റാഫേല് ഇടപാടിലൂടെ പ്രധാനമന്ത്രി നരേന്ദ്രമോദി 30,000 കോടി രൂപയാണ് മോഷ്ടിച്ചതെന്ന് കോണ്ഗ്രസ് അധ്യക്ഷന് രാഹുല്ഗാന്ധി ആരോപിച്ചു, കരാര് ദുര്ബലപ്പെടുത്തിയ മോദി പണം അനില്അംബാനിയുടെ പോക്കറ്റിലെത്തിച്ചു
റഫേല് ഇടപാടില് പ്രതിരോധ മന്ത്രാലയം ചര്ച്ച നടത്തിയ സമയത്ത് പ്രധാനമന്ത്രി സമാന്തര ചര്ച്ച നടത്തിയെന്ന രേഖകള് പുറത്ത് വന്നതോടെ നരേന്ദ്രമോദി ഒരേസമയം കള്ളനും കാവല്ക്കാരുമാണെന്ന് വ്യക്തമായതായി കോണ്ഗ്രസ് അധ്യക്ഷന് രാഹുല്ഗാന്ധി വാര്ത്താസമ്മേളനത്തില് ആരോപിച്ചു. നരേന്ദ്രമോദി ഡബിള്റോള് കളിക്കുകയാണോ എന്നും രാഹുല് പരിഹസിച്ചു. 30,000 കോടി രൂപയാണ് പ്രധാനമന്ത്രി മോഷ്ടിച്ചത്. ഇക്കാര്യം യുവാക്കള് ഗൗരവമായി കാണണമെന്നും രാഹുല്ഗാന്ധി ആവശ്യപ്പെട്ടു. കരാര് ദുര്ബലപ്പെടുത്തിയ പ്രധാനമന്ത്രി പണം അദ്ദേഹത്തിന്റെ സുഹൃത്തായ അനില് അംബാനിയുടെ പോക്കറ്റിലെത്തിച്ചു. അതിനാല് ഇക്കാര്യം പാര്ലമെന്റിന്റെ സംയുക്തസമിതി അന്വേഷിക്കണമെന്നും രാഹുല്ഗാന്ധി ആവശ്യപ്പെട്ടു.
റാഫേല് ഇടപാടില് അഴിമതിയുണ്ടെന്നും പ്രധാനമന്ത്രി നേരിട്ട് ഇടപെട്ടിട്ടുണ്ടെന്നും കോണ്ഗ്രസും രാഹുല്ഗാന്ധിയും തുടക്കം മുതലേ ആരോപിക്കുന്നതാണ്. അത് ശരിവയ്ക്കുന്നതാണ് മുന്പ്രതിരോധ സെക്രട്ടറിയും മലയാളിയുമായ മോഹന്കുമാര് പ്രധാനമന്ത്രിയുടെ ഓഫിസിന് അയച്ച കുറിപ്പിലെ വിവരങ്ങള്. കരാറില് അനില് അംബാനിയുടെ പേര് നിര്ദ്ദേശിച്ചത് പ്രധാനമന്ത്രി നരേന്ദ്രമോദിയാണെന്ന് മുന്ഫ്രഞ്ച് പ്രസിഡന്റ് ഹൊളാന്ദേ മുമ്പ് വെളിപ്പെടുത്തിയ കാര്യവും രാഹുല് ചൂണ്ടിക്കാട്ടി. പ്രധാനമന്ത്രി മോഷ്ടിച്ച പണം എയര്ഫോഴ്സിലെ സുഹൃത്തുക്കളുടെ സുരക്ഷയ്ക്കോ, അവരുടെ കുടുംബങ്ങള്ക്കോ ഉപയോഗിക്കാമായിരുന്നു. പ്രധാനമന്ത്രിയുടെ ഓഫീസ് നടത്തിയ സമാന്തര ചര്ച്ച പ്രതിരോധ മന്ത്രാലയത്തിന്റെ കരാറിനെ ദുര്ബലപ്പെടുത്തുമെന്ന് പ്രതിരോധ സെക്രട്ടറി കുറിപ്പെഴുതിയതോടെ പ്രധാനമന്ത്രി അനില് അംബാനിയുടെ പ്രതിനിധിയാണെന്ന് വ്യക്തമായെന്നും രാഹുല് ആരോപിച്ചു.
പ്രധാനമന്ത്രി നരേന്ദ്രമോദി ഭീരുവാണെന്നും രാഹുല് ആരോപിച്ചു. ഫ്രഞ്ച് സര്ക്കാരുമായി ഉണ്ടാക്കിയ വിവാദമായ റഫേല് ഇടപാടിനെ കുറിച്ചും ദേശീയ സുരക്ഷയെ കുറിച്ചും താനുമായി അഞ്ച് മിനിറ്റ് നേര്ക്ക്നേര് ചര്ച്ച നടത്താന് തയ്യാറാണോ എന്നും രാഹുല് ചോദിച്ചു. റഫേല് ഇടപാടുമായി ബന്ധപ്പെട്ട സുപ്രീംകോടതി വിധി ചോദ്യം ചെയ്യപ്പെടേണ്ട സാഹചര്യമാണ് ഉണ്ടായിരിക്കുന്നത്. കാരണം പ്രതിരോധ സെക്രട്ടറി എഴുതി കുറിപ്പ് കോടതിക്ക് മുന്നില് എത്തിയിട്ടില്ല. ഉണ്ടായിരുന്നെങ്കില് സര്ക്കാരിന് അനുകൂലമായ വിധി ഉണ്ടാകുമായിരുന്നില്ല. കേന്ദ്രസര്ക്കാര് കോടതിയില് കളവ് പറയുകയായിരുന്നെന്നും രാഹുല് ചൂണ്ടിക്കാട്ടി.
പ്രധാനന്ത്രി നരേന്ദ്രമോദി കള്ളനാണെന്ന് മുന്ഫ്രഞ്ച് പ്രസിഡന്റ് ഹൊളാന്ദേ വ്യക്തമാക്കിയിരുന്നു. റഫേല് ഇടപാടില് അനില് അംബാനിയുടെ പേര് നിര്ദ്ദേശിച്ചത് നരേന്ദ്രമോദിയായിരുന്നെന്നും അദ്ദേഹം പറഞ്ഞിരുന്നു. ഇപ്പോള് പ്രതിരോധമന്ത്രാലയവും പറയുന്നു പ്രധാനമന്ത്രി മോദി കള്ളനാണെന്ന്. കേന്ദ്രസര്ക്കാരിന് അവര് ആഗ്രഹിക്കുന്നവര്ക്കെതിരെ അന്വേഷണം നടത്താം. അത് റോബര്ട്ട് വാദ്രയാകാം, പി.ചിദംബരമാകാം. അതേ അന്വേഷണം റാഫേല് ഇടപാടിലും വേണമെന്നും രാഹുല് ആവശ്യപ്പെട്ടു. തെരഞ്ഞെടുപ്പിന്റെ പടിവാതില്ക്കല് എത്തിനില്ക്കുന്ന വേളയില് കോണ്ഗ്രസിന് കിട്ടിയ ഏറ്റവും വലിയ സമ്മാനമാണ് പ്രതിരോധ സെക്രട്ടറിയുടെ കുറിപ്പ്. ഇത് ഉഫയോഗിച്ചായിരിക്കും ഇനിയുള്ള യുദ്ധം. ഒരു പക്ഷെ,വീണ്ടും സുപ്രീംകോടതിയെ സമീപിക്കാനും കോണ്ഗ്രസ് തയ്യാറായേക്കും.
https://www.facebook.com/Malayalivartha