ബ്രഡും ബട്ടറും കഴിക്കുന്ന രാഹുല്‍ ഗാന്ധിയുടേയും പ്രിയങ്കാ ഗാന്ധിയുടേയും ചിത്രമാണ് ഇപ്പോള്‍ സമൂഹ മാധ്യമത്തില്‍ വൈറലാകുന്നത്. പ്രിയങ്ക അണിഞ്ഞിരിക്കുന്ന മാല കോണ്‍ഗ്രസിലെ നേതൃമാറ്റത്തെയാണ് സൂചിപ്പിക്കുന്നതെന്നും ഇവര്‍ കഴിക്കുന്ന ബ്രഡ് ഇന്ത്യയിലെ രാഷ്ട്രീയമാണെന്നും ചിത്രം സമൂഹ മാധ്യമത്തില്‍ വന്നതിന് പിന്നാലെ കമന്റുകള്‍ വന്നിരുന്നു.

കുടുംബ വാഴ്ച തുടരുന്നു എന്ന് എഴുതിയിരിക്കുന്ന പരസ്യത്തില്‍ എല്ലാ സഹോദരി സഹോദരന്മാര്‍ക്കും അമൂല്‍ എന്നെഴുതി ബട്ടര്‍ പുരട്ടിയ ബ്രഡ് കഴിക്കുന്ന രാഹുലിനേയും പ്രിയങ്കയേയും വളരെ രസകരമായ രീതിയിലാണ് വരച്ചു കാട്ടിയിരിക്കുന്നത്. ചിത്രം അമൂലിന്റെ ഔദ്യോഗിക ഫേസ്‌ബുക്ക് അക്കൗണ്ടിലിട്ടപ്പോള്‍ ഒട്ടേറെ കമന്റുകളും തേടിയെത്തി. ബട്ടര്‍ പുരട്ടിയ ബ്രഡ് ഇന്ത്യന്‍ രാഷ്ട്രിയത്തെയാണ് കാണിക്കുന്നതെന്നും അത് ആസ്വാദിച്ച്‌ നുണയുകയാണ് പ്രിയങ്കയും സഹോദരന്‍ രാഹുലുമെന്നുമൊക്കെയുള്ള രസകരമായ കമന്റുകളും കാര്‍ട്ടൂണില്‍ വരുന്നുണ്ട്. അമൂല്‍ റോക്ക്‌സ്, പെര്‍ഫക്‌ട് തുടങ്ങിയ പല കമന്റുകളും കാര്‍ട്ടൂണിന് എത്തുന്നുണ്ട്.

ഇത്തവണ കടുത്ത പോരാട്ടം നടക്കാന്‍ സാധ്യതയുള്ള യുപിയിലെ പ്രധാനമന്ത്രി നരേന്ദ്ര മോദിയുടെ വാരണാസിയും മുഖ്യമന്ത്രി യോഗി ആദിത്യനാഥിന്റെ മുന്‍ മണ്ഡലവുമായ ഗോരഖ്പൂരും ഉള്‍പ്പെട്ട കിഴക്കന്‍ യുപിയുടെ ചുമതലയാണ് എഐസിസി ജനറല്‍ സെക്രട്ടറി സ്ഥാനമെറ്റെടുത്തിരിക്കുന്ന പ്രിയങ്കയ്ക്കുള്ളത്.