ഒരു പ്രതിസന്ധി ഘട്ടത്തിൽ പ്രധാനമന്ത്രി നരേന്ദ്രമോദി അനുഗ്രഹം തേടിയെത്തിയത് 106 വയസിനോടടുത്ത ഉത്തര്‍പ്രദേശുകാരൻ നാരായണിന്റെ അടുത്താണ്. ഈ വിഷമഘട്ടത്തില്‍ എനിക്ക് അങ്ങയുടെ അനുഗ്രഹം ആവശ്യമാണ് എന്ന് പറഞ്ഞുകൊണ്ടാണ് ഇന്ത്യയുടെ പ്രധാനമന്ത്രി നാരായണിനെ ഫോണിൽ ബന്ധപ്പെട്ടത്. തന്നെ ആ വ്യക്തിക്ക് മോദിയുടെ ജീവിതത്തിൽ നൽകിയിട്ടുള്ള പ്രാധാന്യം അത്രയേറെയാണെന്ന് മനസിലാക്കാൻ സാധിക്കും.

ബി.ജെ.പിയുടെ പ്രഥമരൂപമായിരുന്ന ജനസംഘത്തിന്റെ സ്ഥാപക നേതാക്കളില്‍ ഒരാളാണ് അടുപ്പക്കാര്‍ ബുലായി ഭായ് എന്നു വിളിക്കുന്ന നാരായണ്‍. ശ്യാമപ്രസാദ് മുഖര്‍ജിയ്‌ക്കും അടല്‍ബിഹാരി വാജ്‌പേയ്‌ക്കൊപ്പം പ്രവര്‍ത്തിച്ചിട്ടുള്ള നാരായണ്‍, മോദിയുടെ മാര്‍ഗദര്‍ശികളില്‍ ഒരാളായിരുന്നു. 1974-77, 1977-80 കാലഘട്ടങ്ങളില്‍ യു.പിയിലെ നൗറംഗിയ (ഇന്നത്തെ ഖാഡ) മണ്ഡലത്തില്‍ നിന്ന് ജനവിധി തേടി ജയിച്ച്‌ എം.എല്‍.എയായിരുന്ന ചരിത്രം കൂടിയുണ്ട് ബുലായി ഭായ്‌ക്ക്.

കൊവിഡ് മഹാമാരിയുടെ പശ്ചാത്തലത്തില്‍ വിഷമഘട്ടങ്ങളെ അതിജീവിക്കുവാനുള്ള അനുഗ്രഹം തേടിയാണ് മോദി വിളിച്ചതെന്ന് നാരായണ്‍ പറഞ്ഞു. ബുധനാഴ്‌ച രാവിലെയാണ് പ്രധാനമന്ത്രി ഫോണില്‍ നാരായണിനെ ബന്ധപ്പെട്ടത്.