പൗരത്വ ബില്ലിനെതിരെ മിസോ വംശജര് പ്രക്ഷോഭത്തിലേക്ക്, ഇന്ത്യ വിട്ട് ചൈനയോട് അടുക്കുമെന്ന് ഭീഷണി
ഇക്കഴിഞ്ഞ ബുധനാഴ്ച ആയിരക്കണക്കിന് യുവജനങ്ങള് അണിനിരന്ന പ്രതിഷേധ പ്രകടനത്തോടെ മിസോറം ജനത പൗരത്വ ബില്ലിനോടുള്ള തങ്ങളുടെ രോഷം വെളിപ്പെടുത്തി . ഹലോ ചൈന , ബൈ ബൈ ഇന്ത്യ എന്നെഴുതിയ ബാനറുകളുമേന്തിയാണ് മിസോറം ജനത നിരത്തിലിറങ്ങിയത് .
മിസോ വംശജരെ ഇന്ത്യ കാര്യമായി പരിഗണിയ്ക്കുന്നില്ല എന്ന വികാരം അവര്ക്കിടയില് ശക്തമാണ് .നിയമവിരുദ്ധമായി കടന്നു കയറിയ കുടിയേറ്റക്കാര്ക്കാണ് രാജ്യം തങ്ങളേക്കാള് കൂടുതല് പരിഗണന നല്കുന്നതെന്നും മിസോ വംശജരുടെ ആവശ്യങ്ങളോടും അവകാശങ്ങളോടും തികഞ്ഞ അവഗണനയാണ് അനുവര്ത്തിയ്ക്കുന്നതെന്നുമാണ് അവരുടെ വിലയിരുത്തല് .മിസോ സ്റ്റുഡന്സ് അസോസിയേഷനും നോര്ത്ത് ഈസ്റ്റ് സ്റ്റുഡന്സ് ഓര്ഗനൈസേഷനും സംയുക്തമായി സംഘടിപ്പിച്ചതാണ് പ്രതിഷേധ മാര്ച്ച് .
മിസോ വംശജരുടെ പ്രത്യേക അവകാശങ്ങളോട് അനുകൂല നിലപാടുള്ള ചൈനയുമായി സഹകരിയ്ക്കുന്നതിനെ കുറിച്ച് തങ്ങള് ചിന്തിച്ചു തുടങ്ങിയിട്ടുണ്ടെന്ന് വിദ്യാര്ത്ഥി നേതാക്കള് വ്യക്തമാക്കി .
ബംഗ്ലാദേശ് , അഫ്ഘാനിസ്ഥാന് , പാക്കിസ്ഥാന് എന്നീ രാജ്യങ്ങളില് നിന്നും ഇന്ത്യയിലേയ്ക്ക് കുടിയേറി പാര്ത്തവരില് ഹിന്ദു, ബുദ്ധ, സിഖ്, ക്രിസ്ത്യന്, പാഴ്സി, ജൈന മതവിശ്വാസികള് ആറു വര്ഷമായി ഇന്ത്യയില് വസിയ്ക്കുക ആയിരുന്നുവെങ്കില് അവര്ക്ക് ഇന്ത്യന് പൗരത്വം ലഭിയ്ക്കാനുള്ള അര്ഹത ഉണ്ടെന്നാണ് പൗരത്വ ബില്ല് പ്രസ്താവിയ്ക്കുന്നത് . അവരുടെ പക്കല് മതിയായ രേഖകള് ഇല്ലെങ്കില് പോലും പൗരത്വം നേടുന്നതിന് തടസ്സമുണ്ടാകില്ലെന്നും ബില്ലില് പറയുന്നു . ഇത് തദ്ദേശീയരായ വംശീയ ന്യൂനപക്ഷക്കാരെ ആശങ്കയില് ആക്കിയിട്ടുണ്ട് .
ഈ മാസം തുടക്കത്തിലാണ് ലോക്സഭ ബില് പാസാക്കിയത് .ജനുവരി 30- നു തുടങ്ങുന്ന പാര്ലമെന്റിന്റെ അടുത്ത സമ്മേളനത്തില് ഇത് രാജ്യസഭയില് മേശപ്പുറത്തു വയ്ക്കാനാണ് സാധ്യത . 1979 മുതല് 1985 വരെ ആസ്സാമില് ഉണ്ടായ മണ്ണിന്റെ മക്കള് വാദവും അതിനോടനുബന്ധിച്ചു നടന്ന പ്രക്ഷോഭ പരിപാടികള്ക്കും നേതൃത്വം നല്കിയ ആള് ആസ്സാം സ്റ്റുഡന്സ് യൂണിയന്, നോര്ത്ത് ഈസ്റ്റ് സ്റ്റുഡന്സ് ഓര്ഗനൈസേഷനുമായി ചേര്ന്ന് ബുധനാഴ്ച ഗുവാഹത്തിയില് ബില്ലിനെതിരായി സംഘടിപ്പിച്ച പ്രതിഷേധ റാലിയിലും വലിയ ജനപങ്കാളിത്തം ആണ് കണ്ടത്.
മിസോറം തലസ്ഥാനമായ ഐസ്വാളില് സംഘടിപ്പിച്ച പ്രതിഷേധ പ്രകടനത്തില് മാത്രം 30000 പേര് പങ്കെടുത്തുവെന്നാണ് സംഘാടകര് അവകാശപ്പെടുന്നത് . വിദേശികള് നമ്മുടെ മണ്ണിലേക്ക് കടന്നു വരുന്നത് കയ്യും കെട്ടി നോക്കി ഇരിയ്ക്കില്ലെന്നും എന്തു വിലകൊടുത്തും നമ്മുടെ മണ്ണ് സംരക്ഷിയ്ക്കുമെന്നും വിദ്യാര്ത്ഥി യൂണിയന് നേതാക്കള് പറഞ്ഞു . ബില്ല് അസാധു ആക്കണമെന്നുള്ള മിസോ വംശജരുടെ ആവശ്യങ്ങള്ക്ക് നേരെ ഗവണ്മെന്റ് കണ്ണടയ്ക്കുക ആണെങ്കില് വലിയ പ്രക്ഷോഭ പരിപാടികള് ആരംഭിയ്ക്കുമെന്നും അവര് വ്യക്തമാക്കി .
കേന്ദ്ര സര്ക്കാര് തങ്ങളുടെ നയം മാറ്റുന്നില്ലെങ്കില് തങ്ങള് പ്രക്ഷോഭം ശക്തിപ്പെടുത്തുമെന്ന് മിസോ സിവില് സൊസൈറ്റി സംഘടനകള് വെളിപ്പെടുത്തി . നിയമവിരുദ്ധ കുടിയേറ്റക്കാര്ക്ക് അനുകൂലമായ സര്ക്കാരിന്റെ സമീപനത്തിന് മാറ്റമില്ലെങ്കില് എല്ലാ എന് ജി ഒ കളും റിപ്പബ്ലിക് ദിനം ബഹിഷ്കരിയ്ക്കുമെന്നും അവര് പറഞ്ഞു . മിസോറാമിനെ ബില്ലിന്റെ പരിധിയില് നിന്നും ഒഴിവാക്കണമെന്നതാണ് അവരുടെ ആവശ്യം .
ആഭ്യന്തര മന്ത്രി ,പ്രധാനമന്ത്രി, സംയുക്ത പാര്ലമെന്ററി കമ്മിറ്റി എന്നിവര്ക്കെല്ലാം നിരവധി തവണ തങ്ങള് പരാതി നല്കി. എങ്കിലും തങ്ങളുടെ ആവശ്യങ്ങളോട് അവര് മുഖം തിരിയ്ക്കുകയാണ് ചെയ്തത് . മിസോറാമിലെ ജനങ്ങളോട് കേന്ദ്ര ഗവണ്മെന്റിന് അനുകൂല മനോഭാവം ഇല്ലെങ്കില് ഇന്ത്യന് പൗരന്മാരായി തുടരുന്നതില് തങ്ങള്ക്കും താല്പര്യമില്ലെന്നും മംഗളോയിഡ് ആദിവാസി വര്ഗക്കാര് ഉള്ള ചൈനയുമൊത്ത് സഹകരിയ്ക്കാനാണ് തങ്ങള്ക്ക് താല്പര്യമെന്നും അവര് മുന്നറിയിപ്പ് നല്കുന്നു.
https://www.facebook.com/Malayalivartha
