ഒരുമാസം പ്രായമുള്ള കുഞ്ഞിനെ കഴുത്ത് ഞെരിച്ച് അച്ഛന്‍ കൊന്നത്, ശോഭനമായ ഭാവി ലഭിക്കുമെന്ന് ജ്യോത്സ്യന്‍ പറഞ്ഞതിനാല്‍!
കര്‍ണാടകയിലെ ചിക്ക്മംഗല്ലൂരില്‍ ഒരു മാസം പ്രായമായ കുഞ്ഞിനെ അച്ഛന്‍ കഴുത്ത് ഞെരിച്ച് കൊലപ്പെടുത്തി. നല്ല ഭാവിക്കായി കുഞ്ഞിനെ കൊല്ലണമെന്ന് ജ്യോത്സ്യന്‍ ഉപദേശിച്ചതും പെണ്‍കുട്ടി ജനിച്ചതിലെ അതൃപ്തിയുമാണ് ക്രൂര കൊലപാതകത്തിന് അച്ഛനെ പ്രേരിപ്പിച്ചത്.
പരാതിയുമായി അമ്മ പോലീസിനെ സമീപിച്ചതോടെയാണ് കൊലപാതക വിവരം പുറംലോകം അറിയുന്നത്. കേസുമായി ബന്ധപ്പെട്ട് കുഞ്ഞിന്റെ പിതാവും പ്രതിയുമായ മഞ്ജുനാഥിനെ പോലീസ് അറസ്റ്റ് ചെയ്തു.
ഭാര്യയും മഞ്ജുനാഥും തമ്മില്‍ നിരന്തരം വഴക്കിടാറുണ്ടായിരുന്നെന്നാണ് വിവരം. കുഞ്ഞിനെ കഴുത്ത് ഞെരിച്ച് കൊന്ന ശേഷം ഇയാള്‍ ഉറക്കം നടിച്ചു കിടന്നു.
വീട്ടുജോലി കഴിഞ്ഞെത്തിയ ഭാര്യയാണ്, മൂക്കില്‍ നിന്നും രക്തം വന്ന നിലയില്‍ കുഞ്ഞിനെ കണ്ടത്. ഉടനെ മഞ്ജുനാഥിനെ വിളിച്ചുണര്‍ത്തി കുഞ്ഞിനെ ആശുപത്രിയിലെത്തിച്ചു. കുഞ്ഞിന്റെ മരണം സ്ഥിരീകരിച്ച ഡോക്ടര്‍ പൊലീസില്‍ പരാതിപ്പെടാന്‍ ആവശ്യപ്പെട്ടു.
തുടര്‍ന്ന് മഞ്ജുനാഥിനെ കുറിച്ച് സംശയം തോന്നിയ ഭാര്യ പൊലീസില്‍ പരാതി നല്‍കി. ചോദ്യം ചെയ്യലില്‍ മഞ്ജുനാഥ് കുറ്റം സമ്മതിച്ചു. ജ്യോത്സ്യനെക്കുറിച്ചും ഇയാള്‍ പോലീസിനോട് പറഞ്ഞു.
https://www.facebook.com/Malayalivartha
