സ്‌കൂള്‍ ഫീസടയ്ക്കാന്‍ പണം ചോദിച്ചതിന് ആറ് വയസുകാരിയായ സ്വന്തം മകളെ പിതാവ് കൊലപ്പെടുത്തി. ഹരിയാണയിലെ ദാബ്‌ഖേര ഗ്രാമത്തില്‍ ബുധനാഴ്ചയാണ് സംഭവം. പിതാവായ ജബ്‌സീറിന്റെ ഭാര്യ ഹരീന്ദര്‍ കൗറാണ് സംഭവം പോലീല്‍ അറിയിച്ചതും പരാതി നല്‍കിയതും. ഭര്‍ത്താവ് ദിവസ വേതനത്തിന് കൃഷിപ്പണി ചെയ്യുന്നയാളാണെന്നും ഏകമകള്‍ സുമിത്തിനെ ബുധനാഴ്ച രാത്രി കൊലപ്പെടുത്തിയെന്നും പരാതിയില്‍ പറയുന്നു. കുട്ടിക്ക് സ്‌കൂള്‍ ഫീസടയ്ക്കാന്‍ താന്‍ പണം ചോദിക്കുന്നത് ഭര്‍ത്താവിന് ഇഷ്ടപ്പെടാറില്ലെന്നും ഇതുസംബന്ധിച്ച തര്‍ക്കമാണ് കൊലപാതകത്തില്‍ കലാശിച്ചതെന്നും ഹരീന്ദര്‍ കൗര്‍ പോലീസിന് മൊഴി നല്‍കി. എന്നാല്‍, കൊലപാതകത്തിന്റെ കാരണം എന്താണെന്ന് സ്ഥിരീകരിക്കാന്‍ കഴിഞ്ഞിട്ടില്ലെന്നാണ് പോലീസ് പറയുന്നത്. വിശദമായ അന്വേഷണം നടത്തിയാലെ ഇക്കാര്യത്തില്‍ വ്യക്തത വരൂവെന്നും പോലീസ് പറഞ്ഞു.