കോണ്‍ഗ്രസ് അധ്യക്ഷസ്ഥാനത്തു നിന്നും രാജിവയ്ക്കാനുള്ള കാരണങ്ങള്‍ നിരത്തി രാഹുല്‍ ഗാന്ധി. ട്വിറ്ററില്‍ പങ്കുവച്ച കത്തിലാണ് രാഹുല്‍ തന്റെ രാജി കാരണങ്ങള്‍ വെളിപ്പെടുത്തിയിരിക്കുന്നത്. ലോക്‌സഭാ തെരഞ്ഞെടുപ്പില്‍ പാര്‍ട്ടിയുടെ പരാജയത്തിനു മറ്റുള്ളവരെ ഉത്തരവാദികളാക്കിയാല്‍ അത് അനീതിയാണ്, തന്റെ ഉത്തരവാദിത്തത്തെ അവഗണിക്കുകയാണെന്നും അദ്ദേഹം പറഞ്ഞു.

തന്റെ ശരീരത്തില്‍ ജീവനുള്ള ഓരോ കോശങ്ങളും ബിജെപിയുടെ ആശയത്തെ പ്രതിരോധിക്കുമെന്നും രാഹുല്‍ കൂട്ടിച്ചേര്‍ത്തു. ലോക്‌സഭാ തെരഞ്ഞെടുപ്പ് പരാജയത്തിനു നിരവധി പേര്‍ കാരണക്കാരാണ്. പാര്‍ട്ടിയുടെ പുനര്‍നിര്‍മാണത്തിന് കടുത്ത തീരുമാനങ്ങള്‍ ആവശ്യമാണെന്നും രാഹുല്‍ സൂചിപ്പിച്ചു. കോണ്‍ഗ്രസ് പാര്‍ട്ടിക്ക് ദീര്‍ഘ ചരിത്രവും പാരമ്ബര്യവും ഉണ്ട്. ഇതിലാണ് ഇന്ത്യയെ നെയ്‌തെടുത്തത്. ആരാണ് തങ്ങളെ നയിക്കുന്നത് എന്നത് സംബന്ധിച്ച് പാര്‍ട്ടി മികച്ച തീരുമാനമെടുക്കുമെന്ന് താന്‍ വിശ്വസിക്കുന്നതായും രാഹുല്‍ കത്തില്‍ പറഞ്ഞു.

തന്റെ ജീവരക്തം കോണ്‍ഗ്രസാണ്. പാര്‍ട്ടിയുടെ പുനര്‍നിര്‍മാണത്തിനു കടുത്ത തീരുമാനങ്ങള്‍ അനിവാര്യമാണെന്ന് ട്വിറ്ററിലൂടെ പുറത്തു വിട്ട രാജിക്കത്തില്‍ രാഹുല്‍ ഗാന്ധി വ്യക്തമാക്കി. പാര്‍ട്ടി അധ്യക്ഷ പദവിയിലേക്ക് താന്‍ ഒരാളെ നിര്‍ദേശിക്കില്ല. ഒട്ടും വൈകാതെ പാര്‍ട്ടി പുതിയ അധ്യക്ഷനെ തിരഞ്ഞെടുക്കണം. തോല്‍വിയുടെ ഉത്തരവാദിത്തം ഏറ്റെടുക്കുമ്‌ബോള്‍ തന്നെ തിരഞ്ഞെടുപ്പ് സമയത്ത് ഒറ്റക്ക് പോരാടിയതില്‍ അഭിമാനിക്കുന്നുവെന്നു പറഞ്ഞ് നേതാക്കളെ പരോക്ഷമായി വിമര്‍ശിക്കുകയാണ് രാഹുല്‍.
ഇന്ത്യ കെട്ടിപ്പെടുത്ത ആശയങ്ങള്‍ സംരക്ഷിക്കാന്‍ പ്രധാനമന്ത്രിയെയും ആര്‍എസ്എസിനേയും നേരിട്ടു. ആ സമയങ്ങളില്‍ താന്‍ പൂര്‍ണമായും ഒറ്റയ്ക്കായിരുന്നു. അതില്‍ താന്‍ അഭിമാനിക്കുന്നെന്നും രാഹുല്‍ പറഞ്ഞു. രാജ്യത്തിന്റെ ജീവരക്തമായി വര്‍ത്തിച്ച മൂല്യങ്ങളും ആദര്‍ശങ്ങളുമുള്ള പാര്‍ട്ടിയെ സേവിക്കാന്‍ അവസരം ലഭിച്ചത് ബഹുമതിയാണ്. രാജ്യത്തോടും തന്റെ സംഘടനയോടും നന്ദിയോടെയും സ്‌നേഹത്തോടെയും കടപ്പെട്ടിരിക്കുന്നു. രാഹുല്‍ കത്തില്‍ പറഞ്ഞു.