അധികാരത്തില്‍ ഇരിക്കുന്നവര്‍ക്കും സാധാരണക്കാര്‍ക്കും ഒരേ നിയമമെന്ന് പറയാറുണ്ടെങ്കിലും അത് നടപ്പാകാറില്ല എന്ന് വീണ്ടും തെളിയുന്നു. അധികാരത്തിന്റെ സ്ഥാനത്തിരിക്കുന്നവന് ബില്ലൊന്നും ഒരു പ്രശ്‌നമല്ല, നയാപൈസയും അടക്കാതിരുന്നാലും ആരും ചോദിക്കാന്‍ വരില്ലെന്ന കാര്യം ഉറപ്പാണ്. കേന്ദ്രമന്ത്രി സ്മൃതി ഇറാനിയും മുന്‍ പ്രധാനമന്ത്രിമാരായ ഡോ. മന്മോഹന്‍ സിങ്, എച്ച് ഡി ദേവഗൗഡയും വൈദ്യുതി ബില്ല് അടക്കുന്ന കാര്യത്തില്‍ സ്ഥിരമായി വീഴ്ച്ച വരുത്തുന്നവരാണ്. അധികാര കേന്ദ്രത്തില്‍ ഇരിക്കുന്നവര്‍ ആയതിനാല്‍ ഫ്യൂസൂരാന്‍ ആരും പോകുന്നുമില്ല.
കോണ്‍ഗ്രസ് അധ്യക്ഷ സോണിയാ ഗാന്ധി അടക്കം 300 എംപിമാരാണ് വൈദ്യുതി ബില്ലും വാട്ടര്‍ബില്ലും അടയ്ക്കാത്തവരുടെ കൂട്ടത്തിലുള്ളത്. ഇതില്‍ കേന്ദ്രമന്ത്രിമാരായ സ്മൃതി ഇറാനി, നജ്മ ഹെപ്തുള്ള, രാംവിലാസ് പസ്വാന്‍ എന്നിവരും ഉള്‍പ്പെടുന്നു. മുതിര്‍ന്ന ബിജെപി.നേതാവ് എല്‍.കെ.അദ്വാനി, കോണ്‍ഗ്രസ് നേതാക്കളായ ദിഗ്‌വിജയ് സിങ്, ജഗദീഷ് ടൈറ്റ്‌ലര്‍ എന്നിവരും ബില്‍ കുടിശ്ശികവരുത്തിയവരുടെ പട്ടികയിലുണ്ട്. 2014 ഡിസംബര്‍വരെയുള്ള കുടിശ്ശികക്കാരുടെ പേര് ന്യൂഡല്‍ഹി മുനിസിപ്പല്‍ കൗണ്‍സിലാണ് പുറത്തുവിട്ടത്. ലോക്‌സഭയിലെ 166 എംപി.മാരുടെയും രാജ്യസഭയിലെ 151 എംപി.മാരുടെയും പേരുകളാണിതിലുള്ളത്. മുന്‍ കേന്ദ്രമന്ത്രി ജയ്ന്‍ നാരായണ്‍ പ്രസാദ് നിഷാദ്, ദേവഗൗഡ, തെലങ്കാന മുഖ്യമന്ത്രി ചന്ദ്രശേഖരറാവു എന്നിവരാണു പട്ടികയില്‍ മുന്നിലുള്ളത്.
രണ്ടിനത്തിലുമായി നിഷാദ് 18.47 ലക്ഷം രൂപയാണ് അടയ്ക്കാനുള്ളത്. ദേവഗൗഡ 1.49 ലക്ഷവും റാവു 1.27 ലക്ഷവും അടയ്ക്കാനുണ്ട്. മന്മോഹന്‍ സിങ് 22,934 രൂപയും സോണിയാഗാന്ധി 193 രൂപയും ജയറാം രമേശ് 206 രൂപയുമാണ് അടയ്ക്കാനുള്ളത്.
ദിഗ്‌വിജയ് സിങ് 25,484 രൂപ, ജഗദംബിക പാല്‍ 30,953, പസ്വാന്‍ 49,464, ശശി തരൂര്‍ 7,374, അദ്വാനി 3,311, സ്മൃതി ഇറാനി 12,934, നജ്മ ഹെപ്തുള്ള 1,627 എന്നിങ്ങനെയാണു ബാക്കിയുള്ളത്.
മറ്റുനേതാക്കളുടെ കുടിശ്ശിക: അമര്‍സിങ്1.47 ലക്ഷം, മോത്തിലാല്‍ വോറ1.31 ലക്ഷം, രാജ്പാല്‍ സിങ് സൈനി76,934, പല്‍വൈ ഗോവര്‍ധന്‍ റെഡ്ഡി68,134. ഇക്കാര്യം ചൂണ്ടിക്കാട്ടി എന്‍.ഡി.എം.സി. കേന്ദ്ര പൊതുമരാമത്ത് വകുപ്പിനും ലോക്‌സഭാരാജ്യസഭാ എംപി.മാരുടെ ഹൗസിങ് കമ്മിറ്റികള്‍ക്കും കത്തയച്ചിട്ടുണ്ട്. ഭരണഘടനാപദവികളിലുള്ളവരുടെ താമസസ്ഥലങ്ങളിലെ വൈദ്യുതികുടിവെള്ള ബില്ലുകള്‍ അവരവരുടെ ശമ്പളത്തില്‍നിന്ന് കുറയ്ക്കും. ഇതിനെക്കുറിച്ച് റിമൈന്‍ഡറുകളും അയച്ചിട്ടുണ്ട്.
അധികാര ഭ്രഷ്ടരാക്കിയാലും ഔദ്യോഗിക വസതികള്‍ വെടിയാന്‍ മടിക്കുന്ന നേതാക്കളെ എങ്ങനെ ഒഴിവാക്കുമെന്നതാണ് ഡല്‍ഹിയിലെ അധികൃതരുടെ പ്രധാന പ്രശ്‌നം. കോണ്‍ഗ്രസ് ഭരണകാലത്ത് തരപ്പെടുത്തിയ വസതികള്‍ ബിജെപി അധികാരത്തില്‍ എത്തിയിട്ടും ഒഴിയാന്‍ തയ്യാറാകാതെ നിന്നത് ഏറെ വിവാദമായിരുന്നു. ഇത്തരം ആള്‍ക്കാരില്‍ നിന്നും എങ്ങനെ വൈദ്യുതി ബില്‍ ഈടാക്കുമെന്ന സംശയത്തിലാണ് ഉദ്യോഗസ്ഥരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha