റഫാലിൽ സ്വതന്ത്രാന്വേഷണം പ്രഖ്യാപിക്കണമെന്നാവശ്യവുമായി ​ ആന്ധ്രപ്രദേശ്​ മുഖ്യമന്ത്രി എൻ. ചന്ദ്രബാബു നായിഡു രംഗത്ത്. പ്രധാനമ​ന്ത്രി നരേന്ദ്ര മോദി 59,000 കോടി രൂപയുടെ കരാറിനെ കുറിച്ച്​ നിശബ്​ദത പാലിക്കുകയാണ്​.

മോദിജീ, രാജ്യത്തെ നിങ്ങൾ ചതിക്കു​ന്നുവെന്ന സത്യം ദീർഘകാലം മറച്ചുവെക്കാൻ സാധിക്കില്ല.
ഇന്ത്യ കണ്ട ഏറ്റവും വലിയ അഴിമതിയിൽ പ്രധാനമന്ത്രിയുടെ ഓഫീസിന് പങ്കുണ്ടെന്നതി​​െൻറ റിപ്പോർട്ട്​ പുറത്തു വന്നിരിക്കുന്നു. ബി.ജെ.പിയുടെ വിനാശകരമായ തീരമാനങ്ങളുടെ ആഴം വ്യക്​തമാകുന്നതാണ്​ റിപ്പോർട്ട്​. - ചന്ദ്രബാബു നായിഡു ട്വീറ്റ്​ ചെയ്​തു.

റഫാൽ ഇടപാടിൽ സമാന്തര ചർച്ച നടത്തിയും റഫാൽ കരാറിൽ ചർച്ച കൂടാതെ അന്തിമ തീരുമാനം എടുക്കുന്നതിന്​ പ്രതിരോധ മന്ത്രാലയത്തെ നിർബന്ധിപ്പിച്ചുമാണ്​ പ്രധാനമന്ത്രിയുടെ ഒാഫീസ്​ ഇടപെട്ടത്​. പി.എം.ഒ സമാന്തര ചർച്ച നടത്തി പ്രതിരോധമന്ത്രാലയം നിയോഗിച്ച ഇന്ത്യൻ ചർച്ചാ സംഘത്തെ അവമതിച്ചു. ഈ വെളിപ്പെടുത്തലുകളെല്ലാം ഞെട്ടിപ്പിക്കുന്നതാണ്​. സമാന്തര ചർച്ച എന്നതിനർഥം ​ബി.ജെ.പി സർക്കാറിന്​ അവരിൽ തന്നെയുള്ള വിശ്വാസം നഷ്​ടമായി എന്നതാണ്​ - നായിഡു പറഞ്ഞു.

റഫാലുമായി ബന്ധപ്പെട്ട എല്ലാ വെളിപ്പെടുത്തലുകളും സൂചിപ്പിക്കുന്നത്​ കരാറുമായി ബന്ധപ്പെട്ട ദുരൂഹതകളാണ്​. അത്​ മാറാൻ സ്വതന്ത്ര അന്വേഷണം വേണം. സ്വതന്ത്ര അന്വേഷണം നടന്നാൽ ബി.ജെ.പി സർക്കാറിന്​ ഗുണകരമാകുന്ന തരത്തിൽ തെളിവുകളിൽ മാറ്റം വരുത്താൻ സാധിക്കില്ലെന്നും അദ്ദേഹം കൂട്ടിച്ചേർത്തു.