മോദി സര്‍ക്കാരിന്റെ നാലരവര്‍ഷത്തെ ഭരണത്തില്‍ രാജ്യത്തിന്റെ കടബാധ്യത 50 ശതമാനം വര്‍ധിച്ച് 82 ലക്ഷം കോടി രൂപയായി. ഓരോ പൗരനും അക്കൗണ്ടില്‍ 15 ലക്ഷം തരാന്‍ പറ്റിയില്ല പകരം ഓരോരുത്തര്‍ക്കും കടം 63000 രൂപ. ഈ സാമ്പത്തികവര്‍ഷത്തെ ആദ്യ എട്ടുമാസം വാങ്ങിയ കടം വര്‍ഷത്തില്‍ മൊത്തം പ്രതീക്ഷിച്ചതിനേക്കാള്‍ കൂടി. കേന്ദ്രസര്‍ക്കാര്‍ വെള്ളിയാഴ്ച പ്രസിദ്ധീകരിച്ച തത്സ്ഥിതി റിപ്പോര്‍ട്ടിലാണ് (സ്റ്റാറ്റസ് പേപ്പര്‍ ഓണ്‍ ഗവണ്‍മെന്റ് ഡെബ്റ്റ്) കടബാധ്യത ഇരട്ടിയോളം കൂടിയെന്ന വെളിപ്പെടുത്തലുണ്ടായത്.

മോദി സര്‍ക്കാര്‍ അധികാരത്തില്‍ വരുമ്പോള്‍ കേന്ദ്രസര്‍ക്കാരിന്റെ മൊത്തം കടം 54.90 ലക്ഷം കോടി രൂപയായിരുന്നു. 2018 സെപ്തംബര്‍വരെയുള്ള കണക്കുപ്രകാരം ഇത് 82.03 ലക്ഷം കോടി രൂപയായി. ഓരോ ഇന്ത്യക്കാരന്റെയും കടം നാലരവര്‍ഷംമുമ്പ് ഉണ്ടായിരുന്ന 42,000ത്തില്‍ നിന്ന് 63,000ല്‍പരം രൂപയായി ഉയര്‍ന്നു. കേന്ദ്രസര്‍ക്കാരിന്റെ പ്രതീക്ഷകള്‍ കടത്തിവെട്ടി ധനക്കമ്മിയും കൂടുന്നത് സ്ഥിതി വഷളാക്കി. നടപ്പു സാന്പത്തിക വര്‍ഷം ധനക്കമ്മി 6.24 കോടിയായിരുന്നു സര്‍ക്കാര്‍ ലക്ഷ്യമിട്ടത്. എന്നാല്‍ നവംബര്‍ വരെയുള്ള ആദ്യ ഏഴു മാസത്തില്‍ തന്നെ ഇത് 114.8 ശതമാനം കൂടി 7.17 ലക്ഷം കോടിയായി കൂടിയെന്ന് കേന്ദ്ര ധനമന്ത്രാലയത്തിന്റെ റിപ്പോര്‍ട്ടിലുണ്ട്.

പൊതുകടത്തില്‍ 51.7 ശതമാനം വര്‍ധന രാജ്യത്തിന്റെ പൊതുകടം നാലരവര്‍ഷത്തില്‍ 51.7 ശതമാനം വര്‍ധിച്ച് 48 ലക്ഷം കോടി രൂപയില്‍നിന്ന് 73.25 ലക്ഷം കോടിയായി. ആഭ്യന്തരകടത്തിലുണ്ടായ 54 ശതമാനം വര്‍ധനയാണ് പൊതുകടം കൂട്ടിയത്. 68 ലക്ഷം കോടി രൂപയാണ് 2018 സെപ്തംബര്‍വരെയുള്ള ആഭ്യന്തരകടം. വിദേശകടം 5.25 ലക്ഷം കോടി രൂപയായി. മറ്റ് ബാധ്യതകള്‍ 8.55 ലക്ഷം കോടി രൂപയാണ്. ആഭ്യന്തരകടത്തില്‍ ഏറ്റവും വലിയ പങ്ക് കമ്പോളത്തില്‍നിന്നുള്ള കടമെടുക്കലാണ്. ഇത് 57.50 ശതമാനം വര്‍ധിച്ച് 52.65 ലക്ഷം കോടി രൂപയായി.

പെട്രോള്‍, ഡീസല്‍ എക്‌സൈസ് തീരുവയിലെ വര്‍ധനവഴിമാത്രം മോഡി സര്‍ക്കാരിന് അഞ്ച് ലക്ഷം കോടി രൂപയാണ് അഞ്ച് വര്‍ഷത്തിനുള്ളില്‍ അധികമായി ലഭിക്കുക. ആദായനികുതി ഉള്‍പ്പെടെ പ്രത്യക്ഷനികുതി വരുമാനത്തിലും വര്‍ധനയാണ് സര്‍ക്കാര്‍ അവകാശപ്പെടുന്നത്. 2017–18ല്‍ പ്രത്യക്ഷനികുതി വരുമാനം തൊട്ടുമുന്‍വര്‍ഷത്തെ അപേക്ഷിച്ച് 18 ശതമാനം വര്‍ധിച്ച് 10.02 ലക്ഷം കോടി രൂപയായെന്ന് ധനമന്ത്രി അരുണ്‍ ജെയ്റ്റ്‌ലി വ്യക്തമാക്കിയിരുന്നു. ആദായനികുതി റിട്ടേണ്‍ നല്‍കുന്നവരുടെ എണ്ണം 5.43 കോടിയില്‍നിന്ന് 6.84 കോടിയായി. ജിഎസ്ടി നടപ്പാക്കിയതോടെ പരോക്ഷനികുതി വരുമാനത്തിലും കേന്ദ്രത്തിന് നേട്ടമായി. എന്നിട്ടും കേന്ദ്രത്തിന്റെ കടബാധ്യത പെരുകുന്നത് ഒട്ടേറെ ചോദ്യങ്ങള്‍ ഉയര്‍ത്തുന്നു.

പൊതു തെരെഞ്ഞെടുപ്പിനു മുന്‍പുള്ള ഈ കണക്കുകള്‍ രാഷ്ട്രീയമായി മോദിയെ ഏറെ അലട്ടും. ലോകത്തിലെ മികച്ച സാമ്പത്തിക മുന്നേറ്റമുള്ള രാജ്യമായി ഇന്ത്യ കുതിക്കാനൊരുങ്ങുമ്പോഴാണ് ഈ കണക്കുകള്‍ നമ്മെ വേട്ടയാടുന്നത്. ഇന്ത്യയെ ഏറെ സാമ്പത്തിക ഭദ്രതയിലെത്തിച്ചു എന്ന പേരോടെയായിരുന്നു മന്‍മോഹന്‍ സിങിന്റെ മടക്കം. പിന്നീടും ഏറെ പ്രതീക്ഷയുണര്‍ത്തിയ മോദി ഭരണത്തിലാണ് ഈ വീഴ്ച