തമിഴകം ഏറെനാളായി ആകാംക്ഷയോടെ കാത്തിരിക്കുന്നതാണ് സ്‌റ്റെല്‍ മന്നന്‍ രജിനികാന്തിന്റെ രാഷ്ട്രീയ പ്രവേശനം. ഇപ്പോഴിതാ രാഷ്ട്രീയ പ്രവേശത്തെക്കുറിച്ചുള്ള ഊഹാപോഹങ്ങള്‍ക്ക് മറുപടിയുമായി എത്തിയിരിക്കുകയാണ് രജനികാന്ത്.ഏറെ നാളുകളായി രാഷ്ട്രീയ പ്രവേശനത്തെക്കുറിച്ച്‌ ഗൗരവകരമായി ആലോചിക്കുന്നുവെന്നും മോശമായ ഭരണ സംവിധാനത്തെ നന്നാക്കണമെന്നുമാണ് രജനീകാന്ത് മനസ് തുറന്നിരിക്കുന്നത്. ഡി.എം.കെ,​ എ.ഐ.എ.ഡി.എം.കെയ്ക്കെതിരെയും രജനീകാന്ത് രൂക്ഷ വിമര്‍ശനം ഉന്നയിച്ചു.

രണ്ട് അസുരശക്തികളെന്നായിരുന്നു ഇരുപാര്‍ട്ടികളെയും രജനീകാന്ത് പരമാര്‍ശിച്ചത്. തിരഞ്ഞെടുപ്പ് സമയത്ത് മാത്രമാണ് ഈ പാര്‍ട്ടികള്‍ രംഗത്തു വരുന്നതെന്നും,​ പണബലവും ആള്‍ബലവുമുള്ള" പാര്‍ട്ടിയാണെന്നും രജനീകാന്ത് വിമര്‍ശിച്ചു. ചെന്നൈ രാഘവേന്ദ്ര കല്യാണ മണ്ഡപത്തില്‍ രാവിലെ എട്ട് മണിക്ക് രജനികാന്ത് മക്കള്‍ മന്‍ട്രം ഭാരവാഹികളുമായി നടത്തിയ യോഗത്തിന് ശേഷം വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.

മുഖ്യമന്ത്രിയാകണമെന്ന് ഒരിക്കലും ചിന്തിച്ചിട്ടില്ലന്ന് രജനികാന്ത് വ്യക്തമാക്കി. വിരമിച്ച ഉദ്യോഗസ്ഥരെ അടക്കം രാഷ്ട്രീയത്തില്‍ കൊണ്ടുവരുമെന്നും വാഗ്ദാനങ്ങള്‍ നിറവേറ്റാന്‍ വിദഗ്ധസമിതി രൂപീകരിക്കുമെന്നും അദ്ദേഹം വ്യക്തമാക്കി.

നിലവിലെ രാഷ്ട്രീയവും വ്യവസ്ഥയും മാറണം. മാറ്റം ജനങ്ങളുടെ മനസിലുണ്ടാകണം. പാര്‍ട്ടി പ്രസിഡന്റിന് ഭരണത്തില്‍ ഇടപെടാനാകില്ല. അധികാര സ്ഥാനങ്ങളിലുള്ളവര്‍ 50 വയസ് കഴിഞ്ഞവരാണ്. പാര്‍ട്ടിയില്‍ യുവരക്തം വേണം. പ്രായ പരിധിയും വിദ്യാഭ്യാസ യോഗ്യതയും പ്രധാനമാണ്. ഭരണസംവിധാനം പൂര്‍ണമായും അധപതിച്ചിരിക്കുന്നു എന്നും രജനീകാന്ത് പ്രതികരിച്ചു. അതേസമയം,​ രാഷ്ട്രീയ പാര്‍ട്ടിയെ കുറിച്ച്‌ പത്രസമ്മേളനത്തില്‍ അദ്ദേഹം വ്യക്തമാക്കിയില്ല.