തനിയ്ക്ക് ഇഷ്ടമുള്ള കോഴ്‌സിന് ചേരാന്‍ സമ്മതിക്കാത്ത പിതാവിനെതിരെ പരാതിയുമായി പെണ്‍കുട്ടി പൊലീസ് സ്റ്റേഷനില്‍
തിരുവള്ളൂര്‍ വേപ്പംപെട്ട് പൊലീസ് സ്റ്റേഷനില്‍ ഒരു അസാധാരണ പരാതിയെത്തി. പരാതികള്‍ അറിയിക്കുന്നതിനുള്ള പൊലീസ് വാട്‌സാപ് നമ്പരിലൂടെയാണ് ഒരു പെണ്‍കുട്ടി പരാതി അറിയിച്ചത്. തന്റെ ഇഷ്ട കോഴ്‌സിനു ചേരാനനുവദിക്കാതെ പിതാവ് സ്‌കൂള്‍ സര്‍ട്ടിഫിക്കറ്റ് പിടിച്ചുവച്ചിരിയ്ക്കുന്നു എന്നായിരുന്നു പരാതി. പിന്നീട് പൊലീസിന്റെ മധ്യസ്ഥതയില്‍ പിതാവ് മകളുടെ സര്‍ട്ടിഫിക്കറ്റുകള്‍ തിരിച്ചു നല്‍കി.
'ഞാന്‍ പ്ലസ്ടു പാസായി. എന്റെ പിതാവ് ബിഎസ്സി ഫിസിക്‌സിനോ കെമിസ്ട്രിക്കോ ചേരാന്‍ എന്നെ നിര്‍ബന്ധിക്കുന്നു. എന്നാല്‍, എനിക്കിഷ്ടം ബിഎ പത്രപ്രവര്‍ത്തനത്തിനോ എല്‍എല്‍ബിക്കോ ചേരാനാണ്. ഇതില്‍ ഇടപെട്ടു പരിഹാരമുണ്ടാക്കണം.' പരാതി ശ്രദ്ധയില്‍പ്പെട്ട പൊലീസ് രേഖാമൂലം പരാതി നല്‍കാന്‍ ആവശ്യപ്പെട്ടു. ഇതോടെ, കുട്ടി ചൈല്‍ഡ് ഹെല്‍പ്ലൈനില്‍ പരാതി നല്‍കി. പരാതിയില്‍ ഇടപെട്ടു പരിഹാരമുണ്ടാക്കാന്‍ ഹെല്‍പ്ലൈന്‍ പൊലീസിനു നിര്‍ദേശം നല്‍കി.
പെണ്‍കുട്ടിയുടെ അമ്മയും അച്ഛനും മാസങ്ങള്‍ക്കു മുന്‍പു വിവാഹ മോചനം നേടിയവരാണ്. കുട്ടി അമ്മയ്‌ക്കൊപ്പമാണു താമസം. വീട്ടില്‍ നിന്നു മാറിത്താമസിക്കുമ്പോള്‍ അച്ഛന്‍ മകളുടെ പത്താംക്ലാസ് മാര്‍ക്ക് ലിസ്റ്റുള്‍പ്പെടെയുള്ള സര്‍ട്ടിഫിക്കറ്റുകള്‍ കൊണ്ടു പോയിരുന്നു. ആവശ്യമാകുമ്പോള്‍ തിരിച്ചുതരാമെന്ന ഉറപ്പിലായിരുന്നു ഇത്. എന്നാല്‍, താന്‍ പറയുന്ന കോഴ്‌സിനു ചേരാന്‍ തയാറായില്ലെങ്കില്‍ സര്‍ട്ടിഫിക്കറ്റ് തിരിച്ചുനല്‍കില്ലെന്നു ഇപ്പോള്‍ വാക്കു മാറ്റിയെന്നായിരുന്നു പെണ്‍കുട്ടിയുടെ പരാതി. പൊലീസ് ബന്ധപ്പെട്ടതോടെ പിതാവ് ഇന്നലെ പൊലീസ് സ്റ്റേഷനിലെത്തി സര്‍ട്ടിഫിക്കറ്റുകള്‍ കൈമാറി.
https://www.facebook.com/Malayalivartha
