റെ പ്രിയപ്പെട്ടവനായി. ഇന്ത്യയിലെ തീവ്രവാദത്തെ പ്രോത്സാഹിപ്പിക്കുന്ന കാലിസ്ഥാന് നേതാക്കളുടെ സുഹൃത്തായ കാനഡാ പ്രധാനമന്ത്രി ജസ്റ്റിസ് ട്രൂഡോയെ അവഗണിച്ചും ശ്രദ്ധയാകര്ഷിച്ചു. മോദി ഇഫക്ടില് ഇന്ത്യയെ മോഡിഫൈ ചെയ്തു. ഇതായിരുന്നു മോദി ഇന്ത്യ കണ്ട മോദി.
പോരാട്ടങ്ങള്ക്ക് കൈക്കരുത്താകാന് അമിത്ഷായെന്ന ഉറ്റ സുഹൃത്തിനെ ഒപ്പം കൂട്ടി. നോട്ടു നിരോധനം പോലുള്ള ഇന്ത്യയെ വിറപ്പിച്ച പരിഷ്ക്കാരങ്ങള്. പതറാത്ത മുഖമായിരുന്നു മോദിയുടേത്, ധാര്ഷ്ട്യ്ത്തിന്റേതും. എതിരു നിന്നവരെ അരിഞ്ഞ് വീഴ്ത്തി മോദി കസറി. സിബിഐയും, എന്ഫോഴ്സ്മെന്റുമൊക്കെ രാഷ്ട്രീയ ചട്ടുകമായി. സംസ്ഥാനങ്ങളൊന്നാകെ തെരഞ്ഞെടുപ്പുകളില് പിടിച്ചടക്കി മോദിയുടെ ജൈത്രയാത്ര തുടര്ന്നു. ഇന്ത്യയുടെ എണ്പതു ശതമാനവും കാവി പുതപ്പിച്ചു. പക്ഷേ ഭൂരിപക്ഷ വികാരം എതിരായിരുന്നു. കര്ഷക നൊമ്പരങ്ങളും ഗ്രാമങ്ങളിലെ പാവപ്പെട്ടവരെയും കാണാന് സാന്ത്വനിപ്പിക്കാന് മോദിയുടെ ഭരണത്തിനായില്ല. സ്വച്ഛ് ഭാരത് തുടങ്ങി കക്കൂസ് വിപ്ലവം വരെ ട്രോളുകളില് പരിഹാസമായി. ഇന്ത്യയിലിരിക്കാന് നേരമില്ലാത്തവനെന്ന് സാമൂഹിക മാധ്യമങ്ങള് പരിഹസിച്ചു. ഒടുവില് ഗത്യന്തരമില്ലാതെ ഹിന്ദി മേഖലയിലെ കര്ഷകര് ഒരുമിച്ചു സംഘടിതമായി സമരത്തിലേക്കു കടന്നു.
അംബാനിക്കും, അദാനിക്കും കോര്പ്പറേറ്റുകള്ക്കും കുടപിടിച്ച ഭരണത്തിന് ജനമെതിരായി. മോദി ഒറ്റപ്പെട്ടു. അഞ്ചു സംസ്ഥാനങ്ങളിലെ തെരഞ്ഞെടുപ്പില് ഒരിടത്തു പോലും വിജയിക്കാനാകാതെ തോറ്റു തൊപ്പിയിട്ടു. ശരം പോലെ പോയ വിജയ യാത്ര അതിനേക്കാള് മിന്നല് വേഗതയില് താഴേക്ക്. മോദിയുടെ വീഴ്ചയില് അമിത്ഷായും യോഗി ആദിത്യനാഥുമൊക്കെ കൂട്ടിനുണ്ടെന്ന് മാത്രം.
ഇനി പതനത്തിന്റെ നാളുകളാണ്. ഇന്നലെകളുടെ ബാക്കി പത്രം പ്രതിമ രാഷ്ട്രീയവും ജാതി രാഷ്ട്രീയവുമാണ് അത് കൂടുതല് ശക്തിയായ മോദിയെന്ന നേതാവിനെ ജനമനസ്സുകളില് നിന്ന് പിന്നോട്ടു വലിക്കും. അടുത്ത പാര്ലമെന്റിലും ഇതാവര്ത്തിക്കും എന്നുറപ്പാണ്. മോദിയുടെ ഭരണത്തകര്ച്ചയില് രാഹുല് ഉദിച്ചുയരുന്നു. ലോകം കീഴടക്കാനിറങ്ങിയ മോദിയെ ജനം തുരത്തുന്ന കാഴ്ച.
https://www.facebook.com/Malayalivartha