കോവിഡ് പോരാട്ടത്തിനിടെ ജീവന്‍ നഷ്ടമാകുന്ന ഉദ്യോഗസ്ഥരുടെ ആശ്രിതര്‍ക്ക് 50 ലക്ഷവും സര്‍ക്കാര്‍ ജോലിയും നല്‍കുമെന്ന് തമിഴ്‌നാട് മുഖ്യമന്ത്രി
ലോകത്തെ മുഴുവന്‍ ദുരിതത്തിലാക്കിയ കോവിഡ് 19 നെതിരെയള്ള പോരാട്ടത്തിനിടെ ജീവന്‍ നഷ്ടമാകുന്ന ഉദ്യോഗസ്ഥരുടെ ആശ്രിതര്‍ക്ക് 50 ലക്ഷം നഷ്ടപരിഹാരമായി നല്‍കുമെന്ന് തമിഴ്മാട് സര്‍ക്കാര്‍. കുടുംബാംഗത്തിന് യോഗ്യതകളുടെ അടിസ്ഥാനത്തില്‍ സര്‍ക്കാര്‍ ജോലിയും നല്‍കുമെന്ന് തമിഴ്‌നാട് മുഖ്യമന്ത്രി എടപ്പാടി കെ. പളനിസ്വാമി ബുധനാഴ്ച പ്രഖ്യാപിച്ചു.
കോവിഡ് പ്രതിരോധത്തിന് യുദ്ധകാലാടിസ്ഥാനത്തില്‍ പ്രവര്‍ത്തിക്കുന്ന ആരോഗ്യം, പൊലീസ്, മറ്റുസര്‍ക്കാര്‍ വകുപ്പുകള്‍ എന്നിവയിലെ ജീവനക്കാര്‍ക്ക് ഇത് ബാധകമാണ്. കോവിഡ് ബാധിച്ച് മരിക്കുന്ന ആരോഗ്യ പ്രവര്‍ത്തകര്‍ക്ക് കേന്ദ്ര സര്‍ക്കാര്‍ 50 ലക്ഷം രൂപയുടെ മെഡിക്കല്‍ ഇന്‍ഷുറന്‍സ് പ്രഖ്യാപിച്ചിട്ടുണ്ട്. ശവസംസ്‌കാര ചടങ്ങുകള്‍ക്ക് സംരക്ഷണം നല്‍കാന്‍ സംസ്ഥാന സര്‍ക്കാര്‍ എല്ലാ നടപടികളും സ്വീകരിക്കുമെന്നും മുഖ്യമന്ത്രി പറഞ്ഞു. ചെന്നൈയില്‍ ഡോക്ടറുടെ ശവസംസ്‌കാരം ജനക്കൂട്ടം തടയുകയും മൃതദേഹവുമായെത്തിയവരെ ആക്രമിക്കുകയും ചെയ്ത സാഹചര്യത്തിലാണ് മുഖ്യമന്ത്രിയുടെ പ്രഖ്യാപനം.
ഡോക്ടര്‍മാരും നഴ്‌സുമാരും ഉള്‍പ്പെടെയുള്ള ആരോഗ്യ പ്രവര്‍ത്തകര്‍ക്ക് സര്‍ക്കാര്‍, സ്വകാര്യ ആശുപത്രി എന്ന വ്യത്യാസമില്ലാതെ നഷ്ടപരിഹാരം നല്‍കും. കോവിഡ് കേസുകള്‍ വേഗത്തില്‍ നിര്‍ണയിക്കാന്‍ സ്‌ക്രീനിങ് ശ്രമങ്ങള്‍ ശക്തമാക്കണമെന്ന് ഉദ്യോഗസ്ഥരോട് നിര്‍ദ്ദേശിച്ചതായും മുഖ്യമന്ത്രി പറഞ്ഞു.
https://www.facebook.com/Malayalivartha
