മോദിക്കെതിരെയുള്ള പടയോട്ടത്തില്‍ മികച്ച പ്രകടനം കാഴ്ച വച്ച് മുന്നേറുന്ന രാഹുല്‍ ഗാന്ധിയെ അമേഠിയിലെ ജനങ്ങള്‍ തടുത്തുനിര്‍ത്തിയത് കൌതുകകരമായ കാഴ്ചയായി. കോണ്‍ഗ്രസ് അധ്യക്ഷനെ സ്വന്തം മണ്ഡലമായ അമേഠിയില്‍ കര്‍ഷകരാണ് പ്രതിഷേധരൂപേണ തടഞ്ഞത്. ലോക്‌സഭാ തിരഞ്ഞെടുപ്പിന്റെ പ്രചരണത്തിനായി ഗൗരിഗഞ്ജ നഗരത്തില്‍ എത്തിയതായിരുന്നു അദ്ദേഹം.

രാജീവ് ഗാന്ധി ഫണ്ടേഷന്റെ പക്കലുള്ള ഭൂമി തിരിച്ച് നല്‍കുക. അല്ലെങ്കില്‍ ജോലി നല്‍കുക എന്ന ആവശ്യം ഉന്നയിച്ചാണ് കര്‍ഷകരുടെ പ്രതിഷേധം നടത്തിയത്. 'ഞങ്ങള്‍ നിരാശരാണ്. അദ്ദേഹം ഇറ്റലിയിലേക്ക് തിരിച്ച് പോകണം. അദ്ദേഹം അമേഠിക്ക് യോഗ്യനല്ല. ഞങ്ങളുടെ ഭൂമി തിരിച്ച് നല്‍കുകയും വേണം.' ഇതായിരുന്നു പ്രതിഷേധക്കാരുടെ ആവശ്യം.

ജയിന്‍ സഹോദരന്മാര്‍ കസൂറിലെ വ്യാവസായിക മേഖലയില്‍ 1980ല്‍ 65.57 ഏക്കര്‍ ഏറ്റെടുത്ത് സൈക്കിള്‍ കമ്പനി തുടങ്ങുകയായിരുന്നു. എംപിയായിരിക്കെ രാജീവ് ഗാന്ധിയാണ് സൈക്കിള്‍ ഫാക്ടറി ഉദ്ഘാടനം ചെയ്തത്. കമ്പനി നഷ്ടത്തിലായതോടെ വായ്പ തിരിച്ചുപിടിക്കാന്‍ ഭൂമി ലേലം ചെയ്തു. രാജീവ് ഗാന്ധി ചാരിറ്റബിള്‍ ട്രസ്റ്റ് ഒന്നര ലക്ഷം രൂപയ്ക്ക് ഭൂമി ലേലത്തില്‍ പിടിക്കുകയായിരുന്നു. എന്നാല്‍ കോടതി ലേലം റദ്ദാക്കുകയും ഭൂമി വ്യവസായ വികസന കോര്‍പ്പറേഷന് തിരികെ നല്‍കാന്‍ ഉത്തരവിടുകയും ചെയ്തു. അന്നുമുതല്‍ രേഖകളില്‍ ഉടമസ്ഥാവകാശം കോര്‍പ്പറേഷനാണെങ്കിലും ഭൂമി കൈയാളുന്നത് രാജീവ് ഗാന്ധി ചാരിറ്റബിള്‍ ട്രസ്റ്റാണ്.

രാജീവ് ഗാന്ധി ട്രസ്റ്റിന്റെ പേരില്‍ രാഹുല്‍ ഗാന്ധി കര്‍ഷകരുടെ ഭൂമി തട്ടിയെടുത്തായി ആരോപണം ഉയര്‍ത്തിയത് 2014ലെ തിരഞ്ഞെടുപ്പില്‍ ഇവിടെ രാഹുലിന്റെ എതിരാളിയുമായും പിന്നീട് കേന്ദ്രമന്ത്രിയുമായ സ്മൃതി ഇറാനിയാണ്. ഇത്തവണയും തിരഞ്ഞെടുപ്പ് മുന്നില്‍ക്കണ്ട് ശക്തമായ പ്രചാരണമാണ് രാഹുലിനെതിരെ സ്മൃതി ഇറാനി മണ്ഡലത്തില്‍ നടത്തിക്കൊണ്ടിരിക്കുന്നത്. രാഹുലിന്റെ സന്ദര്‍ശനവേളയില്‍ നടന്ന തടയല്‍നാടകത്തിന്റെ സൂത്രധാരയും സ്മൃതിയാണെന്നാണ് കോണ്‍ഗ്രസ് നേതാക്കളുടെ ആരോപണം. ട്രസ്റ്റിന്റെ മറവില്‍ രാഹുല്‍ ഗാന്ധി കര്‍ഷകരുടെ ഭൂമി തട്ടിയെടുക്കുകയാണെന്ന ആരോപണവും സ്മൃതിയുടേതായി പുറത്തുവന്നിട്ടുണ്ട്.

മോദിക്കെതിരെ കത്തിപ്പടരുന്ന രാഹുലിനെ ഏതുവിധേനയും നിര്‍ജ്ജീവമാക്കേണ്ടത് ബിജെപിയുടെ ആവശ്യമാണ്. അതാണ് അവരിപ്പോള്‍ അമേഥിയില്‍ ചെയ്തുകൊണ്ടിരിക്കുന്നത്.

രാഹുലിന്റെ നില ഇത്തവണ അമേഥിയില്‍ അത്ര സുരക്ഷിതമല്ലെന്ന റിപ്പോര്‍ട്ടുകള്‍ക്കു പിന്നില്‍ ഇത്തരം സാഹചര്യങ്ങളാണ് നിലനില്‍ക്കുന്നത്. അതിനാല്‍ മറ്റ് രണ്ട് മണ്ഡലങ്ങളില്‍ കൂടി മത്സരിക്കാന്‍ രാഹുല്‍ തയ്യാറെടുക്കുന്നതിന്റെ സൂചനകളുണ്ട്.

എന്തായാലും, പ്രിയങ്ക കൂടി കളത്തിലിറങ്ങിയതോടെ അങ്കത്തട്ട് കൂടുതല്‍ ചൂടു പിടിച്ചുകഴിഞ്ഞിരിക്കുന്നു. അതുളവാക്കിയ സ്വൈര്യക്കേട് മായ്ക്കുവാനാണ് ബിജെപി ഇന്നുതന്നെ കര്‍ഷകരെ ഇളക്കിവിട്ടതെന്ന് നിരീക്ഷകര്‍ പറയുന്നു.

അതോടൊപ്പം, സുരക്ഷിതമായ മണ്ഡലം തേടി രാഹുല്‍ ഗാന്ധി കേരളത്തിലേക്കു വരുന്നു എന്ന വര്‍ത്തമാനവും നിലവിലുണ്ട്. അങ്ങനെ വന്നാല്‍ ചാലക്കുടിയോ കോട്ടയമോ തിരഞ്ഞെടുക്കും എന്നും ശ്രുതിയുണ്ട്. കോട്ടയത്ത് രാഹുലിന്റെ പേരു പറയുന്നത് മാണിയെ പേടിപ്പിക്കാനാണോ എന്നും വ്യക്തമല്ല.