ഓണ്‍ലൈനിലൂടെ ബിയര്‍ ഓര്‍ഡര്‍ ചെയ്ത ബാങ്ക് ഉദ്യോഗസ്ഥയായ യുവതിക്ക് നഷ്ടമായത് 87000 രൂപ. മുംബൈയിലാണ് സംഭവം. പ്രമുഖ സ്വകാര്യ ബാങ്കിലെ ഇന്‍വെസ്റ്റ്‌മെന്റ് ബാങ്കിങ് അനലിസ്റ്റ് രാധിക പരേഖാണ് തട്ടിപ്പിന് ഇരയായത്. ഇവര്‍ പൊവൈ പോലീസ് സ്‌റ്റേഷനിലെത്തി പരാതി നല്‍കി.

സംഭവത്തെ കുറിച്ച യുവത് പറയുന്നത് ഇങ്ങനെ, ഓഗസ്റ്റ് 17ന് ജോലി കഴിഞ്ഞ് വീട്ടിലെത്തിയ രാധിക പരേഖ് മദ്യഷോപ്പില്‍ വിളിച്ച് മൂന്നു ബിയറിന് ഓര്‍ഡര്‍ ചെയ്തു. ഇതിനുള്ള പണം ഗൂഗിള്‍ പേ വഴി നല്‍കാനാണ് മദ്യഷോപ്പ് ജീവനക്കാരന്‍ നിര്‍ദേശിച്ചത്. ഇതനുസരിച്ച് രാധിക അവരുടെ യുപിഐ ഐഡി മദ്യഷോപ്പ് ജീവനക്കാരന് ഷെയര്‍ ചെയ്യുകയും ചെയ്തു.

ഇതിനു ശേഷം രാധികയുടെ അക്കൌണ്ടില്‍ നിന്ന് 29001 രൂപ നഷ്ടമായി. ഇക്കാര്യം ചോദിക്കാനായി അവര്‍ മദ്യഷോപ്പിലേക്ക് വീണ്ടും വിളിച്ചു. അപ്പോള്‍ അബദ്ധം പറ്റിയതാണെന്നും അധികമായി നഷ്ടമായ തുക മടക്കി നല്‍കാമെന്നും മദ്യഷോപ്പ് ജീവനക്കാരന്‍ അറിയിച്ചു.
എന്നാല്‍ ഈ ഫോണ്‍ കോള്‍ കട്ട് ചെയ്തു നോക്കിയപ്പോഴേക്കും 58000 രൂപ കൂടി അക്കൌണ്ടില്‍ നിന്ന് നഷ്ടമായതായി രാധിക മനസിലാക്കി. മദ്യഷോപ്പിലേക്ക് വീണ്ടും വിളിച്ചപ്പോള്‍ ഫോണ്‍ കോള്‍ ലഭിക്കുന്നുണ്ടായിരുന്നില്ല.

മദ്യഷോപ്പിന്റെ പേരില്‍ മറ്റൊരു നമ്ബര്‍ ഓണ്‍ലൈനില്‍ ഇട്ട് തട്ടിപ്പ് നടത്തുകയായിരുന്നുവെന്ന് രാധികയ്ക്ക് മനസിലായി. ഉടന്‍ തന്നെ പോവൈ പോലീസ് സ്‌റ്റേഷനിലെത്തി പരാതി നല്‍കുകയായിരുന്നു. പ്രാഥമിക അന്വേഷണത്തിനു ശേഷം ഐ.ടി ആക്ട് പ്രകാരം കേസ് രജിസ്റ്റര്‍ ചെയ്തു അന്വേഷണം ആരംഭിച്ചിട്ടുണ്ട്.