കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയെക്കുറിച്ചുള്ള നിലപാട് മാറ്റി ബിജെപി എംപി സരോജ് പാണ്ഡെ. രാഹുല്‍ പക്വത പ്രകടിപ്പിച്ച്‌ തുടങ്ങിയെന്ന് അവര്‍ മാധ്യമങ്ങളോട് പറഞ്ഞതായിട്ടാണ് ഇപ്പോള്‍ പുറത്ത് വരുന്ന റിപ്പോര്‍ട്ടുകള്‍ സൂചിപ്പിപ്പിക്കുന്നത്. കോണ്‍ഗ്രസ് അധ്യക്ഷന്‍ അടുത്തിടെ നടത്തിയ രാഷ്ട്രീയ നീക്കങ്ങള്‍ സംബന്ധിച്ച ചോദ്യത്തോടായിരുന്നു അവരുടെ പ്രതികരണം.

ഛത്തീസ്‌ഗഢില്‍നിന്നുള്ള ബിജെപിയുടെ രാജ്യസഭാ എംപിയായ സരോജ് പാണ്ഡെ നേരത്തെ രാഹുലിനെതിരെ രൂക്ഷ വിമര്‍ശമുന്നയിച്ചത് വാര്‍ത്തയായിരുന്നു. 40 വയസിനുശേഷവും കാര്യങ്ങള്‍ പഠിച്ചുകൊണ്ടിരിക്കുന്നയാളെ അറിവുള്ള വ്യക്തിയെന്ന് വിശേഷിപ്പിക്കാന്‍ കഴിയില്ല എന്നായിരുന്നു സരോജ് പാണ്ഡെ മുമ്ബ് അഭിപ്രായപ്പെട്ടിരുന്നത്. വ്യാപം അഴിമതി കോണ്‍ഗ്രസ് രാഷ്ട്രീയ ആയുധമായി ഉപയോഗിച്ചത് എങ്ങനെയാണെന്ന് നാം കണ്ടതാണെന്ന് സരോജ് പാണ്ഡെ ചൂണ്ടിക്കാട്ടി. എന്നാല്‍ വ്യാപം ആരോപണം ഫലപ്രദമായി ഉപയോഗിക്കാന്‍ അവര്‍ക്ക് കഴിഞ്ഞില്ല. ബിജെപി ഒരു തരത്തിലുള്ള അഴിമതിയും നടത്തുന്നില്ല എന്നത് വ്യക്തമാണ്.ഈ സാഹചര്യത്തിലാണ് പ്രതിപക്ഷം റഫാല്‍ ആരോപണവുമായി രംഗത്തെത്തിയിട്ടുള്ളതെന്നും സരോജ് പാണ്ഡെ പറഞ്ഞു.