മോഡി സര്‍ക്കാര്‍ അധികാരത്തില്‍ വന്നതിനുശേഷം പരസ്യത്തിനു വേണ്ടി മാത്രം ചിലവഴിച്ചത് 5,200 കോടിയിലേറെ രൂപ. പ്രിന്റ് ഇലക്‌ട്രോണിക് മാധ്യമങ്ങളിലൂടെ പരസ്യം നല്‍കുന്നതിനായിട്ടാണ് നരേന്ദ്ര മോഡി സര്‍ക്കാര്‍ 2014-15 മുതല്‍ ഇത്രയും തുക ചെലവഴിച്ചത്. ലോക്‌സഭയിലെ ചോദ്യത്തിന് മറുപടിയായി കേന്ദ്ര വാര്‍ത്താ വിതരണ പ്രക്ഷേപണ വകുപ്പ് മന്ത്രി രാജ്‌വര്‍ധന്‍ സിങ് റാത്തോഡാണ് ഇക്കാര്യം അറിയിച്ചത്.

2015 മാര്‍ച്ചില്‍ പ്രധാനമന്ത്രിയുടെ പ്രതിമാസ റേഡിയോ പ്രസംഗമായ 'മാന്‍ കി ബാത്തിന്റെ്' പത്ര പരസ്യം നല്‍കാനായി കേന്ദ്ര സര്‍ക്കാര്‍ ചെലവിട്ടത് 8.5 കോടി രൂപയാണെന്നാണ് കണക്ക്. ഗ്രേറ്റര്‍ നോയിഡ കേന്ദ്രമായി പ്രവര്‍ത്തിക്കുന്ന സാമൂഹ്യപ്രവര്‍ത്തകന്‍ രാംവീര്‍ തന്‍വാറാണ് വിവരാവകാശ നിയമമനുസരിച്ച് അപേക്ഷ നല്‍കിയത്.

2014-15 കാലത്ത് 979.78 കോടി രൂപയും 2015-16 കാലത്ത് 1,160 കോടി രൂപയും 2016-17 കാലത്ത് 1,264.26 കോടി രൂപയും 2017-18 കാലത്ത് 1,313.57 കോടി രൂപയും പരസ്യ ആവശ്യങ്ങള്‍ക്കായി സര്‍ക്കാര്‍ ചെലവഴിച്ചു. 2018-19 കാലത്ത് ഡിസംബര്‍ ഏഴു വരെയുള്ള പരസ്യ ഇനത്തിലുള്ള ചെലവ് 527.96 കോടി രൂപയാണ്.

സര്‍ക്കാരിന്റെ പരസ്യങ്ങള്‍ക്കായുള്ള ആകെ ചെലവ് 5,245.73 കോടി രൂപ മാത്രം. ഇതില്‍ 2,282 കോടി രൂപയും സര്‍ക്കാര്‍ ചെലവഴിച്ചത് അച്ചടി മാധ്യമങ്ങള്‍ വഴിയുള്ള പരസ്യങ്ങള്‍ക്കാണ്. 2,312.59 കോടി രൂപ ദൃശ്യ ശ്രാവ്യ മാധ്യമങ്ങള്‍ക്കായും ചെലവഴിച്ചു.