പറയാനുള്ളത് പറഞ്ഞിരിക്കും; ആദായ നികുതി വകുപ്പിന്റെ റെയ്ഡ് അടക്കം എല്ലാ വിവാദ വിഷയങ്ങള്‍ക്കും ഉള്ള മറുപടി നടന്‍ വിജയ് അടുത്ത മാസം നല്‍കുമെന്ന് പിതാവ് എസ്.എ. ചന്ദ്രശേഖര്‍
ആദായ നികുതി വകുപ്പിന്റെ റെയ്ഡ് അടക്കം എല്ലാ വിവാദ വിഷയങ്ങള്‍ക്കും ഉള്ള മറുപടി നടന്‍ വിജയ്് അടുത്ത മാസം നല്‍കുമെന്ന് പിതാവ് എസ്.എ. ചന്ദ്രശേഖര്‍. അടുത്ത മാസം റിലീസാകുന്ന മാസ്റ്റര്‍ സിനിമയുടെ ഓഡിയോ ലോഞ്ചിലായിരിക്കും താരം, എല്ലാ വിവാദ വിഷയങ്ങള്‍ക്കും മറുപടി പറയുന്നതെന്നും പിതാവ് എസ്.എ ചന്ദ്രശേഖര്‍ ഒരു ചാനലിന് നല്‍കിയ അഭിമുഖത്തില്‍ വ്യക്തമാക്കി. വിജയ ഉടന്‍ രാഷ്ട്രീയത്തില്‍ പ്രവേശിക്കുമെന്ന അഭ്യൂഹങ്ങളും ചന്ദ്രശേഖര്‍ തള്ളിക്കളഞ്ഞു. ഇപ്പോള്‍ രാഷ്ട്രീയത്തിലിറങ്ങാന്‍ വിജയ് ഉദ്ദേശിക്കുന്നില്ലെന്നും സിനിമയിലാണ് ശ്രദ്ധയെന്നും അദ്ദേഹം വ്യക്തമാക്കി. കുടുംബത്തിനെതിരെ തെറ്റായ പ്രചാരണം നടത്തിയാലും സമൂഹത്തോട് ഒരു കലാകാരന് പറയാനുള്ളത് വിജയ് പറഞ്ഞിരിക്കും ചന്ദ്രശേഖര്‍ വ്യക്തമാക്കി.
അതേസമയം, മെര്‍സലില്‍ ജി.എസ്.ടിയെ വിമര്‍ശിച്ചത്് ഉള്‍പ്പെടെയുള്ള സിനിമ ഡയലോഗുകള്‍ വിജയുടെ നിലപാടാണെന്ന ആരോപണങ്ങളോട് പിതാവ് പ്രതികരിച്ചത് ഇങ്ങിനെ. വീട്ടില്‍ ക്രിസ്ത്യന്‍ മതാചാരങ്ങള്‍ പാലിക്കുന്നുണ്ടെങ്കിലും സ്വന്തം മതം ഒരിക്കലും പുറത്തുകാണിക്കാറില്ല. മതമല്ല നല്ല തിരക്കഥയാണോ മികച്ച സംവിധായകനാണോ എന്നതു മാത്രാണ് സിനിമ ചെയ്യാനുള്ള മാനദണ്ഡമെന്നും സമൂഹമാധ്യമങ്ങളിലെ കുപ്രചാരണങ്ങള്‍ക്കുള്ള മറുപടിയായി ചന്ദ്രശേഖര്‍ പറഞ്ഞു.
കഴിഞ്ഞ ദിവസം വിജയ്യുടെ ചെന്നൈയിലെ വസതിയില്‍ ആദായ നികുതി വകുപ്പിന്റെ റെയ്ഡ നടത്തിയിരുന്നു. ചെന്നൈ പനയൂരിലെ ഇസിആര്‍ റോഡിലെ വീട്ടിലും തൊട്ടടുത്തുള്ള ഓഫീസിലുമാണ് റെയ്ഡ് നടന്നത്. വിജയ്യുടെ ഏറ്റവും പുതിയ സിനിമയായ 'മാസ്റ്റേഴ്സി'ന്റെ നിര്‍മാതാവ് ലളിത് കുമാറിന്റെ വീട്ടിലും നേരത്തെ ആദായ നികുതിവകുപ്പ് പരിശോധന നടത്തിയിരുന്നു. ഇതിന്റെ തുടര്‍ച്ചയായാണ് വിജയിയുടെ വീട്ടില്‍ നടന്ന പരിശോധന. കൂടാതെ, 'ബിഗില്‍' സിനിമയ്ക്ക് ലഭിച്ച പ്രതിഫലത്തെ സംബന്ധിച്ചുള്ള വിശദമായ അന്വേഷണത്തിനും കൂടിയാണ് ആദായനികുതി വകുപ്പ് അധികൃതര്‍ നടന്‍ വിജയിയുടെ വീട്ടില്‍ വീണ്ടും റെയ്ഡ് നടത്തിയതെന്നും റിപ്പോര്‍ട്ടുകളുണ്ടായിരുന്നു.
മാര്‍ച്ച് 15ന് നടക്കുന്ന 'മാസ്റ്റര്‍' സിനിമയുടെ ഓഡിയോ ലോഞ്ചില്‍ ഭരണകക്ഷികള്‍ക്കെതിരെ നടന്‍ വിജയ് ശക്തമായ വിമര്‍ശനാത്മക പ്രസ്താവനകള്‍ നടത്തുമെന്ന് റിപ്പോര്‍ട്ടുകളുണ്ടായിരുന്നു. അതിനാല്‍ ഇപ്പോള്‍ നടക്കുന്ന റെയ്ഡും വിജയിക്കെതിരായ രാഷ്ട്രീയ പകപോക്കലായാണ് ആരാധകര്‍ കാണുന്നത്. എന്നാല്‍, വിജയ് ഇപ്പോള്‍ വിദേശത്താണ്. ഓഡിയോ ലോഞ്ചിനായി കൃത്യസമയത്ത് നാട്ടിലേക്ക് മടങ്ങുമെന്ന്് പ്രതീക്ഷിക്കുന്നത്. അതേസമയം, സൂപ്പ്ര് താരം രജനീകാന്ത് തന്റെ രാഷ്ട്രീയ പാര്‍ട്ടിയുടെ ആശയപ്രഖ്യാപനം നടത്തിയ ദിവസം തന്നെയാണ് നടന്‍ വിജയിക്കെതിരേ വീണ്ടും റെയ്ഡ് നടന്നതെന്ന്ത് ശ്രദ്ധേയമായി.
ഒന്നരമാസത്തിനിടെ ഇത് രണ്ടാം തവണയാണ് വിജയ് ചിത്രവുമായി ബന്ധപ്പെട്ടവരുടെ വസതിയില്‍ ആദയനികുതി വകുപ്പ് റെയ്ഡ് നടത്തുന്നത്. കഴിഞ്ഞമാസം താരത്തിന്റെ സാലിഗ്രാമത്തിലും പനിയൂരിലുമുള്ള വസതികളില്‍ റെയ്ഡ് നടത്തിയിരുന്നു. ഫൈനാന്‍ഷ്യര്‍ അന്‍പുച്ചെഴിയനുമായുള്ള ബന്ധത്തിന്റെ അടിസ്ഥാനത്തിലായിരുന്നു റെയ്ഡ് നടത്തിയത്. അന്ന് ആദായ നികുതി ഉദ്യോഗസ്ഥര്‍ നെയ്വേലിയിലെ 'മാസ്റ്റര്‍' ഷൂട്ടിംഗ് സ്ഥലത്ത് റെയ്ഡ് നടത്തി മുപ്പത്തിയഞ്ച് മണിക്കൂറോളം നേരം അന്വേഷണത്തിനായി വിജയിയെ ചോദ്യംചെയ്തിരുന്നു.
https://www.facebook.com/Malayalivartha
