ദേശീയ പരത്വ നിയമഭേദഗതിക്കും പൗരത്വ രജിസ്റ്ററിനും എതിരെ ശക്തമായ പ്രക്ഷോഭം കോണ്ഗ്രസ് നടത്തുമ്പോള് പാര്ട്ടി അധ്യക്ഷ സോണിയാ ഗാന്ധി പൗരത്വ രജിസ്റ്ററിനെതിരെ മൗനംപാലിക്കുന്നത് എന്തുകൊണ്ട്?
ദേശീയ പരത്വ നിയമഭേദഗതിക്കും പൗരത്വ രജിസ്റ്ററിനും എതിരെ ശക്തമായ പ്രക്ഷോഭം കോണ്ഗ്രസ് നടത്തുമ്പോള് പാര്ട്ടി അധ്യക്ഷ സോണിയാ ഗാന്ധി പൗരത്വ രജിസ്റ്ററിനെതിരെ മൗനംപാലിക്കുന്നത് എന്തുകൊണ്ട്? കോണ്ഗ്രസിന്റെ മുന് ഉപദേശകനും ജെ.ഡി.യു ഉപാധ്യക്ഷനുമായ പ്രശാന്ത കിഷോറാണ് ഇക്കാര്യം ചോദിക്കുന്നത്. രണ്ടാഴ്ചയിലധികമായി രാജ്യത്ത് പ്രക്ഷോഭം തുടരുമ്പോഴും കോണ്ഗ്രസ് അധ്യക്ഷ പ്രതികരിക്കാത്തത് വിമര്ശകരുടെ വിരല് അവര്ക്ക് നേരെ തിരിയുമെന്ന് മുന്കൂട്ടികണ്ടാണെന്ന വിമര്ശനവും ഉയരുന്നു. 2003 ലാണ് പൗരത്വ നിയമ ഭേദഗതി പാര്ലമെന്റില് അവതരിപ്പിച്ചത്. 2004 മുതല് 2014 വരെ കോണ്ഗ്രസ് സര്ക്കാരാണ് കേന്ദ്രം ഭരിച്ചത്. നിയമം ഭരണഘടനാ വിരുദ്ധമാണെങ്കില് കോണ്ഗ്രസിന് ഭേദഗതി ചെയ്യാന് അവസരമുണ്ടായിരുന്നു. അതെന്തുകൊണ്ട് ചെയ്തില്ല എന്ന ചോദ്യം ഉയരുമെന്ന് ഭയന്നാണ് സോണിയാ ഗാന്ധി മൗനംപാലിക്കുന്നതെന്ന് പ്രശാന്ത് കിഷോര് ആരോപിക്കുന്നു.
പൗരത്വ ഭേദഗതി നടപ്പാക്കില്ലെന്ന് കോണ്ഗ്രസ് ഭരിക്കുന്ന നാല് സംസ്ഥാനങ്ങളും പ്രഖ്യാപിച്ചിട്ടുണ്ട്. എന്നാല് എന്ആര്സിയുടെ കാര്യത്തില് തീരുമാനം പരസ്യമാക്കിയിട്ടില്ല. കോണ്ഗ്രസ് വര്ക്കിംഗ് കമ്മിറ്റിയാണ് ഇക്കാര്യത്തില് തീരുമാനം എടുക്കേണ്ടത്. കോണ്ഗ്രസില് നിന്നും ഉള്പ്പെടെ 10 മുഖ്യമന്ത്രിമാര് എന്ആര്സി നടത്തില്ലെന്ന് വ്യക്തമാക്കിയിട്ടുണ്ട്. നിതീഷ് കുമാര്, നവീന് ബാബു, മമതാ ദീദി, ജഗന് മോഹന് റെഡ്ഡി എന്നിവരെല്ലാം അവരുടെ പാര്ട്ടി മേധാവികളുമാണ്. എന്നാല് കോണ്ഗ്രസ് മുഖ്യമന്ത്രിമാരുടെ അവസ്ഥ അതല്ല. അന്തിമതീരുമാനം വര്ക്കിംഗ് കമ്മിറ്റിയാണ് എടുക്കേണ്ടത്. എ.ഐ.സി.സി അംഹം എ.കെ ആന്റണി എന്.ആര്.സിക്കെതിരെ രംഗത്തെത്തിയിട്ടുണ്ട്. അതിനാല് പാര്ട്ടി നിലപാട് താമസിക്കാതെ ഉണ്ടാകുമെന്നാണ് അറിയുന്നത്.
സുപ്രീംകോടതി ഉത്തരവ് പ്രകാരം അസമില് നടത്തിയ ദേശീയ പൗരത്വ രജിസ്റ്ററില് 19 ലക്ഷം പേരാണ് പട്ടികയ്ക്ക് പുറത്തായത്. അതില് 12 ലക്ഷത്തിലധികം പേര് ഹിന്ദുക്കളാണ്. ഇവരെല്ലാം ട്രൈബ്യൂണലിനെ സമീപിച്ചിരിക്കുകയാണ്. എന്.ആര്.സി ആസാമില് മാത്രമല്ല, എല്ലാ സംസ്ഥാനങ്ങളിലും നടപ്പാക്കുമെന്നാണ് ആഭ്യന്തരമന്ത്രി അമിത്ഷാ പാര്ലമെന്റില് വ്യക്തമാക്കിയത്. തൊട്ട് പിന്നാലെ എന്.ആര്.സിയുടെ കരട് പോലും ആയിട്ടില്ലെന്ന് പ്രധാനമന്ത്രി വ്യക്തമാക്കി. എന്നിട്ടും കോണ്ഗ്രസ് അധ്യക്ഷ തന്റെ നിലപാട് അറിയിച്ചിട്ടില്ല എന്നത് ശ്രദ്ധേയമാണ്. കാലങ്ങളായി കോണ്ഗ്രസ് സ്വീകരിച്ചുപോരുന്ന മൃദുഹിന്ദുത്വ സമീപമാണ് ബി.ജെ.പിക്ക് ഇന്ധനവും ആയുധവും ആകുന്നത്. അതുകൊണ്ടാണ് വ്യക്തിയെ രാജ്യദ്രോഹിയായി പ്രഖ്യാപിക്കാന് സര്ക്കാരിന് അധികാരം നല്കുന്ന യു.എ.പി.എ ഭേദഗതി ബി.ജെ.പി സര്ക്കാര് കൊണ്ടുവന്നപ്പോള് കോണ്ഗ്രസ് എതിര്ക്കാതിരുന്നത്.
യു.എ.പി.എ പോലുള്ള കരിനിയമങ്ങള് രാജ്യത്ത് കോണ്ഗ്രസ് നടപ്പാക്കിയത് കൊണ്ടാണ് നൂറ് കണക്കിന് ന്യൂനപക്ഷ സമുദായത്തില് പെട്ടവര് പല ജയലുകളിലും വിചാരണ പോലും കൂടാതെ തടവില് കഴിയുന്നത്. കോഴിക്കോട് പന്തീരങ്കാവില് യു.എ.പി.എ ചുമത്തി അറസ്റ്റിലായ സി.പി.എം പ്രവര്ത്തകരായ അലനും താഹയും ഇനി എന്ന് വെളിച്ചം കാണുമെന്ന് ആര്ക്കും അറിയില്ല. പൗരത്വനിയമ ഭേദഗതി യു.പി.എ സര്ക്കാര് കൊണ്ടുവന്നപ്പോള് അതില് മതം പ്രശ്നമേ ആയിരുന്നില്ലെന്നാണ് അന്നത്തെ ആഭ്യന്തരമന്ത്രിയായിരുന്ന പി.ചിദംബരം പറയുന്നത്. പക്ഷെ, അന്ന് കോണ്ഗ്രസിന്റെ ഉപദേശകനായിരുന്ന പ്രശാന്ത കിഷോര് മറിച്ചാണ് ആരോപിക്കുന്നത്. അതുകൊണ്ട് ഏതാണ് യാഥാര്ത്ഥ്യമെന്ന് അറിയണമെങ്കില് കോണ്ഗ്രസ് അധ്യക്ഷ മൗനംവെടിഞ്ഞ്, രേഖകള് സഹിതം ഹാജരാക്കി നിലപാട് വ്യക്തമാക്കണം.
https://www.facebook.com/Malayalivartha