നാടുവിട്ടയാള്‍ ടിക് ടോകില്‍ കുടുങ്ങി തിരിച്ചെത്തി!
മൂന്നു വര്‍ഷം മുന്‍പ് നാടുവിട്ടുപോയ ഭര്‍ത്താവിനെ, യുവതി ടിക് ടോക്കിലൂടെ കണ്ടെത്തി. തമിഴ്‌നാട്ടിലെ വില്ലുപുരം ജില്ലയിലാണ് സംഭവം.
2016-ലാണ് സുരേഷ് എന്ന യുവാവ് നാടുവിട്ടത്. പൊലീസില്‍ പരാതി നല്‍കിയെങ്കിലും ഇയാളെ കണ്ടെത്താനുള്ള ശ്രമങ്ങള്‍ പരാജയപ്പെട്ടു.
എന്നാല്‍ ഏതാനും ദിവസങ്ങള്‍ക്കു മുന്‍പ് ജയപ്രദയുടെ ഒരു ബന്ധുവാണ് ടിക്ടോക്കില്‍ സുരേഷിന്റെ വിഡിയോകള്‍ കണ്ടത്. സ്ഥിരീകരിക്കാന്‍ വിഡിയോ ജയപ്രദയെ കാണിച്ചു. ഭര്‍ത്താവിനെ തിരിച്ചറിഞ്ഞ ജയപ്രദ പൊലീസില്‍ വിവരമറിയിച്ചു.
തുടര്‍ന്ന് നടത്തിയ അന്വേഷണത്തില്‍ ഇയാളെ ഹൊസൂരില്‍ നിന്നു കണ്ടെത്തി.ഒരു ട്രാക്ടര്‍ കമ്പനിയില്‍ മെകാനിക് ആയി ജോലി ചെയ്യുകയായിരുന്നു.
ഇവിടെ ഒരു ട്രാന്‍സ്‌ജെന്‍ഡര്‍ യുവതിക്കൊപ്പമാണ് താമസിച്ചിരുന്നത്. ഈ സ്ത്രീക്കൊപ്പം ചെയ്ത ടിക് ടോക് വിഡിയോകളാണ് സുരേഷിനെ കുടുക്കിയത്.
കുടുംബപ്രശ്‌നങ്ങളെ തുടര്‍ന്നാണ് നാടു വിട്ടതെന്ന് ഇയാള്‍ പൊലീസിനോടു പറഞ്ഞു. ജയപ്രദയേയും സുരേഷിനേയും കൗണ്‍സിലിങ്ങിനുശേഷം പൊലീസ് വീട്ടിലേക്ക് അയച്ചു.
https://www.facebook.com/Malayalivartha
