ജമ്മുകശ്മീരില്‍ മിനിബസ് കൊക്കയിലേക്കു മറിഞ്ഞ് 35 പേര്‍ക്ക് ദാരുണാന്ത്യം. 17 പേര്‍ക്ക് പരിക്കേറ്റു. കിഷ്ത്‌വാര്‍ ജില്ലയിലെ കെഷ്‌വാന്‍തക്‌റായ് റോഡില്‍ തിങ്കളാഴ്ച രാവിലെ 7.30ഓടെയാണ് അപകടം നടന്നത്. കെഷ്‌വാനില്‍നിന്ന് കിഷ്ത്‌വാറിലേക്ക് 52 യാത്രക്കാരുമായി പോകുകയായിരുന്ന 28 സീറ്റുള്ള ബസ് നിയന്ത്രണംവിട്ട് കൊക്കയിലേക്കു മറിയുകയായിരുന്നെന്ന് കിഷ്ത്‌വാര്‍ ഡെപ്യൂട്ടി കമീഷണര്‍ എ.എസ്. റാണ പറഞ്ഞു. നാട്ടുകാരും പൊലീസും സുരക്ഷാസൈന്യവും ചേര്‍ന്നാണ് രക്ഷാപ്രവര്‍ത്തനം നടത്തി പരിക്കേറ്റവരെ ആശുപത്രിയിലേക്കു മാറ്റിയത്.
പരിക്കേറ്റവരെ ഹെലികോപ്ടറില്‍ ജമ്മു മെഡിക്കല്‍ കോളജ് ആശുപത്രിയിലെത്തിച്ചു. മരിച്ചവരുടെ ബന്ധുക്കള്‍ക്ക് ഗവര്‍ണര്‍ സത്യപാല്‍ മലിക് അഞ്ചു ലക്ഷം രൂപ വീതം സഹായധനം പ്രഖ്യാപിച്ചു. പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും അനുശോചനം രേഖപ്പെടുത്തി. നാലു ദിവസത്തിനിടെ കശ്മീരില്‍ നടക്കുന്ന രണ്ടാമത്തെ ബസപകടമാണിത്.
കഴിഞ്ഞ വ്യാഴാഴ്ച രജൗറിപൂഞ്ച് ജില്ലകളെ ബന്ധിപ്പിക്കുന്ന മുഗള്‍ റോഡില്‍ മിനിബസ് കൊക്കയിലേക്കു മറിഞ്ഞ് 11 കമ്ബ്യൂട്ടര്‍ ട്രെയിനിങ് ഇന്‍സ്റ്റിറ്റിയൂട്ട് വിദ്യാര്‍ഥികള്‍ മരിച്ചിരുന്നു.