രാജസ്ഥാനില്‍ കോണ്‍ഗ്രസ് നേതാവ് അശോക് ഗെലോട്ടിനെ മുഖ്യമന്ത്രിയായി പ്രഖ്യാപിച്ചു. സച്ചിന്‍പൈലറ്റ് ഉപമുഖ്യമന്ത്രിയാകും. അശോക് ഗെലോട്ടും പി.സി.സി അദ്ധ്യക്ഷന്‍ സച്ചിന്‍ പൈലറ്റുമായി ഇന്ന് വീണ്ടും കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധിയുമായി നടത്തിയ ചര്‍ച്ചയിലാണ് അന്തിമ തീരുമാനമായത്. രാജസ്ഥാന്‍ പി.സി.സി അദ്ധ്യക്ഷ സ്ഥാനത്ത് സച്ചിന്‍ പൈലറ്റ് തുടരും.

ഇന്നലെ നടന്ന നിയമസഭാ കക്ഷി യോഗത്തില്‍ സ്വതന്ത്ര എം.എല്‍.എമാര്‍ സച്ചിന്‍ പൈലറ്റിനെ മുഖ്യമന്ത്രിയാക്കണമെന്ന് ആവശ്യപ്പെട്ടിരുന്നു. പി.സി.സി അദ്ധ്യക്ഷന്‍ എന്ന നിലയില്‍ പാര്‍ട്ടി ശക്തിപ്പെടുത്തിയതിന്റെ അംഗീകാരമായി മുഖ്യമന്ത്രി പദം നല്‍കണമെന്ന് സച്ചിന്റെ അനുയായികളും വാദിച്ചിരുന്നു. എന്നാല്‍, ഭൂരിപക്ഷത്തിന്റെ വക്കില്‍ നില്‍ക്കുന്ന സാഹചര്യത്തില്‍ പരിചയ സമ്പന്നനായ മുന്‍ മുഖ്യമന്ത്രി അശോക് ഗെലോട്ടിനെ പരിഗണിക്കണമെന്ന വാദവും ഉണ്ടായിരുന്നു. സച്ചിന്‍ പൈലറ്റിന് ആഭ്യന്തരം, ധനകാര്യം തുടങ്ങിയ സുപ്രധാന ചുമതലകള്‍ കൂടി നല്‍കിയേക്കുമെന്നും റിപ്പോര്‍ട്ടുകളുണ്ട്. മുഖ്യമന്ത്രി സ്ഥാനത്തിനു വേണ്ടി 41കാരനായ സച്ചിന്‍ പൈലറ്റ് ശക്തമായ നീക്കങ്ങളാണ് നടത്തിയിരുന്നത്. തെരഞ്ഞെടുപ്പിനും മാസങ്ങള്‍ക്കു മുമ്പു തന്നെ ഇരുവരും തമ്മിലുള്ള സംഘര്‍ഷം ശക്തമായിരുന്നു. പ്രായവും പരിചയസമ്പത്തും മുന്‍നിര്‍ത്തിയാണ് ഗെലോട്ട് നീക്കങ്ങള്‍ നടത്തിയത്. രാഹുല്‍ ഗാന്ധിക്ക് യുവാക്കളോടുള്ള അനുഭാവം തനിക്ക് ഗുണം ചെയ്യുമെന്ന് സച്ചിന്‍ പൈലറ്റും കണക്കു കൂട്ടി. ഓരോരുത്തര്‍ക്കും തങ്ങള്‍ക്കുള്ള എംഎല്‍എമാരുടെ പിന്തുണ ചൂണ്ടിക്കാട്ടി സമ്മര്‍ദ്ദം തുടങ്ങിയതോടെ കാര്യങ്ങള്‍ വഷളാകുന്ന നിലയെത്തിയിരുന്നു.

മുതിര്‍ന്ന കോണ്‍ഗ്രസ്സ് നേതാക്കളില്‍ രാഹുലിന് ഏറെ അടുപ്പമുള്ളയാള്‍ കൂടിയാണ് ഗെലോട്ട്. നേരത്തെ രണ്ടുതവണ രാജസ്ഥാന്‍ മുഖ്യമന്ത്രിയായിട്ടുണ്ട്. ഗാന്ധി കുടുംബവുമായുള്ള ഉറച്ച ബന്ധമാണ് ഗെലോട്ടിന് ഗുണം ചെയ്തതെന്ന് കരുതുന്നവരുണ്ട്. ഗെലോട്ടിന് ആദ്യമായി ദേശീയരാഷ്ട്രീയത്തില്‍ ഉറച്ചൊരു ഇരിപ്പിടം നല്‍കിയത് രാഹുല്‍ ഗാന്ധിയുടെ പിതാവായ രാജീവ് ഗാന്ധിയാണ്. ഇന്ദിരാഗാന്ധിയുടെ പ്രീതി പിടിച്ചു പറ്റിയ ഗെലോട്ട് 1980ലെ മന്ത്രിസഭയില്‍ ടൂറിസം സിവില്‍ ഏവിയേഷന്‍ സഹമന്ത്രിയായിരുന്നു. ഇന്ദിരയുടെ മരണശേഷം രാജീവ് ഗാന്ധി പിന്തുടര്‍ന്നെത്തിയപ്പോഴും ഗെലോട്ട് ഗാന്ധി കുടുംബവുമായുള്ള ബന്ധം ഊഷ്മളമായി നിലനിര്‍ത്തി. യുവാവായ ഗെലോട്ടിനെ മന്ത്രിസഭയില്‍ നിലനിര്‍ത്തി.

'യുവാക്കള്‍ ക്യൂ പാലിക്കണ'മെന്ന അശോക് ഗെലോട്ടിന്റെ പ്രസ്താവന വന്നത് ഈ മാര്‍ച്ച് മാസത്തിലാണ്. 66കാരനായ തന്നെ മറികടന്ന് 40കാരനായ സച്ചിന്‍ പൈലറ്റിന് മുഖ്യമന്ത്രിയാകാന്‍ കഴിയില്ലെന്ന ശക്തമായ സൂചനയാണ് അന്നദ്ദേഹം നല്‍കിയത്. വരി മുറിക്കാന്‍ ശ്രമിക്കുന്ന യുവാക്കള്‍ അവരുട!!െ രാഷ്ട്രീയഭാവിക്ക് അകാല അന്ത്യം പോലും വരാവുന്ന തരത്തിലുള്ള റിസ്‌ക് ഏറ്റെടുക്കുകയാണെന്നും ഗെലോട്ട് പറയുകയുണ്ടായി.