കോടിക്കണക്കിനു ജനങ്ങളുടെ മധുരമൂറുന്ന ഓര്‍മകളിൽ നിറഞ്ഞു നിൽക്കുന്ന പാർലെ ജി ബിസ്ക്കറ്റ് നിർമാണ യൂണിറ്റിൽ ജോലി ചെയ്യുന്നത് ചെറിയ കുട്ടികൾ ..പാർലെ-ജിയുടെ ഛത്തീസ്ഗഢിലെ ബിസ്‌കറ്റ് നിർമാണ യൂണിറ്റിൽ ആണ് ബാലവേല ചെയ്യിക്കുന്നത് . റായ്‌പുരിലെ യൂണിറ്റിലുണ്ടായിരുന്ന 26 കുട്ടികളെയാണ് ജില്ലാ ദൗത്യ സേന രക്ഷപ്പെടുത്തിയത്

റായ്പുരിലെ അമസിവ്‌നി മേഖലയിൽ ധാരാളം കുട്ടികൾ ബാലവേല ചെയ്യുന്നതായുള്ള വിവരം ബച്ച്പൻ ബച്ചാവോ ആന്ദോളൻ (ബി.ബി.എ) ലഭിച്ചതോടെയാണ് സേന ഈ നീക്കം നടത്തിയത്. ജില്ലാ കളക്ടറുടെ നിർദേശം ലഭിച്ചശേഷമായിരുന്നു ഇത്.ജില്ലാ ബാലാവകാശ ഉദ്യോഗസ്ഥനായ നവ്‌നീത് സ്വർണാകറാണ് പ്രമുഖ ദേശീയവാർത്താ ഏജൻസിയോട് ഇക്കാര്യം വെളിപ്പെടുത്തിയത്.

മധ്യപ്രദേശ്, ജാർഖണ്ഡ്, ഒഡിഷ, ബിഹാർ എന്നിവിടങ്ങളിൽ നിന്നുള്ള 12 മുതൽ 16 വയസ് വരെ പ്രായമുള്ള കുട്ടികളാണ് ഇവിടെ ജോലി ചെയ്തിരുന്നത്. ഇവർ രാവിലെ എട്ടുമുതൽ രാത്രി എട്ടുവരെയാണു ജോലി ചെയ്തിരുന്നത്. ലഭിച്ചിരുന്ന ശമ്പളം, മാസം അയ്യായിരം മുതൽ ഏഴായിരം വരെയും.

ലക്ഷക്കണക്കിനു കുട്ടികളുടെ വിശ്വാസത്തില്‍ നിന്നുണ്ടായ രാജ്യത്തെ പ്രമുഖ ബ്രാന്‍ഡായ പാര്‍ലെ-ജി ഇത്തരത്തില്‍ കുട്ടികളെ ചൂഷണം ചെയ്യുന്നതു കാണുമ്പോള്‍ വിഷമം തോന്നുന്നുവെന്ന് ബി.ബി.എ സി.ഇ.ഒ സമീര്‍ മാഥുര്‍ പറഞ്ഞു.

കുട്ടികളെ സര്‍ക്കാരിന്റെ ശിശുസംരക്ഷണ കേന്ദ്രത്തിലാക്കിക്കഴിഞ്ഞു. ബാലാവകാശ നിയമത്തിലെ 79-ാം വകുപ്പ് പ്രകാരം കേസെടുത്തിട്ടുണ്ട്.

ബാലവേല നിരോധിക്കണമെന്ന ആവശ്യകതയിലൂന്നിയാണ് എല്ലാ വര്‍ഷവും അന്താരാഷ്ട്ര തൊഴില്‍ സംഘടന (ഐഎല്‍ഒ) ജൂണ്‍ 12-ാം തീയതി ബാലവേല വിരുദ്ധദിനമായി ആഘോഷിക്കുന്നത്..കുട്ടികളുടെ അവകാശങ്ങളെക്കുറിച്ച് 1989ല്‍ ഐക്യരാഷ്ട്ര സംഘടന പ്രസിദ്ധീകരിച്ച കുട്ടികളുടെ ഉടമ്പടിയില്‍ നാല് പ്രധാന അവകാശങ്ങളെക്കുറിച്ച് സൂചിപ്പിക്കുന്നു. അതിജീവനം, ഉന്നമനം, സംരക്ഷണം, പങ്കാളിത്തം എന്നീ നാല് അവകാശങ്ങളും 1999ല്‍ ഇന്ത്യ അംഗീകരിച്ചിട്ടുണ്ട്.

ഇതുകൂടാതെ കുട്ടികളുടെ അവകാശങ്ങള്‍ ഉറപ്പുവരുത്തുവാന്‍ ഇന്ത്യയിലും മറ്റ് വിവിധ സംസ്ഥാനങ്ങളിലും ഒട്ടനവധി നിയമങ്ങളും നയപരിപാടികളും ആവിഷ്‌ക്കരിച്ചിട്ടുണ്ട്. ബാലവേലനിരോധന നിയമം (1986), ബാലനീതി നിയമം (2000) എന്നീ നിയമങ്ങളും, സംയോജിത ശിശുവികസനപദ്ധതി, സര്‍വശിക്ഷാ അഭിയാന്‍, നിര്‍ഭയ, ചൈല്‍ഡ് ലൈന്‍ തുടങ്ങിയ പദ്ധതികളും ബാലാവകാശ സംരക്ഷണത്തിനു വേണ്ടി ഉണ്ടാക്കിയവയാണ്.

2016 ലെ ബാലവേല ഭേദഗതി (നിരോധനവും നിയന്ത്രണവും) നിയമം, 2009 ലെ വിദ്യാഭ്യാസ അവകാശ നിയമം എന്നിവ നടപ്പിലാക്കാന്‍ ശ്രമിച്ചതിലൂടെ ബാലവേല നിര്‍മ്മാര്‍ജ്ജനമെന്ന ഐഎല്‍ഒ യുടെ മാര്‍ഗനിര്‍ദ്ദേശങ്ങള്‍ ഇന്ത്യ പാലിക്കുന്നുവെങ്കിലും ഇന്ത്യയില്‍ ബാലവേല പൂര്‍ണമായി ഇല്ലാതാക്കാന്‍ ഇന്നും സാധിച്ചിട്ടില്ല. ഇതിന്റെ നേർക്കാഴ്ചയാണ് ഇപ്പോൾ പാർലെ ജി ബിസ്ക്കറ്റ് നിർമ്മാണ യൂണിറ്റിലെ ബാലവേലയും