ജമ്മു കാശ്മീര്‍ നിയന്ത്രണരേഖയില്‍ പാക്കിസ്ഥാന്‍ സൈന്യത്തിന്റെ സ്‌നൈപ്പര്‍ തോക്ക് ആക്രമണത്തില്‍ സൈനികനു പരിക്ക്. രജൗരി ജില്ലയില്‍ ശനിയാഴ്ച രാത്രിയായിരുന്നു സംഭവം നടന്നത്. നൗഷേര സെക്ടറിലെ കലാല്‍ മേഖലയിലെ സുരക്ഷാ പോസ്റ്റില്‍ പ്രവര്‍ത്തിച്ചിരുന്ന സൈനികനാണു പരിക്കേറ്റത്. ഇദ്ദേഹത്തെ ആദ്യം പ്രദേശത്തെ സൈനിക ആശുപത്രിയിലേക്കും പിന്നീട് വിദഗ്ധ ചികിത്സയ്ക്കായി സൈനിക കമാന്‍ഡ് ആശുപത്രിയിലേക്കും മാറ്റി.
ഈ വര്‍ഷം ആരംഭിച്ചതിനുശേഷം പൂഞ്ച്, രജൗരി മേഖലകളില്‍ പാക്കിസ്ഥാന്റെ ഭാഗത്തുനിന്ന് തുടര്‍ച്ചയായി വെടിനിര്‍ത്തല്‍ ലംഘനങ്ങളുണ്ടാകുന്നുണ്ട്. കഴിഞ്ഞ മാസം അന്താരാഷ്ട്ര അതിര്‍ത്തിയിലും വെടിവയ്പുണ്ടായിയിരുന്നു.