ദക്ഷിണ കന്നഡ ചിക്കമംഗളൂരു ജില്ലകളെ ബന്ധിപ്പിക്കുന്ന ദേശീയപാതയില്‍ ബല്‍ത്തങ്ങാടിയ്ക്കടുത്ത് സെല്‍ഫി എടുക്കുന്നതിനിടെ ഒരു യവാവ് പാറപ്പുറത്തു നിന്ന് 150 അടി താഴ്ചയിലേക്കു വീണ് ഗുരുതരമായി പരുക്കേറ്റു. ബല്‍ത്തങ്ങാടി നെരിയയിലെ സതീഷിനാണു പരുക്കേറ്റത്. ഇയാളെ മംഗളൂരുവിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ചാര്‍മാടി ചുരത്തിലെ ബിദിറുത്തലയില്‍ ദേശീയപാതയോരത്തെ വെള്ളച്ചാട്ടത്തിനു സമീപം ഞായറാഴ്ചയാണു സംഭവം. പാറപ്പുറത്തു കയറി വെള്ളച്ചാട്ടത്തിനടുത്തു നിന്നു സെല്‍ഫി എടുക്കവെയാണ് സതീഷ് കാല്‍ തെന്നി വീണത്.

റോഡരികില്‍ വാഹനം നിര്‍ത്തി വെള്ളച്ചാട്ടത്തിന്റെ വീഡിയോ പകര്‍ത്തിയവര്‍ക്ക് ഇയാള്‍ വീഴുന്ന ദൃശ്യങ്ങള്‍ ലഭിച്ചു. ഇതു സമൂഹ മാധ്യമങ്ങളില്‍ പ്രചരിക്കുന്നുണ്ട്.

മഴ കനത്തതോടെ വിവിധ ചുരം റോഡുകളില്‍ ചെറു വെള്ളച്ചാട്ടങ്ങള്‍ രൂപപ്പെട്ടിട്ടുണ്ട്. എന്നാല്‍ ഇവയുടെ അപകട സാധ്യത മനസ്സിലാക്കാതെ സഞ്ചാരികള്‍ പലരും ഇത്തരം സാഹസങ്ങള്‍ കാട്ടാറുണ്ട്.