തന്റെ സഹോദരന്‍റെ ഭാര്യയുടെ ഗര്‍ഭസ്ഥ ശിശുവിനെ സമൂഹമാധ്യമങ്ങളിലൂടെ വില്‍ക്കാന്‍ ശ്രമിച്ച മുപ്പതുകാരന്‍ പോലീസിന്റെ പിടിയില്ലായി. കുറച്ച് കാലം മുന്‍പ് ഭര്‍ത്താവില്‍ നിന്ന് വിവാഹമോചനം നേടിയ യുവതിയുടെ കുഞ്ഞനിനെയാണ് സമൂഹമാധ്യമങ്ങളില്‍ വില്‍പനയ്ക്കായി വച്ചത്. മഹാരാഷ്ട്രയിലെ രഞ്ജന്‍ഗോ ഷെന്‍പുഞ്ചി സ്വദേശിയായ ശിവശങ്കര്‍ തഗാഡേ എന്നയാളെയാണ് പൊലീസ് ഇതിനോടകം തന്നെ അറസ്റ്റ് ചെയ്തത്.

എന്നാല്‍ പ്രതി വ്യക്തമാക്കിയത് സഹോദരന്‍റെ ഭാര്യ വീണ്ടും വിവാഹിതയാവാനാണ് താന്‍ ഇത്തരമൊരു പ്രവൃത്തി ചെയ്തതെന്നാണ്. സഹോദര ഭാര്യയുടെ ഗര്‍ഭസ്ഥ ശിശു വിവാഹ ആലോചനകള്‍ക്ക് വെല്ലുവിളിയായതോടെയാണ് വിചിത്രമായ ആശയവുമായി ശിവശങ്കറെത്തിയത്. സാമൂഹ്യ മാധ്യമമായ ഫേസ്ബുക്ക് വഴി കുഞ്ഞിനെ വില്‍പനയ്ക്ക് വക്കുകയും തുടർന്ന് ആവശ്യക്കാരെ കണ്ടെത്തുകയും ചെയ്ത ഇയാള്‍ കുഞ്ഞിന് വന്‍തുകയാണ് പറഞ്ഞുറപ്പിച്ചത്.

അതേസമയം വനിതാ ശിശുക്ഷേമ വകുപ്പിന് വില്‍പനയെക്കുറിച്ച് വിവരം ലഭിച്ചതോടെയാണ് ഇയാള്‍ പിടിയിലായത്. ഇതേതുടർന്ന് ഞായറാഴ്ച കുഞ്ഞിനുള്ള അഡ്വാന്‍സ് കൈപ്പറ്റാനുള്ള ശ്രമത്തിനിടയിലാണ് ഇയാളെ പൊലീസ് പിടികൂടിയത്. സംഭവത്തെക്കുറിച്ച് വിശദമായി അന്വേഷണം നടക്കുകയാണെന്ന് പൊലീസ് വിശദമാക്കുകയുണ്ടായി. ജുവനൈല്‍ ജസ്റ്റിസ് ആക്ട് അനുസരിച്ചാണ് ഇയ്യാൾക്കെതിരെ പോലീസ് കേസെടുത്തിരിക്കുന്നത്.