റിട്ട. ഹൈക്കോടതി ജഡ്ജിയും ഭാര്യയും മകനും മരുമകളെ ക്രൂരമായി മര്‍ദ്ദിക്കുന്നതിന്റെ ഞെട്ടിക്കുന്ന ദൃശ്യങ്ങള്‍ പുറത്ത്. 2017ല്‍ വിരമിച്ച നൂട്ടി രാമമോഹന റാവുവും ഭാര്യ നൂട്ടി ദുര്‍ഗ ജയ ലക്ഷ്മി മകന്‍ നൂട്ടി വസിഷ്ട എന്നിവരാണ് മകന്റെ ഭാര്യ സിന്ധുവിനെ സ്ത്രീധനമാവശ്യപ്പെട്ട് ക്രൂരമായി മര്‍ദ്ദിച്ചത്.

വാക്കുതര്‍ക്കത്തിനൊടുവില്‍ റാവുവിന്റെ മകന്‍ ഭാര്യയെ സോഫയിലേക്ക് തള്ളിയിടുന്നതും അടിക്കുന്നതും നിലത്ത് കൂടി വലിച്ചിഴയ്ക്കുന്നതും ദൃശ്യങ്ങളില്‍ വ്യക്തമാണ്. ഈ വര്‍ഷം ഏപ്രില്‍ 20-ന് നടന്ന മര്‍ദ്ദനത്തിന്റെ സിസിടിവി ദൃശ്യങ്ങളാണ് പുറത്ത് വന്നിരിക്കുന്നത്.

ഈ സമയമെല്ലാം ചെറുമക്കള്‍ സമീപത്തുണ്ടായിരുന്നു. കുടുംബാംഗങ്ങളുടെ മര്‍ദ്ദനത്തില്‍ നിന്നും അമ്മയെ രക്ഷിക്കുവാന്‍ ഈ കുരുന്നുകള്‍ അമ്മയ്ക്ക് അരികിലേക്ക് ഓടിയെത്തുന്നത് വീഡിയോയില്‍ കാണാം.

സ്ത്രീധനം ആവശ്യപ്പെട്ടായിരുന്നു ഇവരുടെ മര്‍ദ്ദനമെന്ന് ,ഗാര്‍ഹിക പീഡനമാരോപിച്ച് സിന്ധു ഇവര്‍ക്കെതിരെ പോലീസില്‍ നല്‍കിയ പരാതിയില്‍ വ്യക്തമാക്കിയിരുന്നു.

സംഭവ ദിവസം നൂട്ടി രാമമോഹന റാവുവും ഭാര്യ നൂട്ടി ദുര്‍ഗ ജയ ലക്ഷ്മി മകന്‍ നൂട്ടി വസിഷ്ടയും കൊച്ചുമക്കളും സിനിമയ്ക്കു പോയിരുന്നു. തിരികെ വീട്ടില്‍ വന്നപ്പോള്‍ സിന്ധു ഉറങ്ങുന്നതാണ് വസിഷ്ട കണ്ടത്. തുടര്‍ന്ന് ഇദ്ദേഹം സ്ത്രീധനമാവശ്യപ്പെട്ട് സിന്ധുവിനോട് വഴക്കുണ്ടാക്കുകയായിരുന്നു.

വഴക്ക് കൂടിയപ്പോള്‍ താന്‍ സഹായത്തിനായി ഒച്ചയുണ്ടാക്കിയെന്നും എന്നാല്‍ മുറിയിലെത്തിയ ഭര്‍ത്താവിന്റെ മാതാപിതാക്കള്‍ തന്നെ ഉപദ്രവിക്കുകയായിരുന്നുവെന്ന് സിന്ധു പറയുന്നു. മുറിയില്‍ നിന്നും പുറത്തിറങ്ങാന്‍ ശ്രമിച്ച തന്നെ അവര്‍ അതിക്രൂരമായി മര്‍ദ്ദിച്ചുവെന്നും സിന്ധു വ്യക്തമാക്കി. അതിഗുരുതരമായി പരിക്കേറ്റ സിന്ധുവിനെ ആശുപത്രിയില്‍ പ്രവേശിപ്പിച്ചിരുന്നു. നിയമനടപടിയുമായി മുന്‍പോട്ട് പോകുവാനാണ് തീരുമാനമെന്നാണ് സിന്ധു പറയുന്നത്.