ചായ നല്‍കാന്‍ വൈകിയതിന് ഹോട്ടലുടമയെ രണ്ടംഗസംഘം കുത്തിക്കൊലപ്പെടുത്തി. ഹൈദരാബാദിലെ തിരക്കേറിയ ബെഗുംപേട്ട് മേഖലയില്‍ വെള്ളിയാഴ്ചയാണ് സംഭവമുണ്ടായത്. ഹോട്ടല്‍ ഉടമ ജഹാംഗീറിനാണ് ജീവന്‍ നഷ്ടമായത്. കൊലയാളികളെ തിരിച്ചറിയാന്‍ കഴിഞ്ഞില്ല.
കടയിലെത്തിയ രണ്ടുപേര്‍ ചായ ആവശ്യപ്പെട്ടു. എന്നാല്‍ ഇത് എത്തിക്കുന്നതില്‍ ജീവനക്കാരന്‍ താമസം വരുത്തിയതിന് അക്രമികള്‍ ഇയാളുമായി വഴക്കുണ്ടാക്കി. ഇതില്‍ ഇടപെട്ട ജഹാംഗീര്‍ ജീവനക്കാരനെ രക്ഷപ്പെടുത്തുകയും അക്രമികളെ മടക്കി അയക്കുകയും ചെയ്തു. ജഹാംഗീറിനെ ഭീഷണിപ്പെടുത്തിയ ശേഷം മടങ്ങിപ്പോയ സംഘം വൈകാതെ തിരിച്ചെത്തി ആക്രമണം നടത്തുകയായിരുന്നു. ഹോട്ടലില്‍ ഭീകരാന്തരീക്ഷം സൃഷ്ടിച്ചശേഷമായിരുന്നു ആക്രമണം. ആശുപത്രിയിലേക്ക് കൊണ്ടുപോകുന്നതിനിടെ ജഹാംഗീര്‍ മരണമടഞ്ഞു.
അക്രമികളുടെ ദൃശ്യങ്ങള്‍ സിസിടിവി കാമറയില്‍ പതിഞ്ഞിട്ടുണ്ടെന്ന് പോലീസ് പറഞ്ഞു. പ്രതികള്‍ ക്രിമിനല്‍ പശ്ചാത്തലമുള്ളവരാണെന്നും അതിനാല്‍ വൈകാതെ കണ്ടെത്താന്‍ കഴിയുമെന്നാണ് പോലീസ് പറയുന്നത്. അക്രമികള്‍ക്ക് ഹോട്ടലുടമയുമായി മുന്‍ വൈരാഗ്യമുണ്ടായിരുന്നോയെന്നും പോലീസ് പരിശോധിക്കുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha