വെസ്റ്റ് ഡല്‍ഹിയിലെ ഖയാലാ ഏരിയയില്‍ ബുധനാഴ്ച പട്ടാപ്പകല്‍ ദമ്പതികളെ അയല്‍ക്കാരന്‍ കുത്തികൊലപ്പെടുത്തി. വീരു(41), ഭാര്യ സുനിത(35) എന്നിവരെയാണ് അയല്‍വാസിയായ മുഹമ്മദ് ആസാദ് കുത്തികൊലപ്പെടുത്തിയത്. ഇവരുടെ മകന്‍ അക്ഷയ്ക്കും(18) കുത്തേറ്റു. ഗുരുതരമായി പരിക്കേറ്റ അക്ഷയ് ചികിത്സയിലാണ്. അയല്‍ക്കാരെ രക്ഷപ്പെടുത്തുന്നതിന് പകരം ആക്രമിക്കുന്നതിന്റെ ദൃശ്യം പകര്‍ത്തി നില്‍ക്കുകയാണ് നാട്ടുകാര്‍ ചെയ്തത്.

സുനിതയും വീട്ടുടമ കൂടിയായ മുഹമ്മദ് ആസാദു തമ്മില്‍ വഴക്ക് ഉണ്ടായി. ഇതേതുടര്‍ന്ന് മകന്‍ അക്ഷയ്, ആസാദിന്റെ വീടിനു മുന്നില്‍ പോയി അയാളെ അസഭ്യം പറഞ്ഞു. ഇതില്‍ കുപിതനായ ആസാദ് വീട്ടില്‍ നിന്ന് ഇറങ്ങിവന്ന് അക്ഷയ്‌യെ മര്‍ദിക്കുകയായിരുന്നു. സുനിത ഇത് തടയാന്‍ ചെന്നപ്പോള്‍ അവരേയും ഇയാള്‍ ആക്രമിച്ചു. വീടിനകത്തായിരുന്ന വീരു കൂടി ആസാദിനെ പ്രതിരോധിക്കാന്‍ വന്നതോടെ ഇയാള്‍ കത്തിയെടുത്ത് മൂന്നുപേരെയും കുത്തുകയായിരുന്നു.

അക്ഷയും ആസാദും തമ്മില്‍ അടിപിടി തുടങ്ങിയപ്പോള്‍ മുതല്‍ ചുറ്റും കൂടിയ അയല്‍വാസികള്‍ മൊബൈലില്‍ ദൃശ്യങ്ങള്‍ പകര്‍ത്തി മാറി നില്‍ക്കുകയാണ് ചെയ്തത്. ആസാദ് ദമ്പതികളെയും മകനെയും കുത്തിപരിക്കേല്‍പ്പിക്കുമ്പോഴും ആരും തടയാനെത്തിയില്ല. പരിക്കേറ്റ് കിടന്നവരെ ആശുപത്രിയിലെത്തിക്കാനും ആദ്യം നാട്ടുകാര്‍ മടിച്ചു. പിന്നീട് ഇവരെ ആശുപത്രിയിലെത്തിച്ചെങ്കിലും സുനിത മരണപ്പെട്ടിരുന്നു. മണിക്കൂറുകള്‍ക്ക് ശേഷം വീരുവും മരിച്ചു. അക്ഷയ്‌യുടെ അവസ്ഥ ഗുരുതരമായി തുടരുകയാണ്. വീരു-സുനിത ദമ്പതികള്‍ക്ക് എട്ടുവയസായ മകള്‍ കൂടിയുണ്ട്.

ആസാദിന്റെ വീടിനു സമീപം അയാളുടെ കുടുംബാംഗങ്ങളുടെ മുന്നില്‍ വെച്ചാണ് കൊലപാതകം നടന്നത്. സുനിത മരിച്ചെന്ന് ഉറപ്പായതോടെ അക്രമി ആയുധവുമായി പൊലീസ് സ്‌റ്റേഷനിലെത്തി കീഴടങ്ങി. പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്.