കഴിഞ്ഞ ഓഗസ്റ്റില്‍ ഇന്ത്യ പരീക്ഷിച്ച അഗ്‌നി 5 മിസൈലിന്റെ പരിധി 5000-5500 കിലോമീറ്ററായിരുന്നു. ഭൂഖണ്ഡാന്തര ബാലിസ്റ്റിക് മിസൈലിന്റെ ഗണത്തില്‍ വരുന്നതാണ് അഗ്‌നി5 മിസൈല്‍. അഗ്‌നി 1 മുതല്‍ അഗ്‌നി 4 വരെയുള്ള മിസൈലുകള്‍ നിലവില്‍ ഇന്ത്യന്‍ സേനയുടെ ഭാഗമാണ്. പാക്കിസ്ഥാനേക്കാള്‍ ചൈനയുടെ പ്രതിരോധ വെല്ലുവിളികള്‍ക്കുള്ള മറുപടിയായാണ് അണ്വായുധ വാഹക ശേഷിയുള്ള അഗ്‌നി 5നെ കണക്കാക്കുന്നത്. ഒരിക്കല്‍ തൊടുത്താല്‍ പിടിച്ചു നിര്‍ത്താനാകാത്ത അഗ്‌നി മിസൈലുകള്‍ വെടിയുണ്ടയേക്കാള്‍ വേഗത്തിലാണ് സഞ്ചരിക്കുക. കരയില്‍ നിന്ന് കരയിലേക്ക് തൊടുക്കാവുന്ന മിസൈലാണിത്. 20മീറ്റര്‍ ദൈര്‍ഘ്യമുള്ള മിസൈലിന് 17ടണ്‍ ഭാരമുണ്ട്. ഇന്ത്യയുടെ അഗ്‌നിക്കു മറുപടിയെന്നോളം പാക്കിസ്ഥാന്‍ കഴിഞ്ഞ ഒക്ടോബറിലാണ് 1300 കിലോമീറ്റര്‍ പരിധിയുള്ള ഘൗരി ബാലിസ്റ്റിക് മിസൈല്‍ പരീക്ഷിച്ചത്.

ഇന്ത്യയുടെ അഗ്‌നി ബാലിസ്റ്റിക് മിസൈലുകളുടെ മറുപടിക്ക് 1990കള്‍ മുതല്‍ പാക്കിസ്ഥാന്‍ നടത്തിയ ശ്രമങ്ങളുടെ ഫലമായിരുന്നു ഘൗരി ബാലിസ്റ്റിക് മിസൈല്‍.1980കള്‍ മുതല്‍ തന്നെ ഉത്തരകൊറിയയുടെ സഹായത്തില്‍ പാക്കിസ്ഥാന്‍ ബാലിസ്റ്റിക് മിസൈല്‍ നിര്‍മിക്കാന്‍ ശ്രമങ്ങള്‍ ആരംഭിച്ചതായി റിപ്പോര്‍ട്ടുകളുണ്ടായിരുന്നു. ഇന്ത്യ അഗ്‌നി മിസൈല്‍ പരീക്ഷണം നടത്തി ഒന്നര പതിറ്റാണ്ടിന് ശേഷം 1998ലാണ് പാക്കിസ്ഥാന്‍ ഘൗരി മിസൈല്‍ പരീക്ഷിച്ചത്. പരീക്ഷണം വിജയകരമായിരുന്നുവെന്ന് പാക്ക് സൈന്യം അവകാശപ്പെടുമ്പോഴും ലക്ഷ്യം തകര്‍ക്കാന്‍ ഘൗരിക്ക് കഴിഞ്ഞില്ലെന്ന റിപ്പോര്‍ട്ടുകളും പുറത്തുവന്നിരുന്നു.201015 കാലയളവില്‍ നിരവധി മിസൈലുകള്‍ പരീക്ഷിച്ചു. ഇതില്‍ മധ്യദൂര ബാലിസ്റ്റിക് മിസൈലായ ഘൗരി 1 ഉത്തരകൊറിയയുടെ റോഡോങ് 1ന്റെ പകര്‍പ്പാണെന്ന ആരോപണവും നേരിടേണ്ടി വന്നു. പാക്ക് സൈന്യത്തിന്റെ അവകാശവാദം അനുസരിച്ച് 700 കിലോഗ്രാം വരെ വഹിക്കാന്‍ ശേഷിയുള്ള അണ്വായുധ മിസൈലാണ് ഘൗരി 1. ഇതിന്റെ മറുപടിയായാണ് ഇന്ത്യ അഗ്‌നി 3 മിസൈല്‍ പരീക്ഷിച്ചത്. 3500 കിലോമീറ്റര്‍ മുതല്‍ 5,000 കിലോമീറ്റര്‍ വരെ പരിധിയുള്ള മധ്യദൂര ബാലിസ്റ്റിക് മിസൈലാണിത്.2018 ഏപ്രിലില്‍ പാക്കിസ്ഥാന്‍ തദ്ദേശീയമായി നിര്‍മിച്ച 700 കിലോമീറ്റര്‍ പരിധിയുള്ള ബാബര്‍ ക്രൂസ് മിസൈല്‍ പരീക്ഷിച്ചു. ജിപിഎസ് സംവിധാനം ഘടിപ്പിച്ചിട്ടല്ലെങ്കിലും ബാബര്‍ മിസൈല്‍ അതീവ കൃത്യമാണെന്നായിരുന്നുവെന്നാണ് പാക്കിസ്ഥാന്റെ അവകാശവാദം. ഈ മിസൈല്‍ ലക്ഷ്യം ഭേദിക്കുന്നതിന്റെ ദൃശ്യങ്ങള്‍ പാക്ക് സൈന്യത്തിന്റെ വാര്‍ത്താവിഭാഗം പുറത്തുവിടുകയും ചെയ്തു.ഗാസ്‌നവി, അബ്ദാലി, ഘൗരി, ഷഹീന്‍, ബാബര്‍ ക്രൂസ് മിസൈല്‍, ടാങ്ക്‌വേധ ഷിക്കന്‍ തുടങ്ങി നിരവധി മിസൈലുകള്‍ കഴിഞ്ഞ കുറച്ചു വര്‍ഷങ്ങളായി പാക്കിസ്ഥാന്‍ പരീക്ഷിച്ചിരുന്നു. കരസേനക്കെതിരെ ഉപയോഗിക്കാനാകുന്ന 60 കിലോമീറ്റര്‍ പരിധിയുള്ള നാസര്‍ ടാങ്ക്‌വേധം മിസൈലും ചൈനീസ് സഹായത്തില്‍ നിര്‍മിച്ച എല്‍വൈ80 കരവായു മിസൈലും പാക്കിസ്ഥാന്‍ 2017ല്‍ പരീക്ഷിച്ചിരുന്നു. എങ്കിലും പാക്കിസ്ഥാന് ഇതുവരെ അഗ്‌നിയുടെ ശേഷിയിലുള്ള മിസൈലുകള്‍ നിര്‍മിക്കാന്‍ സാധിച്ചിട്ടില്ല.നിലവില്‍ ഇന്ത്യയുടെ പ്രതിരോധ ഗവേഷണ സ്ഥാപനമായ ഡിആര്‍ഡിഒ അഗ്‌നി 6ന്റെ പണിപ്പുരയിലാണ്. 8000 കിലോമീറ്ററിലേറെയാണ് ഈ അഗ്‌നി മിസൈലിന്റെ പരിധി. പത്ത് അണ്വായുധങ്ങള്‍ വരെ വഹിക്കാന്‍ ഈ മിസൈലിനാകും. കരയില്‍ നിന്നും അന്തര്‍വാഹിനികളില്‍ നിന്നും ഇവയെ പ്രയോഗിക്കാനാകും. കഴിഞ്ഞ ഡിസംബറില്‍ ഇന്ത്യ രഹസ്യമായി അഗ്‌നി 6 പരീക്ഷിച്ചെന്നും റിപ്പോര്‍ട്ടുകളുണ്ടായിരുന്നു. എന്നാല്‍ പ്രതിരോധവകുപ്പ് ഇതു സംബന്ധിച്ച് സ്ഥിരീകരണം നടത്തിയിട്ടില്ല.