പശുവിനെ രക്ഷിക്കാന്‍ ശ്രമിക്കുന്നതിനിടെ ആര്‍എസ്എസ് അധ്യക്ഷന്‍ മോഹന്‍ ഭാഗവതിന്റെ അകമ്പടി വാഹനം തലകീഴായ് മറിഞ്ഞു. അപകടത്തില്‍ സിഐഎസ്എഫ് ജവാന് പരിക്കേറ്റു. വ്യാഴാഴ്ച വൈകുന്നേരം മഹാരാഷ്ട്രയിലെ ചന്ദ്രാപുര്‍ ജില്ലയിലെ വറോറയില്‍ ചന്ദ്രാപുര്‍ നാഗ്പുര്‍ ദേശീയപാതയിലായിരുന്നു അപകടം നടന്നത്. റോഡിനു നടുവില്‍ നില്‍ക്കുകയായിരുന്ന പശുവിനെ ഇടിക്കാതിരിക്കാന്‍ പെട്ടെന്ന് ബ്രേക്ക് ചവുട്ടിയതാണ് അപകടത്തിനു കാരണമായത്.

ടയര്‍പൊട്ടിയ കാര്‍ തലകീഴായി മറിയുകയായിരുന്നു. ഇസഡ് കാറ്റഗറി സുരക്ഷയുള്ള മോഹന്‍ ഭാഗവതിനു അകമ്പടി സേവിച്ച സിഐഎസ്എഫ് ജവാന്‍മാരുടെ വാഹനമാണ് അപകടത്തില്‍പ്പെട്ടത്. കാറില്‍ ആറ് സിഐഎസ്എഫ് ജവാന്‍മാരാണ് ഉണ്ടായത്. ഇവരില്‍ ഒരാള്‍ക്കുമാത്രമാണ് പരിക്കേറ്റത്.

മോഹന്‍ ഭാഗവത് സഞ്ചരിച്ച വാഹനം പശുവിനെ കടന്നുപോയതിനു ശേഷം പിന്നാലെയെത്തിയ വാഹനമാണ് മറിഞ്ഞത്.