ഐഎഫ്‌എഫ്‌ഐ സ്പെഷ്യല്‍ ഐക്കണ്‍ പുരസ്‌കാരം സ്വന്തമാക്കി നടൻ രജനികാന്ത്. ഡല്‍ഹിയില്‍ നടന്ന ചടങ്ങിൽ കേന്ദ്രമന്ത്രി പ്രകാശ് ജാവദേക്കര്‍ ആണ് പുരസ്‌കാരം പ്രഖ്യാപിച്ചത്. ഇന്ത്യൻ സിനിമയ്ക്ക് നൽകിയ സമഗ്ര സംഭാവനയ്ക്കുള്ള അംഗീകാരമായിട്ടാണ് ഇത് നൽകുന്നതെന്ന് പ്രകാശ് ജാവദേക്കര്‍ പറഞ്ഞു. ഗോവ അന്താരാഷ്ട്ര ചലച്ചിത്രോത്സവത്തിന്റെ ഭാഗമായിട്ടാണ് ഈ സ്പെഷ്യല്‍ ഐക്കണ്‍ അവാര്‍ഡ് നല്‍കുന്നത്.

വിദേശ താരത്തിനുള്ള ലൈഫ് ടൈം അച്ചീവ്‌മെന്റ് അവാര്‍ഡ് ഫ്രഞ്ച് നടി ഇസബേല്‍ ഹൂപെക്ക്. ഈ മാസം 20 മുതല്‍ 28 വരെ ചലച്ചിത്രമേള നടക്കും. മേളയുടെ ഉദ്ഘാടന ദിവസമാണ് പുരസ്‌കാരങ്ങള്‍ സമ്മാനിക്കുന്നത്. അതേസമയം മേളയുടെ വേദി ഗോവയില്‍ നിന്ന് മാറ്റില്ലെന്ന് മന്ത്രി പറഞ്ഞു. മാത്രമല്ല ചലച്ചിത്രമേളക്ക് ഫിലിം വില്ലേജ് പണിയുന്ന കാര്യത്തില്‍ അന്തിമ തീരുമാനം ഉടന്‍ എടുക്കുമെന്നും മന്ത്രി പറഞ്ഞു.