ലോക രാജ്യങ്ങളുടെ പിന്തുണയും അംഗീകാരവും ഏറ്റു വാങ്ങി ഇന്ത്യ മുന്നേറുകയാണ്. ഈ നേട്ടമെല്ലാം ആഗോള തലത്തിലും ശ്രദ്ധിക്കപ്പെടുകയാണ്. ആഗോളതലത്തിൽ അജണ്ടകള്‍ തീരുമാനിക്കുന്നതില്‍ ഇന്ത്യയുടെ ശബ്ദം മെച്ചപ്പെട്ടുവെന്ന് വിദേശകാര്യ മന്ത്രി എസ് ജയ്ശങ്കര്‍ പറഞ്ഞു. രണ്ടാം മോദി സര്‍ക്കാരിന്റെ നൂറാം ദിവസത്തിന്റെ ഭാഗമായി നടത്തിയ വാര്‍ത്താ സമ്മേളനത്തിനിടെയായിരുന്നു അദ്ദേഹം ഈ കാര്യം പറഞ്ഞത്.

ഇന്ത്യയും അമേരിക്കയും തമ്മിലുള്ള ബന്ധം വളരെ നല്ല നിലയിലാണെന്ന് അദ്ദേഹം അഭിപ്രായപ്പെട്ടു. ഇരുരാജ്യങ്ങളും തമ്മിലുള്ള ബന്ധം 90 ശതമാനം പൂര്‍ണവും 10 ശതമാനം ഭാഗികവുമാണെന്നാണ് അദ്ദേഹത്തിന്റെ നിരീക്ഷണം. എന്നാൽ ഏതൊരു ബന്ധത്തിലും പ്രശ്‌നങ്ങള്‍ സ്വാഭാവികമാണെന്നും അദ്ദേഹം കൂട്ടിച്ചേർക്കുകയുണ്ടായി . അതിര്‍ത്തി കടന്നുള്ള ഭീകരവാദമാണ് രാജ്യം നേരിടുന്ന ഏറ്റവും വലിയ വെല്ലുവിളിയെന്നും പാക്കിസ്ഥാൻറെ ഭാഗത്ത് നിന്നുമാണ് ഇന്ത്യ ഏറ്റവും കൂടുതല്‍ വെല്ലുവിളി നേരിടുന്നതെന്നും എസ് ജയ്ശങ്കര്‍ പറഞ്ഞു.